‘चीनया आर्थिक विकासय् सुनां हस्तक्षेप याये दइमखु’

चीनिया राष्ट्रपति सी जिनपिंगं चीनया आर्थिक विकासया लँय् सुनां नं हस्तक्षेप याये दइमखु धयादीगु दु । चिनियाँ कम्युनिष्ट पार्टीं अवलम्बन याःगु ऐतिहासिक सुधार एवं खुल्ला नीतिया ४० दँ थ्यंगु लसताय् बेइजिङ्गय् जूगु विशेष समारोहय् सम्बोधन यासें राष्ट्रपति सीं चीनया विकास व प्रगति थ्व हे नीतिया आधारय् न्ह्याः वनाच्वंगु व थुकियात त्वःते फइमखु धयादीगु दु ।

चीनया ग्रेट हल अफ द पिपुलय् जूगु भव्य समारोहय् संवोधन यासें राष्ट्रपति सीं आर्थिक सुधारया क्षेत्रय् चीनं थप ज्या याना वनेगु प्रतिबद्धता नं प्वंकादीगु खः । वय्कलं आःया एकदलीय राजनीतिक प्रणालीपाखें विचलित मजुइगु व मेगु छुं नं देय्या आदेश कथं ज्या मयायेगु खँ नं धयादिल ।

थौंकन्हय् चीन व अमेरिका दथुइ जुयाच्वंगु व्यापारिक युद्ध जुयाच्वंगु चिनिया राष्ट्रपतिया थ्व धापू वःगु खः । ‘समाजवादया ध्वाँय् चिनिया भूमिं अझं च्वय् ब्वयाच्वनी’ धासें सीं धयादिल, ‘चीनया कम्युनिष्ट पार्टीया नेतृत्व चिनिया विशेषतायुक्त समाजवादया प्रतिरुप खः व थ्व चिनिया विशेषता सहितया समाजवादी प्रणालीया तःधंगु उपलब्धि खः ।