थनिनिसें निगू अर्बया म्युचुअल फण्डया विक्री सुरु जुइगु

येँ – नेपाःया पुँजी बजारय् न्हून्हूगु अ वसर व लगानीया स्रोत मालेगु झ्वलय् म्युचअल फन्डय् नं धमाधम आकर्षण अप्वया वनाच्वंगु दु ।
पुँजीबजार थीथी बैंक व वित्तीय कम्पनीया सहायक कम्पनीतय्सं म्युचुअल फण्ड मीगु अप्वयेकाहःगु झ्वलय् मंगलवाः निसें थप मेगु निगू महत्वपूर्ण कम्पनीया म्युचुअल फण्डया विक्री सुरु जुइत्यंगु दु ।थ्व निगू कम्पनीं जक निगू अर्बया म्युचुअलल फण्ड विक्री यायेत्यंगु दु । नेपाल स्टक एक्सचेन्जय् थौंकन्हय् मुक्कं झिंछगू कम्पनीया अज्याःगु फण्ड कारोवार जुयाच्वंगु दु ।

आः सिटिजन्स बैंकया सहायक कम्पनी सिबिआइएल क्यापिटलं छगू अर्ब तकाया सामूहिक लगानी कोषया म्युचअल फण्ड पितहयेत्यंगु दु । कम्पनीया कथं प्रति इकाई झितकाया दरं म्होतिं नं १०० ईकाइ अर्थात १००० तका व अप्वलय् २० लाख इकाइ अर्थात निगू करोड तका बराबरया आवेदन बीफइगु खँ धाःगु दु । सिबिआइएलं हःगु थ्व न्हय्दँया बन्दमुखी लगानी कोषय् कन्हय् माघ २ गते निसें माघ ७ गते तक आवेदन बीफइ । ई थप जुल धाःसा माघ १७ गते तक आवेदन काइगु खँ धाःगु दु ।

मेखे एनआइसी एसिया क्यापिटलं व्यवस्थापन याःगु एनआइसी एशिया ग्रोथ फण्डया नं मंगलवाः निसें विक्री सुरु जुइत्यंगु दु । एनआइसीया म्युचअल फण्ड नं छगू अर्ब तकाया हे खः । थुकी मध्ये १५प्रतिशत प्रवद्र्धक एनआइसी एसिया बैंकया जुइ । ल्यं दुगु ८ करोड ५० लाख इकाइ सर्वसाधारणया निंतिं जुइ । एनआइसी माघ ८ गते तक आवेदन तयेफइसा ई थप जुल धाःसा माघ २१ गते तक तयेफइ । थ्व फण्डय् म्होतिं नं दँय् १६ प्रतिशत नगद लाभांस बीगु प्रतिबद्धता प्वंकातःगु दु । थ्व म्युचअलं न्हापांगु दाय् १५.५७ प्रतिशत व न्हय्दँय् १६.१३प्रतिशत लाभांस बीगु लक्ष्य तयातःगु दु ।