किपू नपाया बजेट १ अर्ब १४ करोड

किपू- किपू नगरपालिकाया न्हय्क्वःगु नगरसभा क्वचाःगु दु । आर्थिक दँया दकलय् लिपांगु दिं असार ३१ गते किपू नगरपालिकाया नगरसभा जूगु खः । किपू नगरपालिकाया प्रमुख रमेश महर्जन व उपप्रमुख सरस्वति खड्कां मंकाःकथं त्वाःदेवाय् मत च्याकाः उलेज्या यानादीगु नगरसभाया न्हापांगु चरणय् नीति तथा कार्यक्रम व अनुमानित बजेट न्ह्यब्वःगु खः । निगुलिं प्रस्तावयात कयाः वंगु असार १७ गते च्वंगु नगरसभाया निक्वःगु बैठकय् सहलह यानाः सर्वसम्मतिं पारित याःगु खःसा असार २५ गते बजेट पारित यानाः नगरसभा क्वचायेकेमाःगु खःसां अबलय् स्थगित जूगुलिं असार ३१ गते बैठक च्वनाः सिधयेकूगु खः ।

नगरप्रमुख महर्जनया अध्यक्षताय् जूगु बैठकय् उपप्रमुख खड्कां आर्थिक दँ ०७७÷७८या निंतिं बजेट न्ह्यब्वयादीगु खः । नगरपालिकां चालु आर्थिक दँया निंतिं चालुपाखे ४८ गू करोड २५ गू लाख झिंन्याद्वः व पूँजीगतपाखे ५५ गू करोड १९ गू लाख ग्वीगुद्वः व नगर दुनेया झिगू वडापाखें ११ गू करोड यानाः मुक्कं १ गू अर्ब १४ गू करोड ४५ गू लाख झिंप्यद्वःया बजेट न्ह्यब्वःगु खः ।

प्रस्तुत बजेटय् दक्वं वडाया वडाअध्यक्षं ब्वति कायेगु झ्वलय् थःथःगु धारणालिसें वडाया बजेट नं न्ह्यब्वःगु खः । उपप्रमुख खड्कां बजेट न्ह्यब्वयादीवं सहलहलिपा सर्वसम्मतिं पारित जूगु सभाध्यक्षलिसें नगरप्रमुख महर्जनं घोषणा यानादीगु खः । नगरपालिकाया प्रमुख प्रशासकीय अधिकृत ध्रुवराज आचार्यं चालु आर्थिक दँया निंतिं थीथी प्रस्ताव न्ह्यब्वयादीगु खः ।

नगरसभापाखें न्हापा हे पारित जुइधुंकूगु कर्मचारीतय् तह मिलान कार्यान्वयन मजूगु खँय् अप्वःथे वडाअध्यक्षपिंसं असन्तुष्टि प्वंकुसे उकियात तत्काल कार्यान्वयन यायेत नं सभाय् माग याःगु खः । वडाअध्यक्षतय् असन्तुष्टियात संबोधन यायेगु झ्वलय् सभाअध्यक्षलिसें नगरप्रमुख महर्जनं कर्मचारीतय् तह मिलान सम्बन्धय् नगरसभां न्हापा हे निर्णय याःगु खःसांनं प्रदेश सरकारं कानुन दयेकेगु धाःगुलिं छुं भचा लिपा लाःगु जानकारी बियादीगु खः ।

नगरप्रमुख महर्जनं बियादीगु जानकारी बियादीवं उपप्रमुख खड्कां वडाअध्यक्षतय् मागयात संबोधन यासें न्यादँतक सेवा यायेधुंकूपिं कर्मचारीतय् १ तह मिलान यायेगु घोषणा सभाय् यानादीगु खः ।

सम्बन्धित बुखँ

LEAVE YOUR COMMENTS