मेडिकल विद्यार्थी बछि फेल

येँ – डाक्टर जुइगु लागिं दँ दँ तक ब्वनाः नं अन्तिमय् लाइसेन्स कायेगु इलय् बीगु जाँचय् फेल जुइपिं विद्यार्थीतय् ल्याः दँय्दसं अप्वयाच्वंगु दु । वंगु शनिवाः नेपाल मेडिकल काउन्सिलं काःगु थज्याःगु हे जाँचय् नं फेल जूपिं विद्यार्थीतय् ल्याः बछि स्वयां अप्वः खने दत ।
मेडिकल काउन्सिलं एमबीबीएस पास याना वःपिं विद्यार्थीतय्त लाइसेन्सया लागिं काःगु जाँचय् ५४ प्रतिशत विद्यार्थी फेल जूगु खः । शनिवाः काउन्सिलं उगु जाँच काःगु खः ।

काउन्सिलं धाः कथं उगु जाँचय् मुक्कं यानाः १३११ म्ह विद्यार्थीतय्सं जाँच बिउगु खःसा उकी ५९८ म्ह जक पास जूगु खः । खुदँ तक निरन्तर आखः ब्वना वयेधुंकाः नं अन्तिमय् लाइसेन्स कायेगु परीक्षाय् धाःसा थुलिमछि विद्यार्थी फेल जूगु खँयात थन अजूचायापुगु घटनाया रुपय् काःगु दु ।

काउन्सिलं धाः कथं थथे फेल जुइपिं विद्यार्थीतय् ल्याः दँय्दसं अप्वया वनाच्वंगु दु । काउन्सिलं काइगु थ्व जाँचय् पास मजुइकं विद्यार्थीतय्त डाक्टर जुइगु लाइसेन्स दइ मखु । लाइसेन्स मदुतले उम्ह विद्यार्थीं विश्वविद्यालयय् पास याना वःसां नं विरामी जाँचे धाःसा याये दइ मखु । उमिसं गुगु वर्षय् फेल जूगु खः उगु वर्ष अथें च्वनाः हानं मेगु पालय् जाँच बियाः पास यायेमाः ।

थ्व जाँचया बारे सिउपिं चिकित्सकतय्सं धाः कथं लाइसेन्सया लागिं काइगु थ्व जाँच धइगु तसकं आधारभूत तहया जुइ । थ्व खास थाकुगु जाँच जुइ मखु । अज्याःगु अःपुगु जाँच तकं पास याये मफुगु कारणं उमिगु शिक्षाय् गनं कि गनं खराबी दयेमाः धकाः अनुमान याःगु दु ।
अथे फेल जुइपिं विद्यार्थीत अप्वः यानाः नेपाः स्वयां नं विदेशय् ब्वना वइपिं लाःगु खँ नं धाःगु दु । नेपाः व विदेशय् ब्वंकीगु तरिका पाइगु कारणं यानाः नं नेपाःया मेडिकल काउन्सिलं काइगु जाँचय् उपिं ताःलाये मफुगु जुइमाः धकाः अनुमान याःगु दु । नेपालय् मेडिकल ब्वनेगु लागिं आपालं विद्यार्थीतय्सं लखौं तका खर्च याये मालाच्वंगु अवस्था दु ।

विदेश वनीपिंत थप व्यवस्था
नेपाःया मेडिकल काउन्सिलं काइगु जाँचय् नेपाः स्वयां नं विदेशय् ब्वना वइपिं विद्यार्थीत अप्वः फेल जुइगु जूगुलिं सरकारं आः उकियात सुधार यायेगु लागिं थीथी कथं पहल न्ह्याकूगु खँ धाःगु दु । न्हापा विदेशय् ब्वं वनेत न्ह्याम्ह न्ह्याथे यानाः वंसां जिउगु खःसा आः नेपाःया छगू तह पास यानाः जक उपिं विदेश वने दइगु नियम सरकारं लागू याना तःगु दु । नेपाःया छगू तह पास यानाः विदेशय् ब्वं वंपिं विद्यार्थीत पढाई सिधयेकाः लिहां वयेधुंकाः काउन्सिलया जाँचय् कम जक फेल जूगु खँ धाःगु दु ।