हलिंन्यंकं न्यायेकल हलिं नेवाः न्हि

येँ – हलिं नेवाः न्हि (वल्र्ड नेवाः डे) शनिवाः कुन्हु येँय् छगू समारोह यासें हन । हरेक दँया मार्च महिनाया लिपांगु शनिवाः न्ह्यागुसां छगू नेवाः ज्याझ्वः यासें थ्व दिवस हनेगु ग्वसाः याना तःगु दु ।

येँय् हलिं नेवाः दबू नेपाः देय् कवःया नायः शाक्य सुरेनया सभापतित्वय् जूगु ज्याझ्वलय् येँँ मनपाया मेयर विद्यासुन्दर शाक्य मूपाहां कथं झाःगु खः । ज्याझ्वलय् बाखं च्वमि यज्ञरत्न धाख्वाः, साहित्यकार नर्मदेश्वर प्रधान, पत्रकार राजेन्द्र स्थापित, कलाकार नारायणदेवी प्रधान, कासामि राजेश प्रजापति, व्यवसायी कृष्णलाल महर्जन व पौभाः च्वमि लोक चित्रकारपिंत हनेगु ज्या जूगु खः । उगु हे ज्याझ्वलय् गायिका संगीता शाक्ययात ‘रमेश ताम्राकार लुमन्ति सिरपाः’ नं लःल्हाःगु खः ।
ज्याझ्वलय् येँ मनपाया उपमेयर हरिप्रभा खड्गी श्रेष्ठ, मल्ल के. सुन्दर, हिरण्यलाल श्रेष्ठ, नारायण राजभण्डारी, तिर्थलाल महर्जन, किरण केन रंजितपिंसं नं नुगःखँ तयादीगु खः ।

हलिं नेवाः न्हि विश्वया मेमेगु देशय् नं थीथी ज्याझ्वः यासें हंगु दु । अमेरिका, बेलायत, क्यानाडा, अष्ट्रेलिया आदि देशय् नेवाः मुना यायेगु, नेवाः नसात्वँसा नयेगु, नेवाः फिल्म स्वयेगु आदि थीथी कथंया ज्या यानाः थ्व न्हि हनेगु ज्या जूगु खः । हलिं नेवाः दबू नीस्वंगु न्हियात हलिं नेवाः न्हि कथं हनेगु याना वयाच्वंगु खः ।