‘नेपाः–चीन सीमा विवाद मदु’

येँ -नेपाःया निंतिं चिनियाँ राजदूत होउ यान्छीं नेपाः–चीन सीमा विवादं मुक्त जूगु खँ धयादीगु दु । निगू देय् दथुइ सीमा सम्झौताय् हस्ताक्षर जूगु ६० दँ थ्यंगु लसताय् छगू ट्वीट यासें राजदूत यान्छीं सीमा सम्झौता निगू देय्या मित्रता व थवंथवय् फाइदाजनक सहकार्यया ताँपु जूगु खँ धयादीगु दु ।

नेपाःया गृह मन्त्रालयं हुम्लाया नाम्खा गाउँपालिकाया लिमि क्षेत्रय् ब्वलनाच्वंगु सीमा लगायत छुं विषयय् निगू पक्षीय सहकार्य यानाः समस्या ज्यंकेत इनाप यासें परराष्ट्र मन्त्रालययात पौ च्वःगु समाचार वयाच्वंगु इलय् राजदूत यान्छीं ट्वीट यासें धयादीगु दु, ‘थौंया न्हि ६० दँ न्ह्यः मित्रवत वार्तापाखें चीन व नेपाः दथुइ सीमा सम्झौता जूगु खः, उगु इलंनिसें झी दथुइ सीमा सम्बन्धी गुगुं नं कथंया विवाद मदु व थ्व मित्रताया आधार खःसा थवंथवय् फाइदाजनक सहकार्यया ताँपु नं बने जुल ।’

गृह मन्त्रालयं जयनारायण आचार्यया नेतृत्वय् नीस्वंगु सीमा क्षेत्र सम्बन्धी अध्ययन समितिं लःल्हाःगु प्रतिवेदनय् न्ह्यथनातःगु सुझावया आधारय् परराष्ट्रयात पत्राचार याःगु खः । उगु समितिं वंगु असोज १० गते गृहमन्त्री बालकृष्ण खाँणयात अध्ययन प्रतिवेदन लःल्हाःगु खः ।