तौथलीइ देय् दबू केन्द्र व प्रदेशयात हनेज्या

येँ(नेपालभाषा टाइम्स)-सिन्धुपाल्चोकया तौथलीइ नेवाः देय् दबू केन्द्र व बागमति प्रदेशया पदाधिकारी दुजःपिंत तःजिक हनेज्या याःगु दु । नेवाः देय् दबू सिन्धुपाल्चोक जिल्ला समितिया ग्वसालय् त्रिपुरासुन्दरी गाउँपालिकाया ५ वडाय् देय् दबूया केन्द्र व बागमति प्रदेशया पदाधिकारीपिंत तःजिक लसकुस यासे हनेज्या याःगु खः ।

नेवाः देय् दबूया केन्द्रीय नायः पवित्र वज्राचार्य, केन्द्रीय न्वकुपिं उमेश स्थापित, शान्त श्रेष्ठ मूछ्याञ्जे सत्यनारायण डंगोल, बागमति प्रदेशया नायः विष्णुगोपाल महर्जनलिसें येँ द्वाल्खा सम्पर्क मञ्चया अध्यक्ष सकुना श्रेष्ठ मलेकू, न्वकु शान्ति श्रेष्ठ, येँ जिल्लाया अतिरिक्त क्रियाकलाप विभागया बालकृष्ण श्रेष्ठ लगायतयापिंत लसकुस यासे सम्मान याःगु खः ।

उगु इलय् वय्कःपिंत तौथलीया मू सतकनिसें बाजं थानाः लसकुस यासे गणेद्यः, भिंद्यः, त्रिपुरासुन्दरी देगःया परिक्रमा याकूगु खः । वयां लिपा जूगु देय् दबू सिन्पाल्चोक जिल्लायाया नायः अमृतबहादुर श्रेष्ठया सभापतित्वय् देय् दबूया केन्दीय नायः वज्राचार्यया प्रमुख आतिथ्यताय् बःचाधंगु सभा नं जूगु खः ।