लुँ काण्डय् हानं स्वम्ह चिनियाँ ज्वन

येँ (नेपालभाषा टाइम्स)- १००किलो लुँ तस्करी प्रकरणय् थप स्वम्ह चिनियाँ नागरिकयात प्रहरीं ज्वंगु दु । प्रहरीया कथं थ्व थप ज्वंपिं चिनियाँ नागरिकतय् नां झाओ हुई, जोङ छ्याङ व ताङ जिङ खः । नेपालं चीन वनेत्यंपिं थ्व स्वम्हेसितं प्रहरीया केन्द्रीय अनुसन्धान ब्युरों ज्वंगु खः । थ्व स्वम्ह नापं आः १०० किलो लुँ तस्करी प्रकरणय् ज्वंपिनिगु ल्याः २३ म्ह थ्यंगु दु । थुकी चिनियाँ नागरिकत न्हय्म्ह दु । थ्व काण्डय् अप्वः धइथें चिनियाँ नागरिकतय् ल्हाः खने दयाच्वंगुलिं चिनियाँतयय्सं नेपाः दुने गाक्कं चलखेल यानाच्वंगु संकेत पिहां वःगु दु ।

जितः बयानया निंतिं सःति– महरा
पुलांम्ह सभामुख कृष्णबहादुर महरां लुँ तस्करी प्रकरणय् अनुसन्धानया नितिं सरकारयात ग्वाहालि यायेत तयार दुगु खँ धयादीगु दु । महरायात लुँ तस्करीइ दुथ्याःगु आशंंका यासें अनुसन्धानया दायराय् हयेमाःगु माग जुयाच्वंगु इलय् म्हिगः दाङय् पत्रकार सम्मेलन यासें वय्कलं थ्व खँ धयादीगु खः ।

लुँ तस्करी प्रकरणय् थःगु नां स्वानाः पिहां वःगु खँय् थः अनुसन्धानया नितिं सरकारयात ग्वाहालि यायेत तयार दु धासें महरां धयादिल, ‘लुँ प्रकरण बारे सरकारयात गुगुं नं कथंया छानबिनया नितिं ग्वाहालि यायेत तयार दु । अनुसन्धानया नितिं जितः सःति धयाच्वनागु दु ।’

चिनियाँ नागरिक वाङयात थम्हं फलफूल व्यापारीया रुपय् जक म्हसिउगु धासें लुँ तस्करी प्रकरणय् छुं कारण हे मदयेक थःगु नां स्वाःगु द्वपं नं वय्कलं बियादिल । वाङं थःत नापलानाः पासाया इलेक्ट्रोनिक चुरोट भन्सारं पनातःगु व भन्सारं पित हयेत इनाप याःगुलिं थम्हं कानुनी रुपं वःगु सामान खःसा ग्वाहालि याये धयागु खँ नं वय्कलं धयादिल । वाङं विद्युतीय चुरोटय् तयाः ९ किलो लुँ हःगु द्वपं लानाच्वंगु दु ।

सम्बन्धित बुखँ

LEAVE YOUR COMMENTS