स्वच्छ वातावरणया निंतिं स्वनिगःया मेयरपिनि प्रतिबद्धता

येँ – स्वनिगःया फुक्क नगरपालिका दुथ्याःगु फोरमया विस्तारित बैठक म्हिगः च्वंगु दु । बैठकं स्वनिगलय् स्वच्छ वातावरण कायम यायेगु प्रतिवद्धता प्वंकूगु दु । अथेहे वातावरणीय न्याय कायम यायेगु खँय् नं बैठकय् सहमति जूगु दु । स्वनिगः प्रदूषण जुया वनाच्वंगुलिं थनया स्वच्छता कायम यायेत बैठकं प्रतिवद्धता प्वंकूगु खः ।

येँय् जुयाच्वंगु कुँ व धुँ नियन्त्रण यायेगु, सवारी साधनय् गुणस्तरीय इन्धन छ्यलेगु निंतिं बः बीगु, विकास निर्माणया झ्वलय् नं वातावरणयात अप्वः ध्यान बीगु, हरियाली अप्वयेका यंकेगु, स्वच्छ वातावरणयात कानुनी अधिकार बीगु आदि खँय् नं सहमति जूगु खः । अथेहे हे हरियालीयात स्थानीय अधिकार कथं कायेगु खँय् नं सहमति जूगु खः । म्हिगःया बैठकय् स्वनिगःया झिंच्यागू नगरपालिकाया प्रमुख व उपप्रमुखपिंसं ब्वति काःगु खः ।