अमेरिकी ग्रीनकाड,नेपाली कलाकारतय् मोह

नेपाःया राजनीतिक अस्थिरता व पेशागत नैराश्यताया कारण क्यनाः संयुक्त राज्य अमेरिका वनाः उखेया हे स्थायी आवास अनुमतिपत्र (ग्रीनकार्ड) कयातःपिं नेपाःमि कलाकारतय् ल्याः ५०० मल्याक थ्यंगु दु । उचित वातावरण दत धाःसा थःपिं स्वदेश लिहां वयेत तयार जुइगु धाःसां नं इपिं उखे हे न्ह्यइपुकाच्वंगु दु ।

‘नेपाल अमेरिकन कलाकार संघ’या अध्यक्ष सुमन बुढामगरयाकथं आतकया दुने ५०२ म्ह नेपाली कलाकारं अमेरिकाया स्थायी आवास अनुमतिपत्र कायेधुंकूगु दु । संघं थ्व सम्बन्धय् संकलन याःगु विवरणसहितया सपूm पिथनेगु तयारी नं यानाच्वंगु दु । उकीमध्ये गुलिखेसिनं मेमेगु ज्यालिसें कलाकारितायात नं निरन्रता बिया वयाच्वंगु दुसा गुलिखे धाःसा पेशापाखें पलायन जूगु दु ।

‘सेलिब्रिटी’ कलाकारयात अनया सरकारं ‘एक्ष्ट्रा अर्डिनरी आर्टिष्ट’या मान्यतातकं बीगु जूगुलिं इपिं उखे हे सम्मानित जूगु अनुभव यायेगु यानाच्वंगु दु । गुलिखे कलाकार नेपाः वये–वनेगु नं यानाच्वंगु दुसा गुलिखेसिनं नेपाली नागरिकता नं त्याग यायेधुंकूगु दु । स्थायी आवास अनुमतिपत्र दुपिंसं अमेरिकाय् स्थायी बसोबास यायेगु व ज्या नं याये दइसा स्वदँ लिपा अनया हे नागरिकता कायेगु प्रक्रियाय् नं सहभागि जुइखनी ।

वंगु मोहनिया इलय् अमेरिका थ्यंकः वंम्ह वरिष्ठ संगीतकार टिका भण्डारी व कलाकार दथुइ न्यूयोर्क सहरया ज्याक्सन हाइट क्वीन्सन्सय् मंकाःकथं सिन्हः तीगु व भिंतुना सांगीतक सनिल ज्याझ्वलय् अध्यक्ष बुढामगरं उगु जानकारी बियादीगु खः ।

भण्डारीलिसें कलाकार सपना श्री, म्येँ हालामि नरबहादुर दाहाल, विमल डाँगी मगरं शिशिर श्रेष्ठपाखें कलाकार व संचारकःमिपिंसं तकं मंकाःकथं सिन्हः तिउगु ज्याझ्वलय् नेपाली कलाकार, साहित्यकार व बुद्धिजीवीपिनगु अमेरिकाप्रतिया मोह व बाध्यतायात कयाः समीक्षा नं याःगु खः ।

निजामति, राजनीति, उद्योग, व्यवसा क्षेत्रया व्यक्तित्वपिं नं विगतय् अमेरिका पलायन जूगु घटना दु । लिपांगु इलय् नेपाल सरकारं डिभी÷पीआरधारी राष्ट्र सेवकयात कारवाहीया ख्याच्वः बीवं कर्मचारीत अमेरिका वनेगु आकर्षण बाध्यतावश म्हो जूगु खः । संघयाकथं अमेरिकाय् च्वनाच्वंपिं कलाकारत गुलिखे कोल्ड स्टोर, पार्लर, पेट्रोल पम्प, होटल, रेष्टुराँय् ज्या यानाच्वंगु दुसा गुलिखेसिनं थःगु हे व्यवसाय संचालन यानाच्वंगु दु ।

इमिसं घौछिया १० निसें १३ अमेरिकी डलर कमे यानाच्वंगु दु । गुलि गुलिं ला अध्ययनय् नं लगे जुयाच्वंगु दु । देशय् ताःहाकः द्वन्द्व चले जूगु व नेपाली संकिपा ख्यलं नं उद्योगया रुप काये स्वयां न्ह्यः हे कलाकारत विदेश पलायन जुइगु शुरु जूगु खः ।

रेडियो नेपालया उपनिर्देशकतकं जुयाच्वनादीम्ह संगीतकार भण्डारीं धयादिल, ‘स्वदेशय् समृद्धि व स्थायीत्वया लहर चले जुयाच्वंगु इलय् अमेरिकाय् च्वनाच्वंपिं नेपाली कलाकारया ल्याः अप्वयेगु धइगु पक्का नं भिंगु संकेत मखु, इमित लित हयेगु वातावरण दयेकेमाः ।’ वय्कलं इपिं कलाकारतय्के नेपाःया निंतिं छुं यायेमाः, याये धइगु भावना दुगु खनागु धासें इमित पेशा वा देशं पलायन जूगु हे थ्यंक धाये मजिउगु खँय् बः बियादिल ।

कलाकार प्रेमराजा महत, सरोज खनाल, जीवन लुइँटेल, रमिता ढुंगेल, रामप्रसाद खनाल, महेन्द्र बुढाथोकी, नारायण पुरी, कृष्ण चापागाइँ, अरुणिमा लम्साल, रञ्जना शर्मा, साहित्यकार ज्ञानेन्द गदाल लगायत अमेरिकाय् च्वना वयाच्वंगु दु ।

थ्व स्वयां न्ह्यःया दशकय् छुं ई उखे च्वनाः नायिका करिश्मा मानन्धर स्वदेश लिहां वःगु खःसा नायक भुवन केसीं अमेरिकाया ‘ग्रीनकार्ड’ कायेत अस्वीकार यानादीगु खः । अमेरिकाया स्थायी नागरिकता काःम्ह कलाकारलिसें संचारकःमि रवी लामिछानें हालसालय् अमेरिकाया नागरिकता त्याग यानागु घोषणा यानादीगु खः ।