ज्वेल्स सहकारीपाखें बुराबुरीतय् निंतिं पौष्टिक आहार ग्वाहालि

यल – देय् छगूलिं लकडाउन जुयाच्वंगु इलय् आपालं संस्था व मनूतय्सं राहत इनेगु ज्या यानाच्वंगु दु । गुलिसिनं नयेमखंपिंत नकेगु यानाच्वंगु दुसा गुलिसिनं मजदुर व ज्यालादारी यानाः नयेमाःपिनि निंतिं राहत इनेगु ज्या यानाच्वंगु दु ।

थ्वहे दथुइ यलया ज्वेल्स बचत तथा ऋण सहकारी संस्थापाखें बुराबुरीपिनि निंतिं विशेष नयेत्वनेगु सामान वितरण याःगु दु । संस्थां ६५दँ पुलेधुंकूपिं बुराबुरीतय् निंतिं पौष्टिक आहार वितरण याःगु खः । बुराबुरीतय् निंतिं अत्यावश्यक फलफूल, खँय्, हर्लिक्स आदि नसाः ज्वलं संस्थापाखें छेँ छेँ वनाः वितरण याःगु खः । आः तक १ सय ६८म्ह बुराबुरीपिंत अज्याःगु ग्वाहालि यायेधुंकूगु खँ संस्थां धाःगु दु ।