ने. सं. ११४४ ञलाथ्व दशमी -

ससफो नुवाकोटया न्हापांगु जिल्ला भेला

येँ – संघीय समाजवादी फोरम नेपालया सहअध्यक्ष राजेन्द्रप्रसाद श्रेष्ठं राजनीतिक दल धइगु नेता प्रधान मखु, नीति प्रधान जुइमाः धयादीगु दु । वय्कलं नेतातय्त १५० किलोया स्वांमाः क्वखायेकेवं वा व्यक्ति पुजाया शैलीं मखसे सही नीति व विचारया कार्यान्वयनया आधार पार्टी जुइमाः धयादिल ।

प्रतिनिधिसभा सदस्य तकं जुयाच्वनादीम्ह ससफो नेपालया सहअध्यक्ष श्रेष्ठं उगु खँ वंगु शनिवाः नुवाकोट जिल्लाया रानीपौवाय् जूगु पार्टी जिल्ला समितिया पुनर्गठन ज्याझ्वलय् नवासें धयादीगु खः ।व्यक्ति पुजा यायेगु शैली पूँजीवादी शैली खः धासें वय्कलं धयादिल, ‘समाजवादी विचाः ज्वनाःतपिं नेतातय्सं पार्टी व थःगु सिद्धान्तयात जक मखसे थःगु कार्यशैलीयात नं समाजवादी दयेके फयेकेमाः ।’

उगु इलय् वय्कलं ससफो नेपालं जनतायात नेपाली समाजया हिउपाःया लँपु संघीय समाजवाद बिउगु धासें संघीय समाजवादं समानुपातिक समावेशीकरणसहितया संघीय राज्य निर्माण यानाः राष्ट्रिय एकतायात सशक्त यायेगु नापं देय्यात समाजवादया लँपुइ न्ह्याकी धयादिल । पार्टी निर्माणय् विचाःया महत्वयात कयाः वय्कलं धयादिल, ‘विचाः धइगु चिकं खःसा इञ्जिन संगठन खः, सहि विचारं हे जक पार्टीयात संगठित यानाः न्ह्यःने यंकी ।’

ससफो नेपालय् एकीकृत जूगु हाम्रो कम्युनिष्ट पार्टी धादिङया नेता देवराज घिमिरेया सभापतित्वय् जूगु ज्याझ्वलय् पार्टी केन्द्रीज दुजः नापं प्रदेश नं. ३ या इन्चार्ज लालबहादुर तामांगं गुगुं संगठन निर्माण जुइबलय् चीधं जुयाः जन्म जुइ, तर विचार सही जुल धाःसा संगठन तःधं जुजुं न्यना वनी धासें ससफो नेपाल जन्म जूगु इलय् हे कांग्रेस कम्युनिष्ट स्वयां तःधंगु आकारय् जन्म जूगु दु धयादिल ।

ज्याझ्वलय् पार्टी केन्द्रीय दुजः नापं प्रदेन नं. ३ या उपाध्यक्ष न्हुछेलाल महर्जन, मुख्यसचिव तारा सिं विश्वकर्मा, ताम्सालिङ समितिया अध्यक्ष कृष्णकुमार घलान, पार्टीया नेतातपिं केशव दाहाल, चञ्चला पराजुली लगायतं नं थःथःगु विचाः तयादीगु खःसा घिमिरेया हे अध्यक्षताय् नीछम्हेसिया नुवाकोट जिल्ला तदर्थ समितिया नं पुनर्गठन याःगु खः ।