अखण्ड भारत विरुद्ध ग्रेटर नेपाल !

येँ (नेपालभाषा टाइम्स)- भारतं थःगु देशया न्हूगु संसद भवनय् तःगु अखण्ड भारतया नक्सां यानाः नेपाः लिसें बंगलादेश व पाकिस्तानय् तकं विरोधया लहर ब्वलंगु दु ।
उगु नक्सायात कयाः नेपालय् विपक्षी पार्टीतय्सं कडा विरोध यानाच्वंगु दुसा बंगलादेशं न्हू दिल्लीया थःगु मिसनयात थुकिया बारे बुझे या धकाः अह्रे याःगु खः । पाकिस्तानं उगु नक्सायात कयाः सरकारपाखें हे विरोध प्वंकेधुंकूगु दु ।

नेपालय् धाःसा परराष्ट्र मन्त्री एनपी साउदं भारतया संसद भवनय् अज्याःगु नक्सा तःगु बारे थःपिंसं ला छुं हे मसिउ धकाः भारतीय मिडियायात अन्तर्वार्ता बिउगु कारणं उकिया समेत विरोध जुयाच्वंगु दु ।

थ्वहे झ्वलय् म्हिगः भारतया विदेश मन्त्रालयं याःगु छगू पत्रकार सम्मेलनय् भारतीय विदेशमन्त्री एस. जयशंकरं थ्व नक्साया बारे नेपाः व बंगलादेशयात ध्वाथुइका बी धुनागु खँ कनादीगु दु । तर पाकिस्तानं धाःसा थुकिया बारे थुइके चाहे जुइ मखु धकाः नं वय्कलं कनादिल ।

मेखे येँ महानगरपालिकाया मेयर बालेन शाहं भारतीय अखण्ड भारतया नक्सायात लिसः बी कथं थःगु ज्याकुथिइ ग्रेटर नेपालया न्हूगु नक्सा तयादीगु दु । तर मेयर साह धाःसा थ्व इलय् कलाःयात क्यनेत नेपाःया अस्पताल त्वःताः भारतया हे अस्पतालय् ब्वाँय् जुयाच्वंगु दु ।