ग्वलय् गंगामाईया जात्रा क्वचाल

येँ (नेपालभाषा टाइम्स) – पशुपति लागाय् जुइगु गंगामाईया जात्रा वंगु दिल्लाथ्व सप्तमिकुन्हु जुल । पशुपति लागाय् दँय्दसं दिल्लाथ्व सप्तमि अर्थात् अचला सप्तमिकुन्हु गंगामाईया तःजिक जात्रा यायेगु याना वयाच्वंगु दु ।

जलया अधिष्ठात्री देवी गंगामाईया दिव्य रथजात्रा यायेगु परम्परां वा वइगु व सुख्खा जुइके बीमखु धइगु जनविश्वास दु । पशुपति देगः व पाशुपत क्षेत्रय् देवी गंगालाय दिव्य रथ जात्रा व विशेष अर्चना, उपासना यायेगु याइ ।

पशुपति महाद्यःया छ्यनय् विराजमान गंगामाईया मूर्ति विधिवत् पुजा आराधना यानाः आर्यघाटस्थित गंगा द्यःयाथाय् यंकाः महास्नान याकी । वयां लिपा गंगामाईया मूर्तियात ब्रम्हा, विष्णु व महेश्वरया स्वरुप स्वतँजाःगु प्यागोडा शैलीया रथय् तयाः सांस्कृतिक बाजंलिसें जात्रा याइ ।
गंगामाई जात्रायात उगु लागाया हे प्रतीककथं पशुपति क्षेत्र विकास कोषं निरन्तरता बिया वयाच्वंगु दुसा शाक्त सम्प्रदायया उपासना स्थल पाशुपत क्षेत्रय् गंगामाईया रथ जात्रायात विशेष महत्व बिया वयाच्वंगु दु ।

गंगामाईया जात्राय् पशुपति महाद्यःया देगःया गर्भगृहय् च्वंगु अष्टधातुया गंगामाईया मूर्ति रथय् बिज्याकाः पाशुपत लागाया थीथी थासय् जात्रा यानाः चाःहिकीगु खः ।