बेलायतय् कोराना खोपयात स्वीकृति

एजेन्सी – कोभिड १९ विरुद्ध छुं नं खोपयात स्वीकृति बिउगु न्हापांगु देय् बेलायत जूगु दु । बेलायतं अमेरिकी कम्पनी फाइजर व वया जर्मन सहायक कम्पनी बायोएनटेकं दयेकूगु कोरोनाविरुद्धया खोपयात स्वीकृत बिउगु खः । खोपयात स्वीकृत बेलायती नियमक संस्था एमएचआरएया कथं आः थ्व खोप वइगु वालं निसें बिइगु सुरु याःसां जिल ।

९५ प्रतिशत तकं सुरक्षा बीत सफल धयातःगु थ्व खोप दकलय् अप्वः जोखिमय् लानाच्वंपिंत बीगु सुरु याइगु खँ धाःगु दु। बेलायतं थ्व खोपया ४ करोड मात्रा न्यायेधुंकूगु दु। गुगु निगू करोड मनूतय् निंतिं कुगाः । बेलायतं न्यानातःगु मध्ये छगू करोड खोप तुरुन्त हे उपलब्ध जुइगु व थप च्यागू लाख खोप वइगु वाःया दुने थ्यनीगु खँ धाःगु दु ।

फाइजरं विकास याःगु थ्व खोप इतिहासय् हे दकलय् याकनं स्वीकृत कायेत ताःलाःगु खोप नं जूगु दु। खोप दयेकेगु सुरु याःगु झिला दुने हे थ्व खोपं अनुमति कायेत ताःलाःगु खः । गुलिखे खोपतय्त थथे अनुमति कायेगु निंतिं झिदँ तक नं बीगु याः । एनएचएसया प्रमुख कार्यकारी सर साइमन स्टेभेन्सं बेलायतय् स्वास्थ्य सेवाय् देय्या इतिहासया हे दकलय् वृहत खोप कार्यक्रमया तयारी जुयाच्वंगु खँ धयादीगु दु। खोप कार्यक्रमया निंतिं ५० गू अस्पताल तयारी अवस्थाय् हे तयेधुंकूगु दुसा मेगु खोप केन्द्र नं तयार यायेगु सुरु यानाहःगु दु ।

फाइजरं विकास याःगु थ्व खोपया परीक्षणया इलय् थुकिं शरीरयात कोरोना भाइरसलिसे ल्वायेगु एन्टिबडी दयेकेत व टि-सेल धाइगु शरीरया रोग प्रतिरोधी क्षमतायात मेगु भाग तयार यायेत अभ्यस्त यायेत ताःलाःगु खनेदुगु खः । थ्व छम्हेसित खोप स्ववाःया अन्तराय् निगू मात्रा बीमाः । अमेरिका, जर्मनी, ब्राजिल, अर्जेन्टिना, दक्षिण अफ्रिका व टर्किइ जूगु परीक्षणय् थ्व खोपया निगूगु मात्रा काःगुया न्हय्न्हु दुने खोप काःपिं मध्ये ९० प्रतिशतयात कोरोना भाइरस संक्रमणपाखें सुरक्षा बिउगु खनेदुगु खः ।

फाइजरं थ्व दँया अन्त तकया दुने न्यागू करोड मात्रा खोप आपूर्ति यायेफइगु व सन् २०२१या अन्त तकया दुने छगू अर्ब ३० करोड मात्रा खोप आपूर्ति यायेफइगु खँ धाःगु दु ।

सम्बन्धित बुखँ

LEAVE YOUR COMMENTS