फिब्व ख्यलय् डुवानया कारणसहित प्रतिवेदन पेश यायेत निर्देशन

येँ (नेपालभाषा टाइम्स) – येँ महानगरपालिकाया कार्यवाहक प्रमुख सुनिता डंगोलं फिब्वख्यः (माइतीघर) लागाया डुवानया प्राविधिक कारणसहित प्रतिवेदन पेश यायेत साझेदार ज्याकूया अधिकारीतय्‌त निर्देशन बियादीगु दु । फिब्व ख्यः लागाय् डुवान जुइगु थाय्या मंगलवाः स्थलगत अनुगमन लिपा कार्यवाहक प्रमुख डंगोलं उकथंया निर्देशन बियादीगु खः ।

कार्यवाहक प्रमुख डंगोलं उगु लागाया अनुगमन लिपा विपद जोखिम न्यूनीकरण तथा व्यवस्थापन प्राधिकरण, काठमाडौँ उपत्यका खानेपानी लिमिटेड, डिभिजन सडक कार्यालय येँ व येँ महानगरपालिकाया सम्बन्धित विभागयात डुवानया प्राविधिक कारणसहितया प्रतिवेदन पेश यायेत निर्देशन बियादीगु खः ।

अनुगमनया इलय फिब्व ख्यः लागाय् ९० सेन्टिमिटरया धः तयातःगु व निकास जुइगु थासय् ६० सेन्टिमिटरया धः तयातःगु सीदुगु दु । प्रारम्भिक अध्ययनया अवस्थाकथं थ्व हे कारणं उगु लागा डुवानय् लाःगु निष्कर्ष पिकाःगु दु । यद्यपि फिब्व ख्यः डुवानय् लाःगुया कारण धाः थ्व हे जक मखु धासें सम्बन्धित अधिकारीतय्सं उगु लागा जःखः भवन संरचना निर्माण याःगु इलय् धः निकास प्रणाली अवरोध जूगुलिं खयेमाः धइगु अनुमान याःगु दु ।

उगु इलय् कार्यवाहक प्रमुख डंगोलं स्थानीय प्रशासन, पूर्वाधार निर्माण व सुविधा वितरणलिसे सम्बन्धित साझेदारलिसेया सहकार्यय् फिब्व ख्यःयात डुवान मुक्त यायेगु नं धयादीगु दु ।

अनुगमनय् उपत्यका ट्राफिक प्रहरी ज्याकू, येँ महानगरपालिका विपद् व्यवस्थापन विभाग, सार्वजनिक निर्माण विभाग, सहरी योजना आयोग, महानगरीय प्रहरी बलया अधिकारीतय् सहभागिता दुगु खः ।