‘पुटिनया दरबार’य् अर्बपतिया दावी

एजेन्सी – रुसी राष्ट्रपति भ्लादिमिर पुटिनं थःगु निंतिं अर्बौं पाउण्ड तुइकाः दयेकूगु धयातःगु छगू तःधंगु विलासी भवन थःगु जूगु खँ रुसी व्यापारी आर्काडी रुटब्बियर्गं धाःगु दु। राष्ट्रपति पुटिनया आलोचकतय्सं धाःसा ब्लाय्क सी लिक्क दयेकाच्वंगु थ्व भवन पुटिनया हे जूगु दावी यानाच्वंगु दु ।

पुटिनया कट्टर आलोचक विपक्षी नेता एलेक्सी नाभाल्निं दकलय् न्हापां उगु दरवारया भिडियो सार्वजनिक याःगु खः । थ्व भिडियो सार्वजनिक यासें नभाल्निं इतिहासया हे दकलय् तःधंगु भ्रष्टाचार जूगु खँ धाःगु खः । वय्कलं सार्वजनिक यायेधुंकाः थ्व भिडियो भाइरल जुयाच्वंगु दु। ‘पुटिनया दरबार’ धकाः नां बियाः सार्वजनिक याःगु थ्व भिडियो म्हिगः तक १९ करोडं मल्याक स्वयेधुंकूगु दु। थ्व भिडियो सार्वजनिक जुइधुंकाः हे विपक्षी नेता नभाल्नियात जर्मनीं मस्को लिहां वःबलय् ज्वंगु खः । तर वय्कःयात ज्वंगु कारण थ्व भिडियो हे खः धकाः धाःसा धाःगु मदुनि । आः राष्ट्रपति पुटिनलिसे सतिम्ह अर्बपति ब्यापारी रुटन्बियर्गं थ्व दरवार थःगु खः धकाः सार्वजनिक रुपं न्ववानादीगु खः । क्रेम्लिन समर्थक म्यास टेलिग्राम च्यानलय् प्रसारण जूगु अन्तर्वार्ताय् रुटन्बियर्गं थ्व खँ धाःगु दु ।

रुटन्बियर्गं थ्व दरवार दयेकेगु ल्याः छुं दँ लिपा क्वचाइगु व अन अपार्टमेन्ट सहितया होटल चायेकेगु खँ धयादीगु खः । तर पुटिनया आलोचक नभाल्निया पुचलं लछिति न्ह्यः थ्व दरवारया भिडियो सार्वजनिक यासें उमिसं थन क्यासिनो लिसें अण्डरग्राउण्ड आइस हकी म्हितेगु थाय्, अंगूरया क्यब दुगु खँ धाःगु दु। उमिसं थ्व दरबार इतिहासया हे दकलय् तःधंगु घूस धकाः दावी यासें थ्व दरवार पुटिनया व्यक्तिगत प्रयोगया निंतिं हे दयेकूगु खँ धाःगु खः । तर पुटिनं थः वा थः परिवार सुयागुं स्वामित्वय् थुगु भवन मदुगु धासें उमिगु दावीयात अस्वीकार यानादीगु खः ।

सन् २०१२ य् नं बिबिसीं थ्व दरवारयात कयाः छगू समाचार दयेकूगु खः । उबलय् पुटिनया हे छम्ह व्यापारीसम्बन्धी सहयोगीया धापूयात उद्ढृत यासें पुटिनया व्यक्तिगत प्रयोजनया निंतिं थ्व भवन दयेकूगु समाचार दयेकूगु खः । तर उबलय् नं पुटिनया प्रवक्तां तुरुन्त हे थुकिया खण्डन याःगु खः ।