प्यंगू अर्ब बराबरया हकप्रद पिहांवइगु तयारी
येँ – थीथी च्यागू कम्पनीं स्वंगू अर्ब, ८३ करोड, २ लाख ७४ हजार ४५० तका बराबरया स्वंगू करोड ८३ लाख, २ हजार ७४४ कित्ता हकप्रद शेयर पिहां वयेत्यंगु दु । थुपिं कम्पनीतय्सं हकप्रद शेयर पितबीगु निंतिं धितोपत्र बोर्डय् निवेदन तयातयेधुंकूगु दु । आवश्यक प्रक्रिया पूवनेवं थुपिं कम्पनीतय्त हकप्रद शेयर बीगु खँ बोर्डं धाःगु दु ।
बोर्डय् आवेदन बियातःपिं मध्ये श्रीराम सुगर मिलं ८९ करोड ३ लाख ९४ हजार ९८१ तका बराबरया ८९ लाख, ३ हजार ९४९ कित्ता हकप्रद शेयर पितबीत्यंगु दु । उत्पादन क्षेत्रया थ्व कम्पनीं हकप्रद शेयर मीगु निंतिं सिद्धार्थ क्यापिटलयात विक्री प्रबन्धक नियुक्त यानातःगु दु । अथेहे मिथिला लघुवित्त वित्तीय संस्थां स्वंगू करोड ९८ लाख ८ हजार ९६९ तका बराबरया स्वंगू लाख २९ हजार ८८९ कित्ता हकप्रद शेयर पितबीत्यंगु दु ।
मिथिला लघुवित्तं काठमाडौं क्यापिटलयात विक्री प्रबन्धक तोके यानातःगु दु । माइक्रोफाइनान्स समूहया थ्व कम्पनीं निगू कित्ता बराबर छगू कित्ता हकप्रद शेयर बीत्यंगु खः । अथेहे बरुण जलविद्युत कम्पनीं १ बराबर १ कित्ता हकप्रद शेयर बीगु प्रस्ताव तयाः बोर्डय् आवेदन तयातःगु दु ।
थ्व कम्पनीं २५ करोड ५१ लाख १५ हजार तका बराबरया २५ लाख ५१ हजार ५०० कित्ता हकप्रद शेयर बीत्यंगु खः । थ्व कम्पनीं एनआइबिएल एस क्यापिटलयात विक्री प्रबन्धक नियुक्त यानातःगु दु । अथेहे नाडेप लघुवित्त वित्तीय संस्थां नं १ बराबर १ कित्ता हकप्रद शेयर बीगु निंतिं आवेदन बियातःगु दु ।
नाडेपं १६ करोड तका बराबरया १६ लाख कित्ता हकप्रद शेयर विक्री यायेत नविल इन्भेस्टमेन्ट बैंकिंग लिमिटेडयात विक्री प्रबन्धक तोके यानातःगु दु । वित्त समूहया सिर्जना फाइनान्सं १० बराबर ६ कित्ता हकप्रद शेयर पितबीगु तयारी याःगु दु । थ्व कम्पनीं २४ करोड ४ लाख ८ हजार तका बराबरया २४ लाख ४ हजार ८० कित्ता हकप्रद शेयर पितबीत्यंगु खः ।
थुकिया निंतिं सनराइज क्यापिटलयात विक्री प्रबन्धक तोके यानातःगु दु ।बीमा कम्पनीपाखे एभरेस्ट इन्स्यारेन्सं नं १ बराबर १ कित्ता हकप्रद शेयर बीगु निंतिं बोर्डय् आवेदन बियातःगु दु । थ्व कम्पनीं १४ करोड ३ लाख ३२ हजार ५०० तका बराबरया १४ लाख ३ हजार ३२५ कित्ता हकप्रद शेयर पितबीत्यंगु खः ।
एभरेस्टं सिद्धार्थ क्यापिटलयात विक्री प्रबन्धक नियुक्त यानातःगु दु । जलविद्युत कम्पनीपाखे अपी पावर कम्पनीं १ बराबर २ कित्ता हकप्रद शेयर बीगु निंतिं तयारी यानाच्वंगु दु । थ्व कम्पनी निगू अर्ब १० करोड तका बराबरया २ करोड १० लाख कित्ता हकप्रद शेयर पितबीत्यंगु खः । अपीं नं सिद्धार्थ क्यापिटलयात विक्री प्रबन्धक तोके यानातःगु दु ।
अपीं ताःई न्ह्यव निसें हकप्रद पितबीगु तयारी यानाच्वंगु खःसां आःतक स्वीकृतिया निंतिं बोर्डय् छुं निवेदन धाःसा मबिउनिगु खँ धाःगु दु ।
माइक्रोफाइनान्स समूहया उन्नति माइक्रोफाइनान्स कम्पनीं ५ बराबर १ कित्ता हकप्रद शेयर बीत स्वीकृतिया निंतिं बोर्डय् आवेदन बिउगु दु ।
उन्नतिं १ करोड १० लाख तका बराबरया १ लाख १० हजार कित्ता हकप्रद शेयर पितबीत्यंगु खः । थ्व कम्पनीं सिद्धार्थ क्यापिटलयात विक्री प्रबन्धक नियुक्त यानातःगु दु । अथेहे बोर्डं थीथी स्वंगू कम्पनीया १६ करोड ९० लाख २५ हजार तका बराबरया १६ लाख ९० हजार २५० कित्ता हकप्रद शेयर पित बीत स्वीकृति बीधुंकूगु दु ।
चालु आर्थिक दँय् आःतक बोर्डं हकप्रदया निंतिं स्वीकृति काःपिं स्वदेशी लघुवित्त वित्तीय संस्था, माहुली सामुदायिक लघुवित्त वित्तीय संस्था, किसान माइक्रोफाइनान्स वित्तीय संस्था खः ।
LEAVE YOUR COMMENTS