टोस्टमास्टर्स डिभिजन सम्मेलन क्वचाल

येँ – नेपालय् टोस्टमास्टर्सया गतिविधि अप्वया वनाच्वंगु झ्वलय् वंगु शनिवाः न्हापांगु डिभिजन सम्मेलन जूगु दु । सम्मेलनय् नेपालय् थौंकन्हय् न्ह्यानाच्वंगु झिंप्यंगू टोस्टमास्टर्स क्लबया २५० म्ह दुजःतय्सं ब्वति काःगु खः । सम्मेलनया झ्वलय् टोस्टमास्टर्स नेपाःया निंतिं आधिकारिक वेबसाइट नं उलेज्या याःगु खः ।

ज्याझ्वलय् भारतया बैंग्लोरया लोकंह्वाःम्ह टोस्टमास्टर डा. राजदीप मानववानीं मू टिप्पणी यानादीगु खःसा टेक सेसन नं संचालन यानादीगु खः । अथेहे ज्याझ्वलय् डा. स्वर्णिम वाग्लेयात कम्युनिकेशन अवार्ड नं लःल्हाःगु खः । अथेहे ‘मिस्तय् पुस्तैनी नेतृत्व’ विषयय् छगू प्यानल डिस्कसन नं जूगु खः ।

थुकी चाँदनी जोशी, रितु सिंह वैद्य व सुमना श्रेष्ठ प्यानलिस्ट कथं दुथ्याःगु खः ।अथेहे नेपाःया डिभिजन ए टोस्टमास्टर्स दथुइ जूगु प्रतिस्पर्धाय् भाषण मूल्यांकनय् असिरा खनाल न्हाप लातसा हास्य भाषणय् रुजल लाल जोशी न्हाप लाःगु दु ।

थुपिं निम्हं प्रतिस्पर्धीत आः सन् २०१९ या मे महिनाय् कोलकत्ताय् जूगु च्वय्या स्तरया प्रतिस्पर्धाय् ब्वति कायेत वनीगु जूगु दु ।सम्मेलनय् नेपाःया न्हापांम्ह वेंट्रिलोक्विस्ट व लोकंह्वाःम्ह स्टाय्ण्ड अप कमेडियन टोस्टमास्टर सिमा गोल्छां नं थःगु प्रस्तुति न्ह्यब्वःगु खः ।