नाकाबन्दीइ नं पाइपलाइनं चिकं वइला ?
येँ – प्रधानमन्त्री केपी ओली व वय्कःया भारतीय समकक्षी नरेन्द्र मोदीं उलेज्या यानाः भारतपाखें पाइपलाइनं पेट्रोलियम पदार्थ वयेगु सुरु जुइधुंकाः आः थ्व पाइपलाइनं नाकाबन्दीबलय् नं चिकं वइ ला धयागु न्ह्यसः सुरु जूगु दु ।
प्यदँ न्ह्यव मोदी हे प्रधानमन्त्री जुयाच्वंगु इलय् भारतं अघोषित नाकाबन्दी तयाः नेपालय् चिकं छ्वया महःगु खः । नेपाःया संविधान जारी जुइवं तम्वःम्ह मोदीं अघोषित रुपं नाकाबन्दी तयाबिउगु खः । आः हाकनं नेपाः व भारत दथुइ थज्याःगु तनाव जुल धाःसा थ्व पाइपलाइन चिकं आपूर्ति जुइ कि जुइ मखु धयागु चिउताः सुरु जूगु खः ।
यक्वसिनं आः झन भारतं नाकाबन्दी यायेमाल धाःसा छगू स्वीच जक तिउसां गाःगु टिप्पणी यानाच्वंगु दु । थ्व पाइपलाइनया उलेज्या याःबलय् ओली व मोदीं थःथःगु देशं स्वीच जक तियाः हे पेट्रोल निर्यात व आयात याःगु खः ।
थ्व पाइपलाइनयात कयाः नेपाः व भारत दथुइ बिस्कं हे छुं सम्झौता जूगु मदु । उकिं नं भारतं चाहे जुल धाःसा गुगुं नं इलय् बन्द यायेफुगु चर्चा जुयाच्वंगु दु । नेपाल आयल निगम व उद्योग वाणिज्य तथा आपूर्ति मन्त्रालयं पाइपलाइनयात कयाः बिस्कं हे छुं सम्झौता मजूगु खँ धाःगु दु ।
नेपालं सन् १९७४य् भारतीय आयल निगम लिसे जूगु सम्झौता कथं चिकं आपूर्ति याना वयाच्वंगु खः । आः पाइपलाइन वयेधुंकाः नं नेपाल आयल निगम व भारतीय आयल निगम दथुइ जूगु उगु ‘जनरल सप्लाइमेन्ट एग्रीमेन्ट’ कथं हे पाइपलाइनं चिकं वयाच्वंगु खः । थ्व सम्झौताया नियम कथं हरेक न्यादँ छक्वः सम्झौता नवीकरण जुइमाः ।
मेखे उद्योग वाणिज्य तथा आपूर्ति मन्त्रालयया सहसचिव नवराज ढकालं उगु सम्झौताय् निगू देय् दथुइ न्ह्याथें ज्याःगु परिस्थिति वःसां आपूर्ति मपनीगु न्ह्यथनातःगु खँ धयादीगु दु । वय्कःया कथं थ्व सम्झौता निगू व्यापारिक संस्था दथुइ जूगु खःसां चिकं नेपाःया राण्नीतिक खँ जूगुलिं निगू देय् दथुइ न्ह्यागु परिस्थिति वःसां आपूर्ति मपनीगु खँ नं दुथ्याकातःगु खः ।
नेपाल आयल निगमया अधिकारीतय्सं नं निगू देय्या आयल निगम दथुइ जूगु सम्झौता कथं आकस्मिक परिस्थितिइ नं चिकं आपूर्ति दिकीमखु धाःगु दु । निगमं पाइपलाइनपाखें जुइगु ढुवानी खर्च सम्बन्धय् धाःसा नेपाः व भारत दथुइ बिस्कं हे सम्झौता जूगु खँ धाःगु दु ।
निगू आयल निगमय् दथुइ आपूर्ति मदिकेगु सम्झौता दुसां प्यदँ न्ह्यव भारतं चिकं पनाबिउगु खः । उबलय् भारतं आपूर्ति दिकागु मधासे सीमा नाकाय् समस्या दुगु धासें चिकं छ्वयामहःगु खः । उबलय् भारतीय आयल निगमं ‘भारतीय सरकारं जिमित चिकं छ्वयेगु दिकी धाःगु मदु, चिकं छ्वयाहयेगु बिरगञ्जया सीमा नाकाय् अवरोध दुगुलिं चिकं
छ्वया हयेमफुगु खः’ धायेगु याःगु खः ।
LEAVE YOUR COMMENTS