सवारीसाधनया बीमा शुल्क अप्वइगु

येँ – सवारी साधनय् पुलेगु बीमा शुल्क अप्वइगु जूगु दु । बीमा शुल्क अप्वयेकेगु निंतिं बीमा समितिं तयारी यानाच्वंगु खँ धाःगु दु ।
सरकारं यात्रु व तेस्रो पक्ष बीमा झिगू लाख थ्यंकेत व गम्भीर प्रकृतिया विरामीया उपचारया निंतिं १५ लाख तकया बीमा यायेगु व्यवस्था यायेत समितियात निर्देशन बिइवं समितिं आः बीमा शुल्क अप्वयेकेगु सम्बन्धी तयारी सुरु याःगु खः ।

थुकिया निंतिं समितिं निर्जिवन बीमा कम्पनीतय् पाखें मोटर बीमा अन्तर्गत बीमा शुल्क आम्दानी, दावी भुक्तानी आदि बारे तथ्यांक मुंकेगु सुरु याःगु दु । अथेहे शुल्क अप्वयेकेगु निंतिं बीमा कम्पनी व समिति दथुइ प्रारम्भिक सहलह नं जूगु दु ।

बीमा समितिया अध्यक्ष चिरञ्जिवी चापागाईं नं सरकारं यात्रु व तेस्रो पक्ष बीमा सुरक्षा रकम निदुगं अप्वयेकेत व छ्यनय् जुइगु घाःपाः, इस्पाइनल इन्जुरी थेंज्याःपिं विरामी उपचारया निंतिं १५ लाख तकया बीमा जुइगु व्यवस्था यायेत निर्देशन बिउगुलिं शुल्क नं अप्वयेकेगु तयारी जूगु खँ धयादीगु दु ।

‘सरकारं यात्रु व तेस्रो पक्ष बीमा सुरक्षा रकम निदुगं अप्वयेकेत व छ्यनय् जुइगु घाःपाः, इस्पाइनल इन्जुरी थेंज्याःपिं विरामी उपचारया निंतिं १५ लाख तकया बीमा जुइगु व्यवस्था यायेत निर्देशन बिउगुलिं शुल्क नं अप्वयेकेगु तयारी जूगु खः’

थौंकन्हय् तेस्रो पक्ष बीमा न्यागू लाख तकाया जक दु । अथेहे मुलय् च्वनाः वनीपिं मस्तय् बीमाः २ लाख ५० हजार तका जक दु । यातायात व्यवस्था विभागं बीमा रकमय् थज्याःगु फरक मजुइक सकलें यात्रुतय् बीमा समान यायेत नं निर्देशन बियातःगु दु । समितिं थ्व हे जेठ महिना दुने हे मोटरबीमा सम्बन्धी निर्देशिका संशोधन जुइफइगु खँ धाःगु दु ।

मेखे सरकारं यात्रुतय् उपचारय् अप्वः ध्यबा खर्च यायेमाली गुजुइवं जोखिम अप्वइगु खँय् बीमा कम्पनीतय्सं चिन्ता प्वंकूगु दु । युनाइटेड इन्स्यारेन्सया कायमुकायम प्रमुख कार्यकारी अधिकृत रमेश भट्टराइ नं उपचार खर्च छक्वलं झिंन्यागू लाख बीमालीबलय् बीमा कम्पनीतय् जोखिम तसकं अप्वइगु खँ धयादीगु दु ।

थ्वयां न्ह्यः बीमा कम्पनीं विरामीतय् उपचारया निंतिं अप्वलय् निगू लाख जक बिया वयाच्वंगु खः । मेखे गुलिसिनं धाःसा बीमा रकम अप्वइगुलिं बजाः विस्तार यायेत अःपुइगु खँ धयाच्वंगु दु । नेपाल बीमक संघया अध्यक्ष दीपप्रकाश पाण्डें छुं नं दुर्घटनाय् लात धाःसा बीमा पाखें राहत चूलाइगु जूगुलिं बीमा बारे बांलाःगु सन्देश वनाः बजार विस्तार यायेगु ह्वःताः वइगु खँ धयादीगु दु ।

 

सम्बन्धित बुखँ

LEAVE YOUR COMMENTS