लुँयागु भाः निगू लाख जःखः थ्यनीगु अनुमान

येँ (नेपालभाषा टाइम्स)÷वंगु छुं ई न्ह्यवंनिसें थहां कुहां जुयाच्वंगु लुँयागु भाः म्हिगः हानं छक्वलं तोलां ७०० तका थहां वंगु दु । यदि विश्व बजारय् लुँयागु भाः थ्वहे रफ्तारं थहां वनाच्वन धाःसा आः याकनं हे लुँया भाः तोलां निगू लाख जःखः थ्यने फइगु खँ विश्लेषकतय्सं धयाहःगु दु ।

म्हीग तक तोलां १ लाख ४ हजार ५०० तका थ्यंगु लुँया भाः म्हिगः हानं थहां वनाः तोलां १ लाख ५ हजार २०० तका थ्यंगु खः । म्हीगःा तुलनाय् म्हिगः छक्वलं ७०० तका थहां वंगु खः ।
सिंगापुरया बजार विश्लेषकतय्सं धाः कथं लुँयागु भाः यदि थ्वहे गतिं थहां वनाच्वन धाःसा सन् २०२३ दुने हे लुँयागु भाः तोलां निगू लाख जःखः थ्यने फइगु सम्भावना दु ।

उमिगु अनुमान कथं सन् २०२३ दुने हे अन्तर्राष्ट्रिय बजारय् लुँयागु भाः प्रति औंस ४,००० डलर थ्यनेफु । थौंकन्हय् थ्व भाः प्रति औंस १,९३० डलर थ्यनाच्वंगु दु । थौंकन्हय्या डलरया भाः कथं थ्व धइगु नेपाली ध्यबा कथं तोलां १ लाख ९५ हजार तका जू वइ ।

सिंगापुरय् मू ज्याकू दुगु स्वीस एसिया क्यापिटलया प्रवन्ध निर्देशक यर्ग काइनरं थ्व अनुमान याःगु खः ।

मेखे भारतीय विश्लेषकतय्सं नं लुँयागु आः याकनं हे थहां वनाः तोलां १ लाख १६ हजार तका थ्यनीगु अनुमान याःगु दु । विश्वन्यंकं हे लुँयागु भाः थहां वनीगु अनुमान जुयाच्वंगु दु ।

सम्बन्धित बुखँ

LEAVE YOUR COMMENTS