भिंगु लँपु ज्वने गबलें लिबाइ मखु

मनूया स्वभाव । सदां थःगु फाइदा स्वइ । व्यापारीं जक मखु । छेँय् नं मांबौपाखें फाइदा कायेगु स्वइ । दाजु व किजाया दथुइ लबः व घाटाया खँ जुइ । गुलिं छतका फाइदाय् सुम्क च्वनी । गुलिं द्वलंद्वः लखौं लखया फाइदा दइगु लँय् ब्वाँय् जुइ । फाइदा वा लबः कायेगु तरिका बिस्कं बिस्कं जुइ । गुम्हेसिनं झंगः लानाः लबः काइ ।

गुलिसिनं मखुगु खँ ल्हानाः लबः काइ । अझ गुलिसिनं ला लबः काल धइगु हे वाः मचायेकं लबः नयाच्वनीपिं नं दु । बुद्धकालया खुज्जुत्तरां नं थथे हे यात । खुज्जुत्तरा लानि सामावतीया भ्वातिं खः । जुजु उदयनं थः लानि सामावतीयात अतिकं मतिना याः । जुजुं लानिया लागिं खुज्जुत्तरायात गू कर्षापणया स्वां न्याके छ्वल ।

खुज्जुत्तरां न्ह्याबलें प्यंगू कर्षापणया स्वां जक न्याना हइगु । प्यंगू कर्षापण थम्हं लबः काइगु ।खुज्जुत्तरा सदां सुमन माली (गथु)या थाय् स्वां न्याः वनीगु । सुमन तथागत बुद्धया उपासक । उकिं वसपोलया उपदेश न्यनीम्ह । तथागत नापं संघयात भोजन नं नियन्त्रण याइम्ह । छन्हु तथागत नापं भिक्षु संघयात सुमनं भोजन निमन्त्रणा यात ।

खुज्जुत्तरां स्वां न्याः वल । थुगु इलय् सुमन तथागतयात भोजनया ज्याय् लिमलाः । उकिं व पियाच्वने माल । अन तथागतं उपदेश बियाबिज्यात । खुज्जुत्तरा नं छथाय् फ्यतुनाः वसपोलया उपदेश न्यन । उपदेश न्यँन्यं वं ज्ञान लाभ यात । अन हे स्रोतापन्न नं जुल । उगु दिनय् वं च्यागू कर्षापणया हे स्वां न्याना यंकल ।

खय्त ला सकसितं कुशल हे यइ । कुशल कर्म हे यायेमास्ति वइ । कुशल भाःपियाः न्हियान्हिथं अकुशल कर्म याना नं च्वनेफु । अकुशल ज्या व अकुशल ज्याया विपाक मथुयाः नं थुकी निरन्तरता बिया च्वनेफु । थुकथं अकुशल ज्याखँ जुयाच्वन धाःसा कुशल मार्ग क्यना बीमाः । थुकिं यानाः व नापनापं वया जःखः सकलें सत्मार्गय् न्ह्याये फइ ।

न्हापा स्वयां यक्व स्वां ! थ्व खनाः लानि अजू चाल । खुज्जुत्तरां थम्हं न्हापा यानागु अकुशल खँ कन । तथागतया उपदेश न्यनाः थःगु मिखा चाःगु खँ नं न्ह्यथन । थ्व दक्व खँ न्यनाः लानि तसकं लय्ताल । लानियात नं तथागतया उपदेश न्यने मास्ति वल । लानि जूगुलिं उखेंथुखें जुइ मजिल । उकिं खुज्जुत्तरायात न्हियान्हिथं तथागतयात उपदेश न्यंके छ्वत ।

खुज्जुत्तरां तथागतयाथाय् उपदेश न्यना वइगु । थम्हं उपदेश न्यं थें लानियात कनीगु । थुकिं यानाः लानि तथागतया न्ह्यःने वनेम्वाःल । अय्नं वसपोलया उपदेश न्यने खन । उकिं लानिं खुज्जुत्तरायात गुरुया दर्जा बिल । गुरु सरह सम्मान यात । खुज्जुत्तरां नं न्ह्याबलें च्यागू कर्षापणया स्वां न्याना हयेगु यात । थुकथं लानि नापं वया पासापिंसं नं तथागतया उपदेश न्यने खन ।

खुज्जुत्तरां थः नापनापं इमित नं सत्मार्ग क्यना बिल । खुज्जुत्तरां दँदँ तक अकुशल कर्म यात । चायेकं मचायेकं थःगु भौतिक सुखभोग स्वल । न्हियान्हिथं प्यंगू प्यंगू कर्षापणया लबः काल । थः जुजु व लानियात झंगः लात । उकी सन्तुष्ट जुया च्वन । तर जब वं तथागतया उपदेश न्यन, थम्हं पलाः द्वंकाच्वनागु वाः चायेकल ।

थन खुज्जुत्तरां सत्मार्ग मसियाः अकुशल कर्म यात । खय्त ला सकसितं कुशल हे यइ । कुशल कर्म हे यायेमास्ति वइ । कुशल भाःपियाः न्हियान्हिथं अकुशल कर्म याना नं च्वनेफु । अकुशल ज्या व अकुशल ज्याया विपाक मथुयाः नं थुकी निरन्तरता बिया च्वनेफु । थुकथं अकुशल ज्याखँ जुयाच्वन धाःसा कुशल मार्ग क्यना बीमाः ।

थुकिं यानाः व नापनापं वया जःखः सकलें सत्मार्गय् न्ह्याये फइ । सम्मानित जुइत उच्च दर्जाया जुइमाः धइगु नं मदु । सुनां कुशल कर्म याइ । सु ज्ञानीगुणी जुइ । व हे सम्मानित जुइ । लानि सामावती दकलय् च्वय्या दर्जायाम्ह । खुज्जुत्तरा वया भ्वातिं । अय्नं सामावतीं खुज्जुत्तरायात गुरुया दर्जाय् तल । खुज्जुत्तरां कंगु खँ दुनुगलंनिसें नाला काल ।

लानिं जक मखु लानिया पासापिं व सेविकापिंसं नापं खुज्जुत्तरायात च्वय्या दर्जाय् तल । रुप रंग स्वयां स्वभाव हे उच्च धइगु खँ नं खुज्जुत्तराया जीवनीं क्यं । खुज्जुत्तरा छम्ह भ्वातिं जक मखु, लंगडा खुत्यां खुत्यां कयाः जुइम्ह । न्हापा वया स्वभाव बांलाः मजू । तर जब बुद्धया शरणय् वल वया स्वभावय् हिउपाः वल ।

थुकिं यानाः वं लानि नापं मेपिंत नं सत्मार्ग क्यना बीफत । वया रुपय् ला हिउपाः मवः । तर वया स्वभावय् वःगु हिउपालं व सम्मानित जुल । सकसिनं वयात हनाबना तल । झीगु समाजय् सुनानं छुं खुया काइ, वयात सदां खुँया दर्जाय् तया तइ । वया जीवंकाछि खुँया छाप लानाच्वनी । अझ वया सन्तानयात तकं खुँया सन्तान कथं नां बी ।

मांबौया अकुशल ज्याखँ कायम्ह्याय्या लिउलिउ तया बी । तर खुँ सदां खुँ हे जुयाच्वनी मखु । थ्व खँ खुज्जुत्तराया जीवनीं क्यं । खुज्जुत्तरा छम्ह खुनि खः । छम्ह झंगः खः, जुजु व लानियात अःपुक याउँक झंगः लानाच्वंम्ह । तर छन्हु वं थःगु अकुशल ज्या थुइकल । थुकिं यानाः छम्ह झंगः व खुनि नं स्रोतापन्न फल प्राप्त यात ।

भिंगु लँपु म्हसीकेत उखेंथुखें वनेमाः धइगु मदु । छथाय् च्वनाः नं भिंगु लँपु लुइकेफु । सत्मित्रया संगतं सदां भिंगु लँपु क्यना बी । लानि सामावतीयात नं थथे हे जुल । खुज्जुत्तरां सत्मार्ग म्हसिल । वं लानियात नं सत्मार्ग क्यना बिल ।खुज्जुत्तरां अकुशल कर्मयात निरन्तरता बियाच्वंगु जूसा पाप कर्मं वयात लित्तु लीगु खः ।

जुजु व लानिं वया अकुशल कर्म सिउसा वयात दण्ड बीगु जुइ । तर खुज्जुत्तरा दण्डपाखें तापात । पाप कर्मं मुक्त जुल । वं थःगु दोषयात लानिया न्ह्यःने नाला काल । आत्मआलोचना यात । थुकिं यानाः व पण्डित जुइ फत । सकसियां यःम्ह जुयाच्वने फत ।