कांग्रेसया संस्थापन पक्षयात इतर पक्षया पौ : ‘सर्वोच्चया फैसला मवयेकं छुं गतिविधि यायेमते’

येँ (नेपालभाषा टाइम्स) – नेपाली कांग्रेसया इतर पुचलं ग्वसाः ग्वःगु राष्ट्रिय भेला आयोजक समितिया संयोजक डा. शशांक कोइरालां पार्टीया १५ क्वःगु महाधिवेशन सम्बन्धी फुक्कं गतिविधि व दीर्घकालीन निर्णय दिकेत माग यासें पार्टी केन्द्रीय कार्यालय व निर्वाचन आयोगयात पौ च्वःगु दु । सर्वोच्च अदालतं पार्टीया वैधानिकता व नेतृत्वया विवादय् थ्व स्वयां न्ह्यः जूगु फैसलायात पुनरावलोकन यायेगु अनुमति बीवं डा. कोइरालां उगु इनाप यानादीगु खः ।

डा. कोइरालां म्हिगः निर्वाचन आयोगय् दर्ता याःगु पतिइ सर्वोच्च अदालतया पूर्ण इजलासं साउन २२ गते पार्टी सभापति शेरबहादुर देउवा व कार्यवाहक सभापति पूर्णबहादुर खड्काया पाखें दर्ता जूगु पुनरावलोकन निवेदनयात कयाः सुनुवाइ यासें मुद्दा हाकनं स्वयेत निर्देशन बिउगु खँ न्ह्यथँसें धयातःगु दु, ‘सम्मानित सर्वोच्च अदालतं उगु विवादित फैसलाय् गम्भीर कानुनी त्रुटि दुगु न्ह्यथँसें मुद्दायात शुरुनिसें हे पूर्ण रुपय् निरुपण यायेगु कथं निस्सा बिउगुलिं नेपाली कांग्रेसया वैधानिकता व तत्कालीन नेतृत्वया कानुनी हैसियत हाकनं गम्भीर रुपय् न्यायिक पुनरावलोकनया अवस्थाय् थ्यंगु दु । उकिं सर्वोच्चया फैसला मवयेकं छुं नं कथंया गतिविधि मयायेत इनाप याना ।’

इतर पक्षया नेता मिन विश्वकर्मां थःपिंसं महाधिवेशनया फुक्कं गतिविधि दिकेत निर्वाचन आयोग व पार्टी केन्द्रीय कार्यालयय् पौ दर्ता यानागु खँ धयादीगु दु ।

कोइरालां पार्टीया वइगु १५ क्वःगु महाधिवेशन वा विशेष महाधिवेशन सम्बन्धी गुगु नं सांगठनिक, प्राविधिक वा नीतिगत कार्यातालिका तत्कालया निंतिं स्थगित यायेत, अदालतया मेगुु फैसला मवःतले पार्टीया पाखें याइगु गुगुं नं दीर्घकालीन प्रभाव लाइगु नीतिगत, राजनीतिक, सांगठनिक वा आर्थिक निर्णय पूर्ण रुपं यथास्थितिइ तयेत धाःगु दु । कोइरालां उगु पौया बोधार्थ निर्वाचन आयोगयात नं छ्वयाः पार्टी दुनेया कानुनी व नीतिगत संक्रमणकालीन अवस्था बारे जानकारी याकूगु दु । पतिइ अदालतय् विचाराधीन मुद्दाय् लिच्वः लाइगु गुगुं नं कथंया गतिविधि मन्ह्याकेत इनाप यासें अदालतया अवहेलना वा कानुनी प्रतिकूलता ब्वलन धाःसा उकिया जिम्मेवारी सम्बद्ध पक्ष हे जुइगु व्यहोरा नं न्ह्यथनातःगु दु ।

थापा व कोइराला नापलात
थ्वहे झ्वलय् म्हिगः नेपाली कांग्रेस सभापति गगन थापा व नेता डा. शेखर कोइराला दथुइ नापलानाः खँल्हाबल्हा जूगु दु । डा. कोइरालाया विशालनगरस्थित सम्पर्क ज्याकुथिइ जूगु खँल्हाबल्हा पार्टी दुनेया आन्तरिक विवाद ज्यंकेगु विषयय् केन्द्रित जूगु खँ धाःगु दु । म्हिगः निम्ह नेतातय् दथुइ पार्टी दुने खनेदुगु लिपांगु सांगठनिक व नीतिगत विवादयात गुकथं ज्यंकेगु धयागु विषयय् सहलह जूगु खःसां सहमति धाःसा जुइ मफुगु खँ धाःगु दु ।

नेपाली कांग्रेस दुने वैधानिकता व नेतृत्वया विषययात कयाः कानुनी व राजनीतिक बहस जुयाच्वंगु इलय् सभापति थापा व नेता कोइराला दथुइ नापलायेगु ज्या जूगु खः । नापलायेगु झ्वलय् पार्टीयात छप्पँ याना यंकेगु बारे सहलह जूसां नं निष्कर्ष धाःसा पिहां मवःगु खँ धाःगु दु ।

नेपालभाषा टाइम्स

च्वमिया मेमेगु

• इन्फान्टिनोयात फिफां चीकेगु तःधंगु गल्ती जुइ : ट्रम्प
• ओली व दाहालया निर्देशन
• प्रधानमन्त्रीं सभामुखयात नं वास्ता मयाः
• ‘प्रधानमन्त्री शाहया भारत भ्रमण अनिश्चित हे तिनि’
• कोलम्बिायाय् तःधंगु भुखाचय् लानाः सीपिं १३२ म्ह थ्यन