तःधंगु लाभया लागिं चीधंगु लाभ त्वःतेमाः

त्रिरत्न मानन्धर “सद्धम्म कोविद”

जीवनय् छँं न छुं प्राप्त यायेत मनूत ब्वाँय् ब्वाँय् जुयाच्वनी । दकले न्हापां ला मदयेकं मगाःगु वस्तुत अर्थात आधारभूत आवश्यकताया रुपय् जुयाच्वंगु नयेगु, त्वनेगु, व च्वनेगु लागिं लिमलाकाच्वनी । आधारभूत आवश्यकता पूर्ति यायेगु मनूतय्गु लागिं बाध्यता नं खः । थ्व पूर्ति मयायेकं जीवनया गति न्ह्याः मवनीगु कारणं थुकियात प्राप्त यायेगु लागिं मनूततय्सं थीथी संघर्ष यानाच्वनी ।

तर आधारभूत वस्तु लाभ जुल धाःसां आः ला गात धयागु मदइगु जुयाच्वन । उगु धुंकाः मनूत मेमेगु लाभ प्राप्त यायेत निरन्तर लगे जुयाच्वनी । प्राप्त जूगु लाभ अझ अभिवृद्धि यायेगु लागिं कुतः यानाच्वनी । सामान्य नयेगु त्वनेगु बाहेक साःसाःगु नयेगु, त्वनेगु सामान्यकथं जक पुनाः मगानाः विभिन्न प्रकारया फेशनेवल लं फीगु अले सामान्य कथंया च्वनेगु छेँया पलेसा सुख सुविधा पूर्णगु बंगलाय् च्वनेगु अभिलाषां वयात हाकनं संघर्षया मैदानय् ब्वाकेगु यानाच्वनी ।

थुकथंया थीथी भौतिक वस्तुत परिपूर्ण जुल धाःसां नं वयात गात धयागु जुइ मखु । भौतिक वस्तुं लिपा वयात समाजय् प्रतिष्ठित जुइगु, यशकीर्ति बढे यायेगु चाहना ब्वलनाः उकिया प्राप्तिया लागि थीथी कथंया ज्याखँय् थःत पानाच्वनी । थःगु नां फैले जुइकेगु, समाजपाखें थः प्रसंंशित जुइकेगु महत्वाकांक्षा लहिनाः उकिया लागिं कुतः यानाच्वनी ।

थुकथं धन, मान, इज्जत, ऐश्वर्य आदि प्राप्त यायेगु लागि मनुखं सारा जीवन पानाच्वनी । थुगु चीहाकःगु जीवनय् मेपिनिगु धन, मान, इज्जत व ऐश्वर्य स्वयाः थम्हं नं उकियात प्राप्त यायेगु व मेपिं स्वयां कम मजू धकाः क्यनेगु अभिलाषाय् निरन्तर ब्वाँय् वनाच्वनी । थीथी कथंया लाभ प्राप्त यायेगु झ्वलय् जिउगुं मजिउगुं ज्या सीके मफयाः वा उकियात वास्ता मतसे त्यःगुं मत्यःगुं ज्याखँ यानाच्वनी ।

थुकथं लाभया पूर्तिया लागिं अकुशल कर्मय् प्रवृत जुयाः मभिंगु कर्म नं संग्रह जूवनीगु आपालं सम्भावना दयाच्वनी, गुकिं जीवनया अनन्त काल तकं दुःखया लिच्वः वइगु श्रोत बने जुयाच्वनी । भौतिक उन्नतिया लागि अमुल्यगु ई व्यतित यानाः शरीर जीर्ण जुयावनीगु अवस्थाय् थीथी कथंया ल्वचं कयेके माःगु परिस्थिति उत्पन्न जुइवं थम्हं जीवनभर आर्जन यानातःगु उगु भौतिक वस्तु, यशकीर्तिया निस्सारता, उकिं धात्थेंगु सुख व शान्ति प्राप्त मजुइगु तथ्य विस्तारं महसुस जुया वइगु जुयाच्वन ।

तर ई यक्व वनेधुंकीगु अवस्थाय् थम्हं छुं याये मफइगु जुयाच्वन । थुकथं समग्र कथं धायेगु खःसा मनूत जीवन पर्यन्त थःगु जीवन सुथांलाकेगु धकाः भौतिक उन्नति वा लाभया लागिं कुतः यानाच्वनी तर सुख व शान्ति थःगु पाखें झन झन तापानाच्वनी । भौतिक लाभया आशा यानाच्वंपिं मनूतय्सं यदि थःगु इच्छित लाभ प्राप्त मजुल धाःसा हीमी चायाच्वनी वा ‘फ्रस्टेशन’ व ‘डिप्रेसन’ य् वनाः मानसिक व शारीरिक ल्वचं कयेकाच्वनी ।

लाभ जूसांतबि उकिं गुगु सुखया परिकल्पना याःगु खः व प्राप्त जुइ मखुगुु व मेमेगु कथंया समस्यां वयात न्ह्याबलें असन्तोष यानां तुं च्वनी ।
थथे विभिन्नकथं संघर्ष यानाः लाभ जूगु धन सम्पत्ति नं नाना प्रकारं विनाश जूवनीगु, मुंकातःगु इज्जत, मान प्रतिष्ठा निग्ति खँया कारणं मदया वनीगु सम्भावना दयाच्वनीगु कारणं थज्याःगु सम्पत्तिपाखें पूर्ण तृप्ति प्राप्त मजुइगु खः ।

भौतिक सम्पत्तिं प्राप्त जुइगु धयागु अल्पलाभ जक खः । थुकिं वास्तविक शान्ति प्राप्त मजुइगु व व्यवस्थापन याये मफयेवं थुकिं झन दुःख व तनाव अप्वयेकाः जीवन अस्तव्यस्त याना बीगु आपालं सम्भावना दयाच्वनी ।

मेगु कथं धायेगु खःसा, सम्पत्ति, ऐश्वर्य धयागुपाखें अल्पसुख जक प्राप्त जुइगु परमसुख व शान्ति प्राप्त मजुइगु जुयाच्वन । भगवान बुद्धं थ्वहे कारणं भौतिक सुख धयागु मात्र अल्पकालीन सुख जक खः दीर्घकालीन मखु धयाबिज्यासें विपुल सुखया लागि मनूत प्रयासरत जुइमाः गुकिं जीवन यात तृप्ति याना बी धकाः कनाबिज्याःगु खः ।

धन, सम्पत्ति, मान, ऐश्वर्यपाखें प्राप्त जुइगु सुख धयागु अल्पसुख वा मत्ता वा मात्रा सुख जक खः धयाबिज्यासें अज्याःगु मात्रा सुखयात परित्याग यानाः तःधंगु वा विपुलगु सुख प्राप्त यायेमाःगु शिक्षा बियाबिज्याःगु ख ः । थ्व सन्दर्भय् भगवान बुद्धं धयाबिज्याःगु दु–
मत्तासुख परिच्चागा पस्सेचे विपुलं सुखं ।
चजे मत्ता सुखं धीरो, सम्पस्सं विपुलं सुखं ।।
अर्थात —
मात्रा सुख त्याग यानाः तःधंगु सुखयात स्वयेमाः अथवा तःधंगु सुखया लागिं चीधंगु सुख त्याग याये सयेकेमाः । धीर पुरुषपिंसं चीधंगु सुखय् प्यमपुंसे विपुल सुखया लागि प्रयत्नशील जुइ ।

विपुल सुख धकाः भगवान बुद्धं छुकियात धयाबिज्याःगु खः ले ? वसपोलया धापू अनुसार गुगु सुख दुःखय् परिणत जुइ मखु, छक्वः प्राप्त जुइव अनवरत रुपं कायम जुयाच्वनी वहे विपुल वा तःधंगु सुख खः । मेगु शब्दं धायेगु खःसा इन्द्रियया द्वारपाखें प्राप्त जुइगु सुख धयागु क्षणिक जक खः ।

मिखा, न्हाय्पं, न्हाय्, म्ये, शरीर व मनपाखें छसीकथं रुप, शब्द, गन्ध, रस, स्पर्श व कल्पनाय् रमण यानाः प्राप्त जुइगु सुख धयागु इन्द्रिय सुख जक खः । गुगु सुख दुने दुःख सुलाच्वनीगु जुयाच्वन । विपुल सुख धयागु इन्द्रियपाखें मखुसे इन्द्रियातित सुख खः । गुगु प्राप्त जुईव स्थायी शान्त प्राप्त जुइ ।

गुकियात आध्यात्मिक सुख धायेफु वा बुद्धया भासं धायेगु खःसा चित्त विसंस्कार जुयाः तृष्णा क्षय जुइवं प्राप्त जुइगु सुख खः । मेगु कथं धायेगु खःसा विपुल सुख धयागु चित्तयात विकार विहिन याये फयेवं प्राप्त जुइगु सुख खः । थुकियात हे परम सुख धाइगु ख ः ।
विपुल सुख प्राप्त यायेत मनुखं थःगु स्वभाव परिवर्तन यायेमाःगु आवश्यक जुयाच्वन ।

काय वचन व मनयात संयम यानाः, थीथी कथंया इन्द्रियया बशय् तमक्यनेगु, सन्तोष गुण विकास यायेगु, आवश्यकतायात फयांफक्व म्हो यानाः म्वायेगु, मनोविकारयात निर्मूल याना यंकेगु आदि चर्या यानाः जक थुगु विपुल सुख प्राप्त जुइगु जुयाच्वन । थुकथं भौतिक सम्पत्तिं प्राप्त जुइगु धयागु अल्पलाभ जक खः ।

थुकिं वास्तविक शान्ति प्राप्त मजुइगु व व्यवस्थापन याये मफयेवं थुकिं झन दुःख व तनाव अप्वयेकाः जीवन अस्तव्यस्त याना बीगु आपालं सम्भावना दयाच्वनी । थुगु वास्तविकता थुइकाः धात्थेंगु सुख व शान्ति प्राप्त यायेत माःगु सद्धर्मया अभ्यासयात जीवनया अंग दयेकेमाःगु आवश्यक जू गुकिं तःधंगु लाभ प्राप्त जुइ ।

भौतिक सम्पन्नताया लागि ब्वाँयब्वाँय् जुयाः प्राप्त जुइगु चीधंगु सुखय् जक प्यमपुंसे शान्तपूर्वक म्वाये फइगु आध्यात्मिक सुखया वा विपुल सुखया लागिं अप्वः ई बीमाःगु आवश्यक जू । थुगु बुद्धया बचनयात हृदयंगम यायेगु बाहेक धात्थेंगु सुख शान्तिया मेगु विकल्प दइ मखु ।

सम्बन्धित बुखँ

LEAVE YOUR COMMENTS