राजनीतिक भ्यालेन्टाइन डे

भ्यालेन्टाइन डे । प्रणय दिवस । प्रेम कालबिल यायेगु । विशेष दिवस । खतुं मतिना कालबिल यायेत भ्यालेन्टाइन डे हे पियाच्वने म्वाः । नुगलय् बुया वइगु मतिनाया आदान प्रदान न्ह्यागु इलय् नं याये फु । याये जिउ । थौंकन्हय् । समय, परिस्थिति गाक्कं पाये धुंकल । न्हापा न्हापाया ई थें संकोचया ई मखये धुंकल । ई खुल्ला जुया वइ । फुक्का । न्हापा न्हापा । भाजु मय्जुपिनि इहिपा जुइ । ब्याहा यानाः दँदँ तक नं इपिं परस्परय् खुल्ला जुइ फइमखु । जुइ दइमखु । इमिसं भ्यालेन्टाइन डेया सवाः काये दइमखु । पुलांपिं बुरितय्सं धाइ, ‘ जिमिसं ला ब्याहा यानाः निदँ लिपा तिनि भाजुया ख्वाः गय् च्वं खन ।’ थौंकन्हय् इलं मू पुले धुंकुल ।

ई गनया गन जुइ धुंकल । म्हिगः थें भाजु मय्जु प्रेम प्रदर्शन यायेत कात्तुमत्तु कायेम्वाः । धाइ ल्हाइया त्रासं ग्रस्त जुइ म्वाः । थःत यःबलय्, यःगु थासय्, यत्तले, यथे प्रेमक्रिडा यायेगु छुट दइ । धाथे धाये धाःसा प्रेम दिवस अर्थात भ्यालेन्टाइन डे धकाः विशेष न्हिं हना च्वनेमाःगु आवश्यकता हे मदु । थौंकन्हय् । स्वतन्त्र प्रेम वा विचारया ई । मनग्गे प्रेम याइपिंत न्ह्याबलें मौका दु । अवसर दइ । न्ह्यःने लिउने, जःखः । सुयां चिउताः तयेम्वाः । सुंलिसे ग्यायेम्वाः । न्हापा न्हपा थें । सुनां मखं थाय्, खिउँथाय्, ध्याकुंचाय् वनाः जक मतिना कालबिल यायेमाःगु ई मखये धुंकल । बा¥हमासे म्येँ धाःथें बा¥हमासे भ्यालेन्टाइन डेया चलन वये धुंकल ।

मतिना दिवस न्यायेकेत थौंकन्हय् खिउँथाय्, ध्याकुंचाय् वने म्वाः । सुनानं खनी धकाः ग्याये म्वाः । मछाले म्वाः । लँय् लँय्, बहाः बही, गल्ली गल्लीइ भ्यालेन्टाइन डे ईब्यः मदयेक न्यायेका च्वंपिं खने दइ । सामान्य जुइ । उकिं भ्यालेन्टाइन डे धकाः थ्व विशेष पर्व छाय् ! थ्व नाटक थें जक खनेदइ । खः । खिचातय् सा भ्यालेन्टाइन डेया निंतिं कात्तिक हे पीमाः । व इमि जैविक मजबुरी । तर मानव जातितय्त प्रकृतिं विशेष सुविधा बियातःगु दु । न्ह्याःपिंसं गुगुं इलय् नं भ्यालेन्टाइन डे न्यायेके फु । न्यायेके दु । भ्यालेन्टाइन डेया विशेष साइत पियाच्वनेमाःगु मदु ।

भ्यालेन्टाइन डे । छम्ह भाजुं छम्ह ल्यासे मय्जुलिसे मतिना यायेगु अवसर काइ । रसवस याइ । न्ह्यइपुकी । तापाक वनी । ख्याः याइ । विचाः ख्याःस दुनी । लिहां वइ । भाजुं मय्जुयाके न्यनी । ‘गय् च्वं ले भ्यालेन्टाइन डेया सवाः ? न्ह्यइपुल ला ?’ मय्जुया लिसः जुइ ‘न्ह्यइपुल । थज्याःगु सवाःला जिमि कःनि ब्वय् गुलि काये धुन, गुलि काये धुन ।’ प्रष्ट याइ । भ्यालेन्टाइन डे । आयातीत पर्व जक मखु खनी । भ्यालेन्टाइन डे पर्व नेपालय् नं छ्यापछ्याप्ती दु खनी । सामान्यतया । प्रेम आदान प्रदान मिसामिजं दथुइ जुइ । भ्यालेन्टाइन डेयात प्रेम दिवस धाइ । थन प्रेमया अर्थ व्यापक खंकीपिं नं दु ।

तर प्रणय दिवसयात मिसा, मिजं दथुइ दइगु लैंगिक प्रेमयात विशेष अर्थय् छ्यः । विशेष यानाः प्रेम, विवाह धायेबलय् मिसामिजंया खँ वइ । तर थौंकन्हय् लैंगिक विषययया दायरा चकने धुंकल । मिसा मिजंतय्सं जक मखु, समलिंगी, ट्रान्सजेन्डरतय्सं नं मतिना, इहिपाया अधिकार माला हये धुंकल । थौंकन्हय् इमिगु पहिचान, स्वापूयात वैध खंके धुंकल । मिसामिजंया दथुइ जक लिकुनाच्वंगु मतिना व इहिपाया संस्कार समलिंगी, ट्रान्सजेन्डर पुचलय् नं विस्तारित जुइ । भ्यालेन्टाइन डे उकिं आः भाजुमय्जुपिनि एकाधिकारया जक विषय जुइमखु । समलिंगी, ट्रान्सजेन्डरतय् नं थःगु हे कथंया मतिनाया पर्व जुइ थ्व ।थुकियात थःथःकथं इमिसं न्यायेकी । हनी । थौंकन्हय् राजनीतिइ नं भ्यालेन्टाइन डे नं थिया हइ ।

भाजुमय्जुपिनि दथुइ थें पार्टी पार्टी दथुइ नं लभ, डेटिङ खने दइ । श्रृंगारिक म्येँत थ्वइ । प्रेम पागलपन खने दइ । ‘जिपि निगुलिं छगू–सुनां फाइ जिमित ! जिपिं एक–अनन्तकाल तक ! प्रणय बन्धनय् लाःपिं पार्टीत बरबर याइ । न्ह्यलय् ला ज्वलय् ला । हाला हइ । चाःगु हे मखु । पार्टीतय्सं भ्यालेन्टाइन डे ला न्यायेकाच्वंगु दु । इहिपा गबलय् याइगु खः । लिभिङ टु–गेडर जक खःला ? म्यादी इहिपा जकं खःला ? थ्व पार्टी पार्टीतय् दथुइ जुइत्यंगु इहिपा भालेपोथीया इहिपा खःला ? वा समलिंगी ब्याहा ? वा ट्रान्सजेन्डरतय् इहिपा ? ब्याहा न्ह्यागु हे कथंया जूसां ठिक जू । कुंखिने मजिउ । कुंखिने दइमखु । तर छता खँ । समलिंगी ट्रान्सजेन्डर ज्वःतसें नं स्वीकार याइ । ‘जिमि मतिना, जिमि सन्तोषया लागि खः । वंश सृष्टिया लागि मखु ।’ निगू पार्टी दथुइ जुइत्यंगु इहिपा गुगु कित्ताय् खः, झी उत्सुक !