बैंकिङ्ग क्षेत्रय् विद्युतीय हस्ताक्षर
येँ – विद्युतीय माध्यमपाखें जुइगु कारोवारयात सुरक्षित, विश्वसनी यायेत सरकारं ‘विद्युतीय हस्ताक्षर’ या ज्या तीव्रगतिं न्ह्याका यंकूगु दु ।सरकारी व निजी ज्याकुथिइ तकं विद्युतीय हस्ताक्ष्ँरयात न्ह्याकेत संचार तथा सूचना प्रविधि मन्त्रालय, प्रमाणीकरण नियन्त्रणया कार्यालयं बैंकिङ्ग क्षेत्रलिसे सरोकारवालालिसे सहलह ब्याकूगु दु ।
विद्युतीय हस्ताक्षरं मान्यता चूलाःगु भ्वं छ्वयेगु, भ्वं काइम्ह मनूया पहिचान जुइगु व छ्वःम्ह मनुखं छ्वःगु मदु, छ्वयागु मखु धकाः अस्वीकार याये मफइगु व भ्वं छ्वःगु÷चूलाकूगु विषयवस्तुइ अखण्डता कायम याइ ।
प्रधानमन्त्री तथा मन्त्रिपरिषद्या ज्याकू, नेपाल नागरिक उड्डय प्राधिकरणलगायत झिंनिगू ज्याकुथिइ आः नं विद्युतीय हस्ताक्षर प्रणाली परीक्षण जुयाच्वंगु
प्रधानमन्त्री तथा मन्त्रिपरिषद्या ज्याकू, नेपाल नागरिक उड्डय प्राधिकरण, आन्तरिक राजश्व विभाग, वैदेशिक रोजगा विभाग, निजामति किताबखाना, कर्मचारी संचयकोष, लोकसेवा आयोग व उद्योग विभागलगायत झिंनिगू ज्याकुथिइ आः नं विद्युतीय हस्ताक्षर प्रणाली परीक्षण जुयाच्वंगु खँ उगु ज्याकूया नियन्त्रक व उपसचिव दीपककुमार श्रेष्ठं धयादीगु दु ।
विद्युतीय हस्ताक्षर छ्यलाः बैंकं बिइगु त्यासा प्रक्रियायात भ्वंरहित दयेकेगु लिसें ज्या याकनं पूवंकेफइगु खँ नियन्त्रक श्रेष्ठं धयादीगु दु । सरकारी निकायया इगर्भमेन्ट एप्लिकेशनत क्रमसः विद्युतीय हस्ताक्षर लागू यायेगु, ई कमर्स व वित्तीय क्षेत्रय् विद्युतीय हस्ताक्षरया छ्यलीपिंत बढुवा यायेगु नियन्त्रण कार्यालयया भावी कार्यदिशा दु ।
संचार मन्त्रालयया सचिव महेन्द्रमान गुरुङ्गं भ्वंरहित सरकारी ज्याकू दयेकेगु सरकारया योजना कथं विद्युतीय हस्ताक्षर फुक्क ख्यलय् लागू यानायंकेगु तयारी जुयाच्वंगु खँ कनादिल ।
LEAVE YOUR COMMENTS