लुँया भावय् न्हूगु कीर्तिमान

दिलिप शाही

येँ-लुँ वहः बजारय् लुँ भावं हानं न्हूगु रेकर्ड कायम याःगु दु । म्हिगः लुँ तोलां न्यासः तका थहां वनाः न्हूगु रेकर्ड तःगु खः । म्हिगः लुँया भाः १ लाख १७ हजार ४०० तका थ्यंगु खः । थ्व स्वयां न्ह्यः लुँया भावं १ लाख १७ हजार तकाया रेकर्ड तयातःगु खः । उकथं हे वहःया भाः नं थहां वनाः १५०० तका थ्यनाः न्हूगु रेकर्ड कायम जूगु दु । थ्व स्वयां न्ह्यः १४९५ तका तक थ्यनाच्वंगु खः ।

लुँया भाः थहां वंगु कारण धाःसा मध्यपूर्वय् जुयाच्वंगु इजरायल व हमासया युद्ध खः । नेपाल सुनचाँदी व्यवसायी महासंघया पुलांम्ह नायः लिसे बजाः विश्लेषक तेजरत्न शाक्यया कथं अन्तर्राष्ट्रिय रुपं मुद्रास्फीति अप्वया वनाच्वंगुलिं लुँइ लगानी याइपिं अप्वयेवं लुँया भाः थहां वंगु खः । उकथं हे चिनियाँ बैंकतय्सं थःगु रिजर्भ अप्वयेकेत लुँइ लगानी याःगुलिं नं लुँया भाः थहां वंगु खः । म्हिगः जक चिनियाँ बैंकतय्सं १७.६ टन लुँ न्यानाः रिजर्भ याःगु खः, गुकिया लिच्वः बजारय् लाःगु दु ।

उकथं हे अमेरिकी फेडरल बैंकं ब्याजदर थमकायेगु नीति ज्वंगुलिं नं लुँइ लगानी अप्वयाः भाः थहां वंगु खः । अमेरिकी बैंकं ५ प्रतिशत ब्याज बियाच्वंगु दु । म्हीग अन्तर्राष्ट्रिय बजारय् लुँ प्रति औंश २००३ डलर थ्यनाच्वंगु खःसा म्हिगः २०१० डलर थ्यंगु खः ।

अन्तर्राष्ट्रिय रुपं लुँया भाः थहां वनेगु जक मखुसें डलर नं मजबूत जुयाच्वंगु दु । अमेरिकी डलर थहां वनाः १३३.७० पैसा कायम जुयाच्वंगु दु । अमेरिकी डलरया नं भाः थहां वनाः न्हूगु रेकर्ड कायम जूगु दु । डलर थहां वनाच्वंगु इलय् लुँया भाः कुहां वयेमाःगु खःसां नं लुँइ लगानीकर्ताया आकर्षण अप्वया वनाच्वंगुलिं लुँया भाः कुहां मवःगु खँ नं विश्लेषक शाक्यं कनादीगु दु ।

थ्वहे झ्वलय् लुँया भाः थहां वनाः २१०० डलर कायम जुइ फइगु विश्लेषण नं अन्तर्राष्ट्रिय बजारय् जुयाच्वंगु दु । लुँया भाः प्रति औंश २१०० डलर थ्यन धाःसा नेपालय् लुँ तोलां १ लाख २२ हजारंनिसें १ लाख २५ हजार तक थ्यने फइगु खँ नं विश्लेषक शाक्यं कनादिल । थ्व स्वयां न्ह्यः सन् २०२४ तकया दुने अन्तर्राष्ट्रिय बजारय् लुँ प्रतिऔश २१०० डलर कायम जुइगु अनुमान यानातःगु खः ।