चिनियाँ नाकाय् एसियालीस्तरया सतक

येँ – चिनियाँ नाका स्वाइगु स्वंगू सतक एसियाली मापदण्ड कथंया जुइगु जूगु दु । प्रधानमन्त्री केपी ओलीं चीन भ्रमणया झ्वलय् उत्तरी नाका स्वाइगु स्वंगू सडकयात बेल्ट एन्ड रोड इनिसियटिभ (बीआरआई) लय् समावेश यायेगु सहमति याःगु खः ।

नेपाः व चीन दथुइ कोशी करिडोर, कालिगण्डकी करिडोर व कर्णाली करिडोरयात बीआर–आईलय् समावेश यायेत्यंगु खः । थुगु सडक स्तरोन्नतिया निंतिं १ खर्ब ६ अर्ब तका तुइगु खँ धाःगु दु । स्वंगू सतकया मुक्कं लम्बाई १२३२ किलोमिटर जुइ । उगु सतक मध्ये आः कोशी करिडोरया २०० किलोमिटर, कर्णाली करिडोरया २८२ किलोमिटर व कालिगण्डकी करिडोरया ३५५ किलोमिटरय्थौंकन्हय् गाडी चले जुयाच्वंगु दु । सतक स्तरोन्नतिया निंतिं सुरुङ नं दयेकीगु योजना दु ।

सतक स्तरोन्नति जुइधुंकाः भारतं वइगु गाडी तकं अःपुक चीन तक व चीनं वइगु मालवाहक गाडी नं भारतय् वने फइ । कोशी करिडोरया रुपय् रानी–धनकुटा–किमाथाङ सतकया लम्बाई ३४ किलोमिटर दु । थुगु सतक २०० किलोमिटर जक दयेके ल्यं दनि । कर्णाली करिडोरया रुपय् दुगु ५२७ किलोमिटर ताःहाकःगु जमुना–सुर्खेत–हिल्सा सतक नं आः २८२ किलोमिटर जक दयेकेगु ल्यं दनि । कालिडगण्डकी करिडोरया रुपय् दुगु बेलहिया–बेनी–जोमसोम–कोरला सतकया लम्बाई ३५५ किलोमिटर दुसा थुगु सतकय् २१ अर्ब तका खर्च यानाः सुरुङ मार्ग समेत दुथ्याइगु खँ धाःगु दु ।