बोइङ्ग विमान समुद्रय् कुतुंवन

इन्डोनेसियाय् छगः यात्रुवाहक विमान समुद्रय् कुतुंवंगु दु । जाकार्ताया विमानस्थलं ब्वयावंगु इन्डोनेसियाया लायन एयरलाइन्सया विमान बोइङ्ग ७३७ ब्वःगु छुं ई लिपा हे समुद्रय् कुतुं वंगु दु । विमानय् १७८ म्ह वयस्क, छम्ह ह्याउँमचा व निम्ह मस्त यात्रु दुगुव निम्ह पाइलट व न्याम्ह परिचालकत दुगु खँ धाःगु दु ।

समुद्रय् कुतुं वंगु विमान सोमवाः सनिलय् तक लुइकेफुगु मदुनि । उद्धारकर्तातय्सं समुद्रड्ढ यात्रुतय् थीथी सामान लय्बुया वयाच्वंगु धाःसा लुइकूगु दु । विमानय् सवार सुयातं जीवित धाःसा उद्धार याःगु मदुनि ।उद्धारकर्तातय्सं यात्रुत सुं जीवित दु कि मदु धयागु धायेमफुगु खँ धाःगु दु । विमान समुद्रया ३०–४० मिटर क्वय् दुबिउवंगु अनुमान यानातःगु दु ।

विमान भारतीय क्याप्टेन भव्य सुनेजां ब्वयेका यंकूगु खः । दुर्घटनाय् लाःगु विमान न्हूगु मोडलया विमान जूगु खँ धाःगु दुसा विमान दुर्घटनाया कारण सीमदुनि धाःगु दु । विमान ब्वःगु छुं मिनेट लिपा हे विमानलिसे स्वापू त्वाःदःगु व लिपा समुद्रय् कुतुं वनाच्वंगु लुइकूगु खः ।

थ्व विमानय् स्थानीय ई कथं सुथय् ६ः२० बजे जाकार्ता विमानस्थलं पंगकाल पिनांगया निंतिं ब्वना वंगु खः । ब्वःगु १३ मिनेट लिपा स्वापू त्वाःदये न्ह्यः विमानया पाइलटं जकार्ताया सुकार्णो हट्टा एयरपोर्टय् लित हयेगु निंतिं अनुमति फ्वंगु खँ धाःगु दु ।

सम्बन्धित बुखँ

LEAVE YOUR COMMENTS