बार्यन म्युनिख व लिभरपुल त्यात

एजेन्सी- च्याम्पियन्स लिगय् जर्मन क्लब बार्यन म्युनिख व इंग्लिस क्लब लिभरपुल त्याःगु दु । समूह चरण अन्तर्गत जूगु कासाय् बार्यनं बार्सिलोना व लिभरपुलं आयाक्सयात बुकूगु खः ।

बार्यन म्युनिखं बार्सिलोनायात २–० गोलं बुकूगु खः । बार्यन म्युनिखया घरेलु मैदानय् जूगु कासाय् बार्यनया निंतिं लुकास हर्नान्डेज व लोरी सानें गोल याःगु खः । कासाया निगूगु हाफया ५० औं मिनेटय् हर्नान्डेजं गोल यानाः बार्यनयात अग्रता बिउगु खःसा वयां प्यंगू मिनेट लिपा कासाया ५४ आंै मिनेटय् सानें मेगु गोल याःगु खः । बार्यन पुचःया शीर्ष थासय् दु । पराजित बार्सिलोना निगूगु थासय् दु ।

थ्व हे पुचःया मेगु कासाय् इटालियन क्लब इन्टर मिलानं चेक क्लब भिक्टोरिया प्लेजेनयात २–० गोलं बुकल । इन्टर मिलानया निंतिं जेको व डेन्जेल डमफ्रेज छगू छगू गोल याःगु खः । इन्टर मिलान पुचःया स्वंगू थासय् दु ।

च्याम्पियन्स लिगया मेगु कासाय् लिभरपुलं डच क्लब आयक्सयात बुकूगु दु । घरेलु मैदानय् जूगु कासाय् लिभरपुलं आयक्सयात २–१ गोलं बुकूगु खः । कासाय् लिभरपुलया निंतिं मोहम्मद सलाह व जोएल माटिपं छगू छगू गोल याःगु खः । आयाक्सया निंतिं मोहमद कुडुसं छगू गोल याःगु खः ।

च्याम्पियन्स लिगया मेगु कासाय् बायर लेभरकुजनं एटलेटिको म्याड्रिडयात २–० गोलं, क्लब ब्रुग्सं एफसी पोर्टोयात ४–० गोलं व फ्रायन्कफर्टं मार्सेयात १–० गोलं बुकल ।