सरकारया असफलताया न्हाय्कं

चुनावया इलय् सत्तारुढ पार्टीया चुनावी नारा खः ‘देय्यात समृद्धि यायेगु, जनतायात सुखी दयेकेगु ।’ तर वर्तमान सरकार नीस्वंगु इलंनिसें सरकारया गतिविधियात स्वयेगु खःसा भ्रष्टाचारयात संस्थागत यायेगु व थः आसेपासेयात थीथीकथंया ठेक्कापत्ता बीगु बाहेक देय् व जनताया भिं यायेगु निंतिं गुगुं नं कथंया ज्या याःगु झीसं स्वये मखं ।

चुनावया इलय् वर्तमान प्रधानमन्त्रीं थीथी थासय् भाषण यायेगु झ्वलय् धायेगु याः । ‘आः वइगु निदँया दुने नेपालय् उत्पादन जूगु पेट्रोलं सवारी साधन चले यायेगु! नेपाःया थःगु हे ध्वाँय् तयाः पानीजहाज चले यायेगु !’ आदि आदि फय्गं खँ खः ।

उकथं हे ओली नेतृत्वया सरकार गठन जुइधुंकाः नं थज्याःगु खँ ल्हायेगु त्वःफिउगु मदुनि । ओलीं थःगु नेतृत्वया सरकार गठन जुइधुंकाः निदँया दुने तुइन विस्थापित यायेगु धकाः धाःगु खः । तर पश्चिमया जनता जक मखु थीथी दुर्गम थाय्या जनता आः नं ज्यानया पर्वाह मयासे तुइनय् च्वनाः खुसी छीत बाध्य जुयाच्वंगु दु। अथे हे ‘आः सुं नं मनूत फ्वनाः नये माली मखु’ धकाः बिउगु नारां कय्ता छ्वासुगु दु। खः प्रधानमन्त्रीया थज्याःगु फय्गं ज्या आतक नं निरन्तर जुयाच्वंगु दु ।

प्रधानमन्त्रीं धाःगु खः कि ‘आः सुं नं नेपाःमि जनता नये मखनाः सी माली मखु।’ तर जनता नये मखना सीगु अवस्थाय् थ्यनेधुंकूगु दु। तर प्रधानमन्त्रीयात थःगु हे नाराप्रति अझ नं गर्व दनि । उलि जक मखु प्रधानमन्त्री ओलीया भ्रष्टाचार सून्य सहनशीलता नारा नं गन वन धकाः माः वनेमाःगु अवस्था ब्वलंगु दु। वर्तमान सरकारया इलय् गुलि भ्रष्टाचार जुल धइगु खँ ल्याः खानाः धायेफइगु अवस्था मदये धुंकल ।

थगुने माघनिसें विश्वन्यंक कोरोना भाइरसया महामारीं थाय् काल । तर सरकारं यायेमाःगु न्यूनतम छुं नं तयारी मयासे हथासं चैत ११ गतेनिसें देय्न्यंकं लकडाउन यात । स्वलातक जनतायात छेँय् कुनेगु ज्या यात । गुकिं यानाः नेपाःया फुक्कं धयाथें व्यापार व्यवसाय चौपट जुलसा मेखे महामारीया कारणं विदेशय् लानाच्वंपिं नेपाःमियात स्वदेशय् हयेगुलिइ सरकार असफल जूगु जक मखु। थःपिसं नेपाःमि जनतायात विदेशं हयाः व्यवस्थापन तकं यायेमफइगु खँ धायेगु यात ।

मेखे कोरोना संक्रमण जूपिं सर्वसाधारण जनताया वासः यायेगु ला गन खः गन, अःखबतं आः थःपिंसं जनतायात सितिकं वासः यायेमफइगु खँ बकाइदा घोषणा यायेत नं थ्व सरकार लिमचिल । थुकथं स्वयेबलय् वर्तमान सरकार नेपाःमि जनतायात निंतिं खः कि मखु धइगु न्ह्यसः तकं ब्वलनाच्वंगु दु। लकडाउन ई ताःहाकः जुया वनेवं आम सर्वसाधारण जनता म्वायेत तकं थाकुल । गुकिं यानाः थीथीकथं व्यापार व्यवसाय यानाच्वंपिंसं थःपिनि व्यापार व्यवसाय याये दयेमाः धकाः सः थ्वयेकेगु ज्या यात । तर सरकार सहज रुपं व्यापार व्यवसाय यायेदइगु वातावरण दयेकेत तकं असफल जुल ।

वंगु साउन महिना लिपा स्वनिगलय् धमाधम कोरोना संक्रमितत अप्वयेवं सरकारं भदौ ३ गते निसें निषेधाज्ञा जारी यात । निषेधाज्ञाया कारणं न्हिंन्हिं ज्या यानाः नयेमाःपिं सर्वसाधारण जनता थःगु ज्यां वञ्चित जुइमाल गुकिया कारणं इमित नयेत तकं थाकुल । थुकियालिसें निषधाज्ञाया विकल्प मालेमाःगु माग जूगु जक मखु, सरकारं थप निषेधाज्ञा जारी यात धाःसा उकियात उल्लंघन यायेमाःगु अवस्था ब्वलनीगु ख्याच्वः थीथी थासं बीवं सरकार निषेधाज्ञा छ्वासुकेत बाध्य जुल । थुकथं सरकारया गतिविधियात अध्ययन यायेगु खःसा सरकार पूर्णरुपं असफल जूगु यच्चुक
सीदु। तर अथे खःसां सरकार प्रमुखलिसें सरकारय् दुथ्याःपिं मन्त्रीतय्सं थःपिंसं आपालं ज्या याना धकाः फय्गं खँ ल्हायेगु धाःसा त्वःतूगु मदुनि ।

सरकारया ज्या जनतायात आवश्यक जूगु इलय् तिबः बीगु खः । तर सरकारं जनतायात स्वयां नं थः आसेपासेयात अप्वः तिबः बिउगुया लिच्वः खः, थौंया अवस्था । सरकारया कारणं थौं स्वाभिमानी नेपाःमि जनता फ्वनाः नयेमाःगु अवस्था वल । तर सरकारं धाःसा ‘सुं नं जनता नये मखनाः सी मखु’ धायेगु बाहेक खनेदयेक छुं ज्या याःगु मदु। लकडाउन शुरु याःगु इलय् जनतायात छुं भचा राहत बिउगु सरकारं वयां लिपा धाःसा जनताया वास्तविक समस्याय् मिखा तिसिइगु ज्या यात । लकडाउनया शुरु इलय् आम सर्वसाधारण जनतायाके छुं भचा ध्यबा दइगु स्वभाविक खः । गुगु इलय् राहतया आवश्यकता मदु। तर आः आम जनतां थःगु जीविका चले याये मफयेधुंकाः धाःसा सरकारं राहतया छुं हे व्यवस्था यायेमफुगु धइगु माःबलय् वासः मदु धइथें खः ।

थौं वयाः ज्या यानाः नयेगु थाय् मदयेवं आम सर्वसाधारण जनतां गन जा नकाच्वंगु दु धकाः मालाः मालाः जा नयेमाःगु अवस्था वःगु इलय् सरकार धाःसा थःगु पार्टी दुनेया आन्तरिक समस्या समाधानय् केन्द्रीत जुयाच्वन । सरकारया पूवंक मूल्यांकन यायेमाःगु थौंया आवश्यकता खः । थ्व असफल सरकारं आः देय् यात झ्वाकलय् थुनेगु बाहेक मेता छुं यायेफइगु अवस्था मदयेधुंकूगु दु । थज्याःगु अवस्थाय् आः जनतां सरकारयात खबरदारी यायेमाःगु आवश्यकता जुइधुंकूगु दु। यदि थ्व सरकारयात अझ नं आः थें तुं न्ह्याकातयेगु खःसा उकिं देशय् भयावह अवस्था ब्वलंकीगु निश्चित दु। छुं कथंया योजना मदुगु सरकारया कारणं जनतां दुःख सीगु पाय्छि मखु। थ्व खँय् सरकार व सम्बन्धित पार्टीं वाः मचाःगु मखु। तर भागबन्दीया कारणं पार्टीं नं सरकारयात खास हे दबाव बी फयाच्वंगु मदु। खय्त ला पार्टी पद्दतिकथं सरकार संचालन यायेगु धकाः चुनावया इलय् राजनीतिक पार्टीतय्सं धायेगु याः । तर नेपाःया आतकया इतिहास स्वयेगु खःसा सरकार सञ्चालन पार्टी पद्दतिकथं मखु, प्रधानमन्त्रीया स्वविवेककथं जक पार्टी संचालन जुयाच्वंगु झीसं वाः चाः । गबलय् तक सरकारयात लगाम तइगु पद्दतिया विकास जुइमखु उगु इलय् तक सरकार स्वेच्छाचारी जुइगु स्वाभाविक खः ।

सम्बन्धित बुखँ

LEAVE YOUR COMMENTS