च्वय् निगू गुट, क्वय् वनाः स्वंगू गुट

संसद, प्रदेश व स्थानीय तकया ल्याखं दकलय् तःधंगु राजनीतिक दल नेपाल कम्युनिष्ट पार्टी (नेकपा)या नेतृत्वय् दुई तिहाइ केन्द्र अर्थात संघीय सरकार दुगु नापं उगु पार्टीं चाहना यात धाःसा देय् व जनताया नितिं यक्व हे याये फइगु अवस्था खः तर पार्टी धाःसा अन्तरविरोधय् लानाच्वंगु दु ।

आःया ओली सरकार इतिहासय् हे दकलय् शक्तिशाली सरकार धयाच्वंगु अवस्थाय् विपक्षी दल व सदनय् मदुगु दलतय्सं ला सरकारया विरोध याइगु, आलोचना याइगु स्वाभाविक हे खः तर लिपांगु इलय् वयाः वहे पार्टीया वरिष्ठ नेता माधव नेपालं संसदय् हे गुकथं आलोचना यानादिल उकिं यानाः छगू कथं नेपाःया राजनीति तरंगित याना बिउगु दु ।

नेकपाया वरिष्ठ नेता नेपालं देय् दुबे जुइन बचे याइम्ह माझी माल धइगु आशय प्वंकेगु जक मखु देसय् सरकार गन दु, गृहमन्त्री गन दु, गृह प्रशासन गन दु, न्यंकनं समस्यै समस्या धकाः थीथी थाय्या घटना, भ्रष्टाचारया खँनिसें जनता निराश जुयाच्वंगु कथंया अभिब्यक्ति बियादीगु इलय् नेकपाया सांसदत तकं अजूचाःगु खः ।

नेपालं बियादीगु अभिब्यक्ति धइगु वास्तवय् प्रधानमन्त्री नापं नेकपाया अध्यक्ष केपी ओलीयात लक्षित यानाः न्ववानादीगु खः । वय्कलं न्ववानादीगु खं नेकपायात तरंगित याना बिल । सरकारया खँ न्ह्यथनाः न्ववानादीगु जूसां नं वय्कलं पार्टीया अन्तर विरोध धाःसा न्ह्यथना मदी । थुगु ल्याखं स्वल धाःसा पार्टी दुनेया अन्तरविरोध मखु सरकारया कारणं थथे जूगु धकाः थुइकीगु स्वाभाविक हे खः ।

राजनीतिइ यायेगु चीज मधायेगु अले मयायेगु चीज धायेगु अर्थात छु धाल व मयायेगु अले छु मधाल व यायेगु कथंया रणनीति दयेकाः नेतात न्ह्याः वनादी धइथें हे माधव नेपालं सरकारया सवालयात कयाः असन्तुष्टी प्वंकादीगु जूसां वास्तवय् ब्यवहारय् धाःसा पार्टी दुनेया असन्तुष्टी खने दयावःगु दु ।

पार्टीया अध्यक्ष केपी ओली अमेरिका वनादीगु अले छुं दिं लिपा हे हाकनं मेम्ह अध्यक्ष पुष्पकमल दाहाल नं आकाझाकां सिंगापुर वनेमाःगु अवस्था वःगु खः । दाहाल नं सिंगापुर वनेमाःगु अवस्थाय् पार्टीया कार्यबाहक अध्यक्ष बरिष्ठताया नातां स्वयं माधव नेपाल हे जुइमाःगु खः । न्हापा नं निम्हं अध्यक्ष विदेश वंगु इलय् नेपालयात हे कार्यवाहक अध्यक्षया रुपय् तया वंगु खःसा थुगुसी धाःसा कार्यवाहक अध्यक्ष सु धइगु हे स्पष्ट मजू ।

पूर्व एमाले व पूर्व माओवादी दथुइ
नेतृत्व कायेगु नापं छगू पक्षं मेगु पक्षया नेतृत्वयात स्वीकार मयायेगु कथंया अन्तर विरोध ला द हे दु, वसिबें नं तच्वःगु अन्तर विरोध धाःसा माधव नेपाल व केपी ओली पक्षया दथुइ दुगु खनेदु ।

उकियात कयाः नेकपा दुने निगूगु तहया नेतातय् दथुइ विवाद जुयाः कार्यवाहक अध्यक्ष बारे छगू पक्षं मेगु पक्षयात अस्वीकार याःगु समाचार वयाच्वंगु हे इलय् लाकाः माधव नेपालं संसदय् अथे न्ववानादीगु खः । अथे हे वय्कलं निम्हं अध्यक्षत पिने लानाच्वंगु हे अवस्थाय् लाका छुं दिं न्ह्यः जक थःगु पक्षया नेता कार्यकर्तातय्गु भेला तकं सःतादिल ।

अले ओली प्रति असन्तुष्टी प्वंकेगु नापं सरकारया ज्यायात नं आलोचना यानादिल । थुकिं स्पष्ट जू कि माधव नेपाल गुटया ब्यागलं कथंया कुतः जुयाच्वंगु दु । पार्टी दुनेया असन्तुष्टीयात कयाः जक मखु सरकारया सवालयात कयाः तकं । माधव नेपालया अभिब्यक्ति सार्वजनिक जुइवं हे अमेरिकां नेकपा अध्यक्ष नापं प्रधानमन्त्री केपी ओलीं देय् डुबे जुइ मखु जि वयेत्यनागु दु, थः विदेशय् वनागु अवस्थाय् सुं सुंयात शुन्यता महसूस जूगु दुसा थः लिहां वयेवं फुक्कं ठिक जुइ धकाः न्ववानादीगु खः ।

अथे हे सिंगापुरय् वनादीम्ह मेम्ह अध्यक्ष पुष्पकमल दाहालं तकं माधव नेपालयात टेलिफोन यानाः सहलह ब्याकादीगु दु । थ्व घटनाक्रमं नेकपा दुने पार्टी अध्यक्ष ओली पक्ष व वरिष्ठ नेता माधव नेपाल पक्षया दथुइ तच्वकं अन्तर विरोध जुयाच्वंगु दु । निगू गुटया दथुइ पार्टी दुने विवाद तच्वयाच्वंगु दु धकाः ।

नेकपा एमाले व माओवादी केन्द्र एकता जूगु लांलां दयेधुंकूगु अवस्थाय् नं पार्टीया क्वय्या तहया एकता याये मफयाच्वंगु, फुक्क कथंया स्थानीय तहलय् विवाद जुयाच्वंगु धइगु पार्टी दुने अन्तर विरोध चर्के जुया हे खः धकाः अःपुक हे धायेफु ।

सामान्यतया स्वयेबलय् पूर्व एमाले व पूर्व माओवादी केन्द्रया कार्यकर्तातय् दथुइ विवाद जुयाः जक क्वय्या तह तक एकता जुइ मफयाच्वंगु खः ला धकाः मनूतय्सं तायेकाच्वंगु अवस्थाय् लिपांगु इलय् माधव नेपालया अभिब्यक्ति नापं अमेरिकां हे पार्टी अध्यक्ष केपी ओलीं माधव नेपालयात लिसः बियादीगु अले सिंगापुरं नेपालयात फोन यानादीगुलिं वास्तवय् पार्टी दुने अप्वः असन्तुष्ट जुयाच्वंगु पक्ष धइगु माधव पक्ष हे खः धकाः स्पष्ट जूगु दु ।

अथे धकाः पूर्व एमाले व पूर्व माओवादी दथुइ विवाद मदुगु धाःसा अवश्य नं मखु । पूर्व एमाले व पूर्व माओवादी दथुइ नेतृत्व कायेगु नापं छगू पक्षं मेगु पक्षया नेतृत्वयात स्वीकार मयायेगु कथंया अन्तर विरोध ला द हे दु, वसिबें नं तच्वःगु अन्तर विरोध धाःसा माधव नेपाल व केपी ओली पक्षया दथुइ दुगु खनेदु ।

थुकथं स्वल धाःसा क्वय्या तहलय् त्रिपक्षीय रुपं पार्टी दुने अन्तर विरोध जुयाच्वंगु खनेदु । छगू पक्षं केपी ओलीया गुट, मेगु पक्ष पूर्व माओवादीया गुट अले स्वंगूगु पक्ष धइगु माधव नेपालया गुट खः । थ्व स्वंगू गुटया कारणं पार्टी दुने माःगु कथं एकता प्रक्रिया न्ह्याके मफयाच्वंगु अले माःगु कथं स्थानीय सरकारपाखें तकं ज्या याये मफयाच्वंगु अवस्था खः ।

तर च्वय्या तहलय् स्वल धाःसा ला निगू जक गुट खने दयाच्वंगु दु । ओली–दाहाल छगू गुट जुयाच्वंगु अले माधव नेपालया मेगु गुट जुयाच्वंगु दु । ओली–दाहाल गुटपाखें नेपाल गुटयात माःगु कथं थाय् मबियाच्वंगु अले नेपाल पक्षयापिं नेता कार्यकर्तात पार्टी दुने उकुसमुकुस जुयाच्वंगु दु धकाः स्पष्ट जूगु दु ।

न्ह्याबलें अन्तर विरोधय् म्हिता वया च्वनादीम्ह, न्हापा माओवादी पार्टी दुने मोहन बैद्य व डा. बाबुराम भट्टराईयात ध्याकुनय् लाकेत ताःलाःम्ह पुष्पकमल दाहाल धाःसा थ्व इलय् थःगु हे कथंया ब्यागलं गुट दयेकाः च्वय्या तहलय् म्हिताच्वंगु खने मदु । क्वय्या तहलय् धाःसा पूर्व माओवादीत गुटबन्दी याना वयाच्वंगु दुसा च्वय्या तहलय् धाःसा केपी ओली पक्षलिसे हे जानाः वनाच्वंगु दु ।

उकिं च्वय् ओली–दाहाल छगू गुट अले क्वय् ब्यागलं ब्यागलं कथंया स्वंगू गुट जुयाच्वंगु दु धाये फइ । थथे पार्टी दुनेया गुटबन्दीं यानाः देय् व जनताया नितिं ओली सरकारं यायेफइगु ज्या तकं मजुयाच्वंगु अले जनताया भावना कथं सरकार न्ह्याः मवनाच्वंगु अवस्था दु ।