बार्सिलोना व रियल म्याड्रिड बुत
ला लिगाया शीर्ष थासय् लानाच्वंगु बार्सिलोना व रियल म्याड्रिडं निगुलिं टिम पराजित जूगु दु । थ्व सिजनय् बार्सा व रियलया थ्व न्हापांगु पराजय खः। बार्सिलोनायात अन्तिम थासय् लानाच्वंगु लेगानेसं व रियलयात सेभिल्लां बुकूगु खः । बार्सा व रियल ला लिगाय् थुकथं छन्हुं हे पराजित जूगु स्वदँ लिपा न्हापांखुसी खः ।
साविक विजेता बार्सिलोनायात लेगानेसं २–१ गोल बुकूगु खः । बार्सिलोनां कासाया १२ औं मिनेटय् फिलिप कोन्टिन्होया गोलं अग्रता काःगु खः । न्हापांगु हाफय् छगू गोलं न्ह्यःने लानाच्वंगु बार्सिलोनां लिपांगु हाफय् निगू गोल नःगु खः । निगुगू हाफय् छगू मिनेट दुने हे लेगानेसं निगू गोल याःगु खः । कासाया ५२ औं मिनेटय् नबिल एल हजिरं बराबरीया गोल यानाबिउगु खःसा थ्वयां छगू मिनेट लिपा हे ओस्कर रोड्रिग्वेजं गोल याःगु खः ।
कासा बूसां बार्सिलोना लिगया शीर्ष थासय् दु । मेखे रियलयात सेभिल्लां ३–० गोलं बुकल । सेभिल्लां स्वगुलिं गोल न्हापांगु हाफय् याःगु खः । सेभिल्लापाखें आन्द्रे सिल्भां निगू व बेन एडड्रं छगू गोल याःगु खः । न्हापांगु हाफया १७ औं व २१ औं मिनेटय् आन्दे्र सिल्भां व ३९ औं मिनेटय् बेन एडड्रं गोल यानाः रियलयात ३–० गोलं बुकूगु खः ।
रियल म्याड्रिडया मिडफिल्डर लुका मोड्रिक न्हापांगु हाफय् छगू गोल याःगु खःसां भिएआरपाखें स्वयाः थ्व गोलयात अफसाइड गोल धकाः रद्द यानाबिउगु खः । रियल म्याड्रिड लिगया निगूगु थासय् दु ।ला लिगा अन्तर्गत जूगु मेगु कासाय् एथ्लेटिको बिल्बाओयात भिल्लारियलं ३–० गोलं बुकल सा भ्यालेन्सिया व सेल्टा डी भिगोया कासा बराबरीइ क्वचाःगु दु ।
LEAVE YOUR COMMENTS