विराटनगर वारियर्स त्यात

येँ – एभरेष्ट प्रिमियर लिगय् विराटनगर वारियर्स त्याःगु दु । ईपिएलय् विराटनगरया थ्व न्हापांगु विजय खः । थ्वयां न्ह्यः जूगु प्यंगुलिं कासाय् विराटनगर बूगु खः । आइतवाः टियू मैदानय् जूगु कासाय् विराटनगरं काठमाडौंयात ७ रनं बुकूगु खः ।

वा वःगुलिं ८ ओभरय् सीमित जूगु कासाय् न्हापां ब्याटिङ याःगु विराटनगरं न्यागू विकेटया क्षतिइ १०५ रन दयेकूगु खः । विराटनगरया निंतिं अनिल शाहं ४५ रन, रायन पठानं ३० व कप्तान करण केसीं १५ रन दयेकूगु खः । काठमाडौंया निंतिं कप्तान सन्दीप लामिछाने, रायन बुर्ल व गुल्शन झां छगू छगू विकेट काःगु खः ।

विराटनगरं बिउगु १०६ रनया लक्ष्य ज्वनाः मैदानय् वःगु काठमाडौं ८ ओभरय् स्वंगू विकेटया क्षतिइ ९७ रन जक दयेकेफत । काठमाडौंया निंतिं रहमानउल्लाह गुर्बाजं २८ रन दयेकल । अथे हे सुवास खकुरेलं २६ व राजु रिजालं २४ रन दयेकल । विराटनगरया रायन पठानं निगू व प्रतिस जिसी छगू विकेट काःगु खः ।