खःसां …… मखुसां …… !
नेपाःया थौंया राजनैतिक स्थिति । अमूर्त कल थें । छु खः ? अस्पष्ट । अन्यौल । खनीपिंसं, स्वइपिंसं न्ह्यागु अर्थ छ्याःसां जिउ । न्ह्यागु अर्थ काःसां जिउ । स्वतन्त्र । देय्या राजनीतिक स्वरुप । आकारहीन । अष्टाबक्र थें ! देय्या नेतात । मिश्रित जन्तुत थें । छखें स्वःसा झंगः थें मेखें स्वःसा ध्वं थें ! मेगु कोणं स्वःसा धुँ थें ।
मेगु कुनं स्वःसा गोमन थें …… बहुरुपी इपिं छु कथंया प्राणी ? जीव ? क्वःछी फइमखु । देय् उकिं थौं क्वाःघासा । बहुरंगी । समाजवाद ला ? उदारवाद ला ? साम्यवाद ला ? पूँजीवाद ला ? व नं खः । थ्व नं खः । व नं मखु । थ्व नं मखु । न्ह्यागुं खः । न्ह्यागुं मखु । देय् थौं अर्थया संकटं ग्रस्त । गिजिमिजि ।थौंकन्हय् । टि.भी., रेडियो अनेक संचारमाध्यमय् विद्वान राजनीतिक विश्लेषकत खने दइ ।
इमिसं अन्तर्वार्ता बी । मती वइ । विद्वान विश्लेषकतय् देय्या राजनीतिक विषयया विश्लेषण न्यने । जनवद्र्धक जुइ । तथ्य, सत्य सीके दइ, सीके फइ । विश्वास याये । काये । तर विश्लेषकतय् अन्तर्वार्तां अःखबतं विचाःयात झन् स्वतुमतु स्वयेका बी । नगलय् खिचडी दायेका बी । विश्लेषक विद्वान् धाःपिनि विश्लेषणत कान्छा गुभाजु, द्यःमां, कान्छा झाँक्रीत थें रहस्यात्मक जुइ ।
अनेक रहस्यया खँ हइ । ख्याइ । पत्याः गथे याये ! पत्याः गथे मयाये ! विद्वान विश्लेषणं जनता झंझं दोधारय् चौधारय् …… मझधारय् …… गन गन लाइ । गन गन ! बेठेगान ……छगू अन्तर्वार्ता । छम्ह संविधानविद्, राजनीतिक विश्लेषकं धाइ । वंगु नाकाबन्दी भारत व तत्कालीन प्रधानमन्त्री खड्गप्रसाद ओली दथुइ गोप्य सम्झौताकथं जूगु खः ।
वंगु नाकाबन्दी भारत व तत्कालीन प्रधानमन्त्री
खड्गप्रसाद ओली दथुइ गोप्य सम्झौताकथं जूगु खः । व अप्रत्याशित, आकस्मिक मखु । पूर्व नियोजित । योजनावद्ध खः । गोप्य राजनीतिक सम्झौताया लिच्वः खः नाकाबन्दी ।
व अप्रत्याशित, आकस्मिक मखु । पूर्व नियोजित । योजनावद्ध खः । गोप्य राजनीतिक सम्झौताया लिच्वः खः नाकाबन्दी । थ्व सम्झौता ओलीजुया चुनावय् विजय सुनिश्चित यायेत जूगु खः । उकिं नाकाबन्दीया बाह्य रुपरंग फुक्क नाटक जक खः । यथार्थ मखु । विद्वान भीमार्जुन धाःम्ह राजनैतिक विश्लेषकया थ्व तर्क न्यने ।
न्ह्यपुइ ७–८ रेक्टर स्केलया भुखाय् ब्वइ । धाकु फय् वइ । थ्व छु धाःगु ? खःगु खँ ला ? मखुगु खँ ला ? विद्वान भाजुया अन्तर्वार्ता यक्वसिनं न्यन जुइ । जनतां विद्वानतय् अन्तर्वार्ता न्यनी । छुं सीके दइ । सीके फइ । जनताया इच्छा जुइ । तर इमिसं आम जनताया न्ह्यपुं न्ह्याये मदुगु खँत हइ । ल्हाइ । जनता विस्मृत जुइ ।
थज्याःगु हे विस्मयया राजनीतिक वातावरणय् जनता म्वाइ । म्वाये माली । म्वाये मालाच्वंगु दु । मेम्ह छम्ह राजनीतिक विश्लेषकं न्ह्यसः थनी ? प्रधानमन्त्री ओलीं थौंया सामान्य स्थितिइ भारतलिसेया मूलभूत समस्या बारे छाय् खँ मल्ह्वंगु ? छाय् कूटनीतिक पहल मयाःगु ? आः मेगु चुनाव वल कि तिनि भारतलिसेया समस्या चर्के याइगु खःला ? राजनीतिक कटाक्ष याइ ।
थौं देय्या राजनीतिक विश्लेषकतय् गणित छु खः ? गुकथं न्ह्यानाच्वंगु दु ? सामान्य जनतां थुइका काये फयाच्वंगु मदु ।
मेम्ह छम्ह राजनीतिक विश्लेषक, विद्वानया अन्तर्वार्ता न्यने । थःगु अन्तर्वार्ताय् विद्वान भाजुं गजबगु रहस्य उलेत स्वइ । उलागु दावी याइ । न्यने । जोक थें ताइ । न्हिले मास्ति वइ । ध्वाँसे खँ । मनमनं धाये । मखु ।
थ्व गुंपुन्हिया ख्यालःया संवाद मखु । न्हिलेत । थ्व ला टि.भी.इ शानदार अन्तर्वार्ताय् प्वंकूगु खँ खः । लखौं स्वकुमिपिंसं स्वइगु । हाकनं थ्व अन्तर्वार्ता बिउम्ह सामान्य लँय् लूम्ह मनू नं गथे धायेगु ? अनेक टि.भी. ज्याझ्वलय् राजनीतिक विश्लेषककथं प्यन्हु मपाक अन्तर्वार्ता बियाच्वनीम्ह । उम्ह भाजुं छगू अन्तर्वार्ताय् धाइ, ‘भाजु प्रचण्ड गुलि अर्ब पुलाः एमाले पार्टी न्याना काःगु खः ।’
थ्व धापू सामान्य मखु । थुलि अःपुक अन्तर्वार्ताकारं गथे धाये फत ! राजनीतिक विश्लेषकतय्सं अन्तर्वार्ताय् न्ह्यागु धाःसां जिउगु ला ? न्ह्यलय् ज्वलय् हाले थें ? वा इमिसं न्ह्यागु धाःसां जिम्मेवारी काये म्वाःला ? जनतां इमिगु धापुती गुकथं आधिकारिकता खंकेगु ?
राजनीतिक विश्लेषणया उद्देश्य जनतायात प्रशिक्षित यायेगु खः कि गुमराहय् तयेगु ?
राजनीतिक विश्लेषकतय्सं जनताप्रतिया दायित्व नं वाःचायेके हे माः । थःगु धापूयात विश्वसनीयकथं बीमाः । मखुसा थौं पिहां वयाच्वंगु राजनीतिक विश्लेषणतय्त हे विश्लेषण यायेमाःगु ई वइ । खःसां, मखुसां । राजनीतिक बजारय् पार्टीतय् क्रय विक्रय जुइगु ब्ल्याक जुइगु, विचौलियातय् खेल जुइगु खँ न्यनेमात्रं नुगः पिइसे च्वनी ।
म्हय् कम्पन वइ । ज्वर पिज्वइ । देय्या राजनीतिक दलत आलु प्याज थें जुइ । ग्यासें वइ । खुल्ला बजारया उपभोग्य वस्तु थें जुइ । देय्या राजनीति । …….
LEAVE YOUR COMMENTS