रेडक्रस व कोकाकोला दथुइ साझेदारी

येँ – नेपाल रेडक्रस सोसाइटी (नेरेसो) व कोकाकोला फाउण्डेसन दथुइ छगू साझेदारी जूगु दु । रेडक्रसं फाउण्डेसनलिसे कोरोना भाइरसया महामारीया इलय् संक्रमितया उपचारय् सक्रिय रुपं ग्वाहालि याःपिं अग्रपंक्तिया स्वास्थ्यकःमि व स्वयंसेवकया सुरक्षा अप्वयेकेगु ल्याखं साझेदारी याःगु खः ।

साझेदारीकथं रेडक्रसया स्वयंसेवकतय्त सरकारया स्वामित्वय् दुगु खोप केन्द्रय् परिचालन यायेगु व शारीरिक रुपं अपांगता जूपिंत खोप बीकेत यातायातया सुविधा बी ।
थ्व झ्वलय् साझेदारी परियोजनाकथं रेडक्रसपाखें थीथी अस्पतालयात स्वास्थ्य सुरक्षा सामग्री नं लःल्हाःगु दु । रेडक्रसया स्वास्थ्य सेवा विभागया निर्देशक डा. मनिता राजकर्णिकार व फाउण्डेसनया छगू प्रतिनिधिमण्डलं त्रिवि शिक्षण अस्पताल, सशस्त्र प्रहरी अस्पताल बलम्बु, पाटन अस्पताल, जनमैत्री अस्पताल व नेपाल मेडिकल एशोसियसनयात सर्जिकल मास्क, पंजा, स्यानिटाइजर लगायतया ज्वलं लःल्हाःगु खः ।

निगू संस्थाया मंकाः कुतलय् देय्या थीथी १० गू जिल्लाया स्वीछद्वलं मल्याक लाभग्राहीयात सरकारपाखें संचालन जुयाच्वंगु खोप केन्द्रतक थ्यंकेगु ज्या नं जुइधुंकूगु दु ।