सार्वजनिक यातायातय् पंगः थंसा कारबाही

येँ – सार्वजनिक यातायात सञ्चालन यायेगु ज्याय् पंगः थनिगु समितियात सरकारं कारवाही यायेगु ख्याच्वः बिउगु दु । मयुर यातायात प्राइभेट लिमिटेडया बस सेवायात समितिया नामय् व्यवसायीं पंगः थ्वनेवं सरकारं कडा कारबाही यायेगु ख्याच्वः बिउगु खः । नकतिनि सञ्चालनय् वःगु मयुर यातायात बसयात समितिया नामं व्यवसायीं पंंगः थंगु खः । मयुरं येँ, यल, ख्वपया लिसें काभ्रेया बनेपा तक यातायात सेवा तकया सेवा शुरु यायेवं उकियात चले याके मबिकेत कोटेश्वर पूर्वया यातायात व्यवसायी पंगः थंगुलिं सरकारं कडा चेतावनी बिउगु खः । यातायात व्यवस्था विभागं यातायात व्यवसायीया सिण्डिकेट त्वाःथलेत कडा पलाः न्ह्वनेत्यनागु खँ धाःगु दु ।

मयुर यातायात सञ्चालन यायेगु निंतिं माःगु कानुनी प्रक्रिया पूवंका सञ्चालन अनुमति बियागु खँ नं विभागं स्पष्ट याःगु दु । लिसें विभागं सार्वजनिक सवारीयात धिसिलाक्क, सुविधा सम्पन्न व यात्रुमैत्री दयेकेत विभागं तयारी यानाच्वंगु खँ धाःगु दु ।
रुट परमिट बियागु विषययात कयाः छुं यातायात व्यवसायी असन्तुष्टि वःगु विषयसं विभागं गम्भीर ध्यानाकर्षण जूगु खँ धाःगु दु । सरकारं गाडी चले यायेगु इजाजत बिउगु थासय् स्वतन्त्र रुपय् सार्वजनिक सवारी साधन सञ्चालन यायेगु हक अधिकार धासें मयुर यातायातयात पंगः मथँनेत विभागं सम्बन्धित व्यवसायी इनाप याःगु दु ।