ध्वगिना वनीगु फोहरपाखें साः दयेकेगु शुरु

येँ – येँ महानगरपालिकां ध्वगीना वनीगु फोहरपाखें प्रांगारिक साः दयेकेगु शुरु याःगु दु । येँ मनपां १५ वडाया डल्लु आवास क्षेत्रपाखें समुदायस्तरं हे मंकाःकथं फोहर व्यवस्थापन यायेगु ल्याखं उकथं ध्वगीना वनीगु फोहरपाखें प्रांगारिक साः दयेकेगु शुरु याःगु दु ।

येँ मनपां आःयात डल्लु आवास क्षेत्रय् परीक्षणया रुपय् न्ह्याकूगु प्रांगारिक साः दयेकेगु थ्व ज्यायात वइगु दिनय् मेमेगु वडाय् नं विस्तार याना यंकेगु योजना दुगु येँ मनपाया प्रवक्ता ईश्वरमान डंगोलं कनादिल ।

ज्याख्यलय् मवःगु दक्वं ज्वलंयात स्थानीयवासीं फोहर काः वइगु गाडी तया बीगुलिं यानाः फोहरया परिमाणया मात्रा अप्वया वनाच्वंगुलिं आः छेँखा छेँखां पिहां वइगु फोहरयात ध्वगीगु व ध्वमगीगु फोहरय् वर्गीकरण यायेगु ज्या शुरु जूगु जानकारी बियादिसें प्रवक्ता डंगोलं ध्वगीगु फोहरयात फोहर कायेत वइगु गाडीइ तया मछ्वसे स्थानीयस्तरय् हे व्यवस्थापन यायेगु ज्या शुरु जूगु खँ कनादिल ।

महानगरपालिकां ध्वगीगु व ध्वमगीगु फोहरया निंतिं बिस्कं बिस्कं हे गाडीया नं व्यवस्था याःगु जानकारी बियादिसें वय्कलं धयादिल, ‘छेँखाछेँखां पिहां वइगुमध्ये दकलय् अप्वः फोहरया परिमाढा ध्वगीगु हे जुयाच्वंगु दु, उकिं अज्याःगु फोहरयात स्थानीयस्तरय् हे व्यवस्थापन याये फइगु जूगुलिं थःपिंसं आः थुखेपाखे ध्यान बिया वनाच्वनागु खः ।’

मनपां फोहरया वर्गीकरणया निंतिं बिस्कं गाडीया व्यवस्था याःगुलिं ल्याण्डफिल साइटय् यंकीगु फोहरया परिमाण नं म्हो जुया वनाच्वंगु वय्कलं धयादिल । थ्व हे झ्वलय् येँ मनपाया ३२ गू वडामध्ये च्यागू वडाय् मनपा थम्हं व ल्यं दुगु वडाय् निजी संस्थां फोहर संकलन यानाः उकिया व्यवस्थापन याना वयाच्वंगु येँ मनपा वातावरण विभागया प्रमुख हरिकुमार श्रेष्ठं कनादिल ।

महानगरया फोहर संकलन याना वयाच्वंगु निजी संस्थापाखें छुं संस्थां न्हापा हे फोहरया वर्गीकरण याना वयाच्वंगु खँ न्ह्यथँसें वय्कलं फोहरया दीर्घकालीन व्यवस्थापनया निंतिं वर्गीकरण हे छगू जक विकल्प ख जूगु व उकिया निंतिं थःपिं मिले जुयाः ज्या यायेगु जुइ धयादिल । येँ मनपाया २१ गः टिपरपाखें फोहर संकलन यानाः न्हिं ३५० मेट्रिक टन स्वयां अप्वः फोहर सिसडोलय् व्यवस्थापन याना वयाच्वंगु दु ।

सम्बन्धित बुखँ

LEAVE YOUR COMMENTS