साल्ट ट्रेडिङय् लाकां पसः

येँ (रासस)- साल्ट ट्रेडिङ कर्पोरेशनया सहकार्यय् जुत्ता उत्पादक संघ नेपालं स्वनिगःया निगू थासय् मोहनि, स्वन्ति व छठया लसताय् सुपथ भावय् लाकां पसः संचालनय् हःगु दु । संघया अध्यक्ष रुद्र न्यौपानेया कथं साल्ट ट्रेडिङया केन्द्रीय ज्याकू परिसर कालिमाति व जडिबुटीइ च्वंगु ज्याकू परिसरय् मंगलवाः निसें विधिवत रुपं नेपाली कम्पनीपाखें उत्पादन जूगु थीथी ब्राण्डया लाकां पसः संचालन जूगु खः ।

नखःचखःयात लक्षित यानाः संघं म्होतिं नं १० निसें ५० प्रतिशत तक छुट बियाः लाकां मियाच्वंगु खँ धाःगु दु । साल्ट ट्रेडिङलिसे हथासं सहकार्य जूगुलिं यक्व थासय् पसः संचालन यायेमफुगु खँ धासें अध्यक्ष न्यौपाने लिपा लिपा देय्न्यंकं साल्ट ट्रेडिङ लिसे सहकार्य यानाः सुपथ भाःया पसः तयेगु खँ कनादिल ।

संघया पुलांम्ह अध्यक्ष होमनाथ उपाध्यायं सरकारया प्रतिष्ठित संस्थालिसे जानाः उपभोक्तातय्त विश्वास बीगु हे जुत्ता उत्पादक संघया मू लक्ष्य दुगु खँ धयादिल । नेपालय् उत्पादन जूगु वस्तुबारे आम उपभोक्तायात जानकारी बीत नं सुपथ मूल्य पसलय् लाकां पसः संचालनय् हयागु खँ वय्कलं धयादिल ।