जिगु सःया छम्ह प्रशंसक

वंगु बुधवाः साउन २३ गते शान्ति मन्त, ३ बजे पशुपतिइ धकाः बाखं च्वमि भरत साय्मिं जितः फोनं धयादिल । नुगः मछिन । वयां छन्हु न्ह्यः जक जि ट्रमा हस्पितल न्ह्यःनें वनागु । शान्तियात भेन्टिलेटरय् तयातःगु दु धकाः सिउसां स्वःमवना । कारण दु, थुनिं प्यदँ ति न्ह्यः, शान्तियात ब्रेनह्यामरेज जुयाः माइतिघर, अन्नपूर्ण अस्पतालय् तयातःगु स्वःवनागु । उबलय् व बेडय् । मिखा बांलाक कने मफु, न्ववाये नं मफु । जितः खंबलय् वं खः थें मखुथें संकाः जितः स्वःवयागु ? धकाः न्यं थें च्वं । तताजनुम्ह सुशीलतारां वयागु सुसाःकुसाः यानाच्वन ।

वयागु न्हासय् दुछ्वयातःगु पाइपय् पलंचा तयाः नयेगु –झोल नसा) प्वंकूगु लु खनाः जिगु मिखाय् सर्रर ख्वबि जायावल । छुं न्हि लिपा जिगु मन मच्वन । हानं शान्तियात स्वःवना, उबलय् तच्वः जुयाः वयात भेन्टिलेटरय् तयातल । एप्रोन फिनाः दुने वना, तापाकं स्वया, शान्ति बेडय्, वयागु न्हासय् व म्हुतुइ नं तत्याःगु पाइप दुछ्वयातःगु खना । पाइप खनाः नुगः खुल्ल मिनावल, छझाः दनाः शान्तियात गपाय्च्वः स्याः जुइ धकाः मनय् खँ वायेकेलात । नर्सं ‘गुलि स्वयेमाःगु’ धकाः तमं धाल । हानं जिं ‘शान्तिं ल्हाःतुति मसंकू गय् ?’ धकाः नर्सयाके च्वाक्क न्यनेलात ।

‘आः द्यनाच्वन का व, याकनं हुँ’ नर्सं जितः हक्कल ।

नर्स तंचागु खनाः जि ब्वाँय् पिहां वया । अबलेनिसें भेन्टिलेटरय् सुं तयातल धालकि स्वःवने ग्याः जि ।

भाषासेवी, जगतसुन्दर ब्वनकुथिया भाइस प्रिन्सिपल, गुगू व झिगू तगिमय् नेपालभाषा ब्वंकीम्ह शिक्षिका शान्ति मानन्धर । उलि जक मखु, सुज्या, थाज्या व थीथी हलंज्वलं दयकेगु सीप दुम्ह ज्यानीम्ह मिसा नं खः व । जिम्ह व न स्कुलया पासा खः, न क्याम्पसया, न साहित्य ख्यःया हे । जि सिबें खुदँ थम्ह व जिगु सःया प्रशंसक धाःसा अवश्य हे खः । ‘जितः छंगु सः यः, छं उद्घोषणा याइगु यः’ धकाः बरोबर जितः वं प्रशंसा याइगु । सायद जिगु सः हे माध्यम जुयाबिल, गुकिं वयागु नुगलय् जिप्रति पासाया भावना ब्वलंकाबिल ।

शान्तियात जिं गबलेनिसें म्हसिल ? लुमंका स्वया, जगतसुन्दर ब्वनेकुथि छगू जक तलाया छँे, कक्षा, संचालन सुरु जुइधुंकल । उबलय् अन हस्तकलाया ब्वज्या जूगु, जिगु स्वःवनागु । सुज्या, थाज्या, कापःया म्हिचा, बाय्ग व स्वां आदिया पसः तयाच्वंम्ह शान्ति । उबलय् वनाप नतुसुतु ब्या त। अनं लिपा नेपालभाषा व जगतसुन्दर ब्वनेकुथिया थीथी ज्याझ्वलय् नापलाइबलय् खँ ल्हायेगु जुल ।

लिपा शान्तिं थःगु नामं छगू शान्ति सिरपाः नं नीस्वन । जगतसुन्दरय् नेवाः भाय् कयाः एसएलसी पास जूपिं मध्ये दकलय् अप्वः ल्याः हयेत ताःलाःम्ह छम्ह मिसामचा व छम्ह मिजंमचायात व सिरपाः कथं तकमा, दसिपौ व द्वःछि तका बीगु क्वःजित । छन्हु शान्ति जिथाय् छेँय् वल । ‘शान्ति सिरपाः’ बीगु ज्याफ्वलय् उद्घोषणा यानाबिउ धकाः इनाप यात । जितः धाःसा न्ह्याथाय् नं ज्याझ्वलय् उद्घोषण याःवने मछिं ताइगु । ‘जगतसुन्दरय् मिसापिं दु’ उद्घोषणा याइम्ह सुनीता हे दु,’ जिं च्वाक्क धया ।

‘जितः छंगु सः यः, छं नवाइगु यः, म्हा धायेमते, प्लिज यानाबिउ न्हि’ शान्तिं नाइक इनाप यात । जिं दय् धया । वं ज्याझ्वः बारे च्वयाहःगु निपानाः भ्वं बियाः ब्रिफिङ यात । जिं वं नीस्वंगु शान्ति सिरपाः लःल्हाःगु ज्याझ्वलय् उद्घोषणा यानाबिया । व लय् ताल । व इलय् जिं खना, शान्ति सिरपाः बीधुंकाः वं एसएलसी पास जूपिं मेपिं सकल विद्यार्थीपिंत खादा न्ययेकाः कापि, कलम नंबिल । मेगु दँय् नं शान्ति छेँय् वयाः ज्याझ्वः बारे ब्रिफिङ याःवल । लुमंकथं जिं निक्वःतक ज्याझ्वः न्ह्याकाबियागु दु । वयात ग्वाहालि यानाया बापतय् ध्यबाया खँ मजू, तर वं जितः छुं न छुं प्रिजेन्ट बीगु याः । म्वाः धाःसां वं कर याइगु, अले जिं कायेगु । छक्वः वं हे सुयागु धकाः ख्वातुगु कापःया तपाःगु झोला छपाः बिउगु दु । छकः तिसा तयेगु बत्ता छगः व बुट्टा कियातःगु चुरा छपु बिउगु दु । वं बियातःगु प्रिजेन्ट जिं छ्यलाच्वनागु दु ।
थनिं खुदँ ति न्ह्यः छन्हु वयात त्यंगः गणेद्यःयाथाय् नापलात । वयागु ल्हातिइ प्वः छप्वः दु ।

‘तलय् वासःया होलसेल पसः दु, लछियात गाक्क वासः न्यानावयागु’ शान्तिं प्वः क्यनाः धाल । उबलय् जिं सिल, शान्तियात डाइबिटिज, ब्लड प्रेसर आदि ल्वचं दुःख बियाच्वंगु दु धकाः । लिपा आकाझाकां ब्रेन ह्यामरेज जुल धाल, तर उबलय् भेन्टिलेटरं मुक्त जुयाः छेँय् लिहां वनेफत । छेँय् वनाः स्वःवनाबलय् खाताय् फ्यतुनाः खँ ल्हानाच्वंम्ह शान्तिया सः भचा त्यामजी । थनिं दछि न्ह्यः नं फोनय् खँ ल्हाये नं, सः धाःसा अझं त्यामजीनि । जगतसुन्दर ब्वनेकुथिया प्रिन्सिपल माया मानन्धरं तःक्वः धाः जितः, ‘शान्ति छन्त लुमंकू, छंगु नां काः न्हिँ’ धकाः । म्हं मफुम्ह शान्तियात वं छेँय् वनाः बरोबर स्वःवनीगु इलय् शान्तिं जिगु नां काइगु, जितः लुमंकीगु जुयाच्वन । जि धाःसा छेँय् वनाः वयात बरोबर स्वःवने मफुसां ‘शान्तिया उसाँय् बांलायेमा, सः त्यजीमा याकनं जगतसुन्दरय् वनेफयेमा धकाः मनमनं प्रार्थना यायेगु ।
प्यदँ न्ह्यः मृत्युलिसे संघर्ष यानाः त्याकेफुम्ह शान्ति थुगुसी हानं कःसिइ दयाः तसकं म्हमफुति खनी । ट्रमा अस्पतालय् ४१ न्हु तक वं हानं मृत्युलिसे संघर्ष यायेमाल, त वं थ्व पालय् त्याकेमफुत, व बुत ।

मृत्युलिसे बूम्ह शान्त्यिा ख्वाः स्वयेत जि वंगु साउन २३ गते बुधवाः कुन्हु पौन ३ बजे हे पशुपति आर्यघाटय् थ्यंकःवना । छेँजः बाहेक अन मेपिं सुं मथ्यंनि । जि दकलय् न्हापलात खनी । बागमति खुसि सिथय् शान्तं द्यनाच्वंम्ह शान्तिया ख्वाः छकः स्वयेगु इच्छा जुल, धयास्वयाबलय् शान्तिया भिन्चां ख्वाः उलाबिल । जिं पुलुक्क स्वया, ओहो… शान्त्यिा ख्वाः गपाय्सकं मनावयाच्वन । खादा छपुं छाना, ताउतक स्वयेमफुत जिं । मिखां तिकिनंगु ख्वबि हुहुँ जि फल्चाय् फ्यतूवना ।

जिगु नुगलय् धाल, ‘शान्ति, छ मृत्युलिसे बूसां छुं मजू । छं २७ दँ तक मस्तय्त नेपालभाषा ब्वंकेगु ज्या याःगु दु, थुलिं हे छ त्याये धुंकल ।’ थुलि हे शब्द ह्वलाः जिगु सःया प्रशंसक शान्ति मानन्धरयात श्रद्धाञ्जलि देछाया ।

सम्बन्धित बुखँ

LEAVE YOUR COMMENTS