जुद्ध शम्शेरं ध्यबा ह्वला वइ

जिमि मांया नां लक्ष्मीमाया डंगोल अले बाःया नां बेखानारायण डंगोल । जि येँ, किलाघः त्वालय् बूगु । नब्बे सालय् तःभुखाय् ब्वःबलय् जि निदँ दुगु । मचाबलय् हे मां मंत, बां नं चिरिमां हल । ततापिं निम्हेसित पाजुं लहीयंकल, जि कान्छिम्ह जितः निनिं लहीयंकल । निनिया छेँ ब्रम्हू त्वालय् । त्वालय् पासापिंसं तेलकासा, सुलाकासा, यकंधाला, साइँ व कतांमरि म्हितेगु ।

बस, मोटर मदुनि । यलय् तक न्यासि वनाः करुणामय, धलिं लूगु व साःगु स्वःवनेगु । भुइजःसि, दुम्जा महाःद्यःयाथाय् तक न्यासि वनेगु । भ्वतय् बाय् च्वनेगु । अनं दुम्जा वनेगु । वयेवने यायेत न्हय्न्हु बी । न्ह्याथाय् वंसां न्यासि वनेगु । थाय्थासय् निनिं ब्वनायंकीगु । त्वालय् हे हिति दु, घः ज्वनाः लः काः वनेगु ।

त्वाःया मुसुंबहालय् जप तुं नं दु, व तुंयात ‘१२ वर्षे इनार’ नं धाः, १२ दँय् छकः तुं इलीगु जुयाः अथे धाःगु । झिंनिदँया छक्वः जप तुं ई, उबलय् त्वालय् मेला लगे जुइ । न्ह्य्न्हु न्ह्यवंनिसें तुं ईपिं ज्यापुत म्वःल्हुयाः नीसी यानाः तयार जुयाच्वनी । देगलय् पाठ याकातइ । न्हय्न्हु लिपा जप तुं पुज्याइ, नाय्खिं बाजं थाइ, काहा पुइ अले प्यम्ह ज्यापुत तुंथी खिपः ज्वनाः कुहां वनी ।

फोहर लः फुक्क च्वं बाल्टिनं थकाइपिं मनूत दइ । फोहरगु लः नं वासः धाइ, मस्त अरिं चाःगु व प्वाःस्याःगु लनी धाइ । उकिं सिसि ज्वनाः लः फः वइपिं ग्वाःग्वाः दइ । जिं नं लः फः वने नं । जप तुं ईबलय् मनूत लस्कर वयाः स्वः वइ । प्यन्हु लिपा हाकनं जप तुं पुज्याइ । जप तुं क्वय् धलिं तयातःगु दु धाइ, अनं स्वयम्भूया शान्तिपू पिचाः धाइ ।

जप तुं दुथाय् न्हापा ध्वप हँ ! लः बुलबुल थहां वयाच्वनीगु थाय् । छम्ह प्वाःस्याःम्ह मनुखं प ध्वपया लः स्वपासः त्वनाः भचा उखेरच्वंगु गल्लिइ झारा च्वं वंबलय् व मनूया प्वाथय् दुम्ह सर्प स्वत्वाः जुयाः कुहां वल हँ ! उकिं व गल्लियात स्वत्वाःमुगः गल्लि धाःगु धाइ ।
मुसुंबहालं भचा उज्यां बरेननि त्वाः दु, अन जामनः गुभाजुया छेँ दु ।

गुभाजुया बाखं थथे दु । छन्हु लँय् चटक क्यनाच्वंम्ह मस्र्यां दोकय् लः जायेकाः वयाच्वंबलय् जादु यानाः लः फुक्क वाकाबिल । अले जामनः गुभाजु नं चटक क्यनाच्वंथाय् वनाः लिकानातःगु मनूया नुगःचु जादु यानाः ज्वनावल, मनू म्वाकेत नुगःचु माल अले व मस्र्या गुभाजुया छेँय् ब्वाँय् वन । छेँय् कलाःम्ह तुति दुयाः अय्लाः कयाच्वंगु खनाः अजू चाल ।

झिंनिदँया छक्वः जप तुं ई, उबलय् त्वालय् मेला लगे जुइ । न्ह्य्न्हु न्ह्यवंनिसें तुं ईपिं ज्यापुत म्वःल्हुयाः नीसी यानाः तयार जुयाच्वनी । देगलय् पाठ याकातइ । न्हय्न्हु लिपा जप तुं पुज्याइ, नाय्खिं बाजं थाइ, काहा पुइ अले प्यम्ह ज्यापुत तुंथी खिपः ज्वनाः कुहां वनी ।

मस्र्यां थःगु समस्या कन । कलाःम्हं गुरुजु दुगुचा ख्यलय् (टेकुं खुसिपाखे वनेथाय्) दुगुचा जः वनाच्वन’ धाल । व मस्र्या अने हे ब्वाँय् वन । ‘आवंलि थथे यायेमखु, जितः माफ यानाबिउ’ धकाः मस्र्यां गुरुजुयात बिन्ति यात । अबलय् गुरुजुं थःगु तुतिया पतिंचां सिमा हः क्वछुकाः दुगुचित सिमा हः नकाच्वंगु ।

गुरुजुं ‘सिमा च्वका छकः ज्वँ’ धकाः ज्वंकूबलय् व मस्र्या फुट्ट सिमा हःनापं सिमा च्वय् थ्यन । मस्र्यां हाकनं माफी फ्वन । माफी बिल । छकः गुरुजुं कलाःम्हेसित ‘जि थन दु धकाः सुयातं धायेमते न्हिँ’ धकाः थः स्वयम्भूया अजिमाद्यःयाथाय् मन्त्र कलः वन । छझाः लिपा छम्ह मनू गुरुजु नाप मलासें मजिल धकाः वल, करकर यासेंलि कलाःम्हं क्वथाय् यंकाः द्यनाच्वंम्ह गुरुजुयात क्यनाबिल ।

अबलय् गुरुजुया हंस मदयाच्वंगु पाः, गुरुजु सित धकाः सिथं नं यंकल । सिथं यंकूगु खंम्ह बरेननिइ च्वंम्ह ज्यापु छम्ह बुँइ ज्या वंबलय् स्वयम्भू भगवान पालियाथासं त्वाथलं कुहां वयाच्वंम्ह गुरुजुयात खन । ‘छःपिं सित धकाः सिथं यंके धुंकल’ धकाः व मनुखं गुरुजुयात कन ।
‘का, अय्सा जि छेँय् लिहां वनेमखुत, त्वालय् खरुं, लाता, निपु पतिंचा प्यपुंपिं सुं दत्तले जि थन दनि धकाः सीकि’ धयाकथं जामनः गुभाजु हाकनं च्वय् थहां वनाः शान्तिपुलिइ दुहां वन ।

थ्व जिं न्यना तयागु बाखं कनागु ।जि झिंछदँ दुबलय् लगं, तःबहालय् च्वंम्ह हरिगोपाल डंगोलनाप ब्याहा जुल । शीरबन्दी, तिखमाः, पंचरत्नया चुरि न्ह्यानागु लुमं । दूली च्वनाः वनागु, समली नं वल । तःबहालय् मत मदु । चिकं अप्पां सियातःगु चुकय् भ्वय् न्यायेकः वइपिं यक्व दु । बँय् हे वा पाः वइपिं, मल्ता पाः वइपिं नं तन्न दु ।

सुकू लाइमखु, बँ छकः जक पुइ । जिमि बुँ मदु, उकिं बुँइ ज्या यायेम्वाः । भाःत व बाःजुपिनि दरवारय् ज्या वनी । लगंया अर्थ लःगं, अथे धाःगु लः मदु । लगमय् लःया हाहाकार, घः ज्वनाः यंगालय् लः काःवनेगु अनया हितिइ हुल जुयाच्वनी । अनं झ्वःछेँय् वनेगु, अननं हुल खनकि भोटेबहाः गबलें ला धरग्वारा क्वय् वनेगु ।

धरग्वारा क्वसं न्हय्धाः हिति झ्वःलिक्क दु, लः फयाः घः बेकुंच्यानाः वयेगु । गबलें ला लुँहितिइ नं लः काः वना । व लः त्वनेत जक । म्वःल्हुइत, वसः हिइत बागमति वनेगु । सुथय् हे वसः प्वः व भ्यगः बेकुं च्यानाः बागमति घाटय् वनेगु । म्वःल्हुयाः, वसः हियाः, गंकाः सन्ध्या काःइलय् जक लिहां वयेगु ।

माजुं जा व कःनिमुस्या ज्वना वइ, जा नं अन हे च्वनाः नयेगु । वसः पाये धुंकाः न्हिनय् कःनिमुस्या नयेगु । यंगालय् बाबुसाहेबपिनिगु छेँया चुकय् हुस्लुं तयातइ, अन हुस्लुं पूवनेगु । अन क्वंसिमा दु, क्वंसि मालाः नयेगु । छकः धिब्छगः ध्येबा लुत, व ध्येबां ताःहाकःगु सेल छपा न्याना ।

लँय् नये मजिउ धकाः निनिं धयातःगुलिं ज्वनाः वनाच्वनाबलय् लगमय् थ्यंबलय् क्वखं दायाः यंकल । धिब्छगःया ग्वारामरि न्यागः वः, म्येय्या ला १ पाउया प्यंगः, लुँ छतोलाया सछितकांनिसें सिउ, नयेचिकं चकंछिया न्यागः । कुमारि सालीबलय् निन्हुन्ह्यःनिसें पुलिसत वयाः त्वालय् खा लाः वइ, छेँया पल्लिइ घाँय् पु धाःवइ, लः सफा याः वइ ।

कुमारि सालीकुन्हु लँय् फि ह्वली, फिनेल नं ह्वली । जिपिं लगमय् च्वनाः द्यः साःगु स्वयेगु । जुजु जुद्ध शम्शेर किसिम्हय् च्वनाः ध्यबा ह्वलावइ । मनूतय्सं ‘महाराज ……. महाराज …….’ धाधां थःगु गा, तपुलि फइ । जुजु वने धुंकाः गणेश, भ्यलु, कुमारि खः झ्वःलिक्क सालाहइ । पल्टन यक्व दु, न्हापा ।

जुजु जुद्ध शम्शेर म्हासुक जोगी वसः पुनाः म्हासुगु फेत्तां चिनाः देशं पिहां वंबलय् कालिमातिइ वनाः स्वःवनागु । गबले खः धायेमसल । लस्कर मनूत दु, मनूतय्सं ‘महाराज ……. महाराज …….’ धाल । जुजु मोटरय् च्वनाः वनाच्वन । जिं मोटर अनागु उबलय्तिनि खः ।