जनसेवा हलय् एसएलसी सेन्टर
गोरक्षबहादुर न्हुछे प्रधान, (८९ दँ)
लाजिम्पात, येँ ।
मांया नां गोपिनी न्हुछे प्रधान अले बाःया नां जितबहादुर न्हुछे प्रधान खः । जि वि.सं. १९८४ सालय् गोरखा जिल्लाया पाटेचौर त्वालय् बूगु खः । मांअबुया प्यम्ह काय, न्हय्म्ह म्ह्याय् । कायमचाय् जि साइँलाम्ह ।
जि निदँ, स्वदँ जक दुबलय् जिमि बाःया ज्या पाटेचौरय् मखुत, अनं सरुवा जुल । प्यूठान मालअड्डाया हाकिम जुयाः जिमि बाः प्यूठान वन । अन जितः नं ब्वनायंकल । अन दुगु छगू जक पाठशालाय् चार क्लास तक ब्वना । अनं लिपा जिपिं काठमाण्डुइ लिहां वया । जिमिगु कूल छेँ मरुइ, मरु गणेद्यःया देगः लिक्क चानचुन ध्यबा हिलेगु फल्चा दु, व फल्चां पश्चिमपाखे मरुहिति वनेगु लँय्, झ्वःलिक्क छेँ दुथाय् ।
जिमिगु छेँ दुने निगू चुक दु । छगू चुकय् जोशीत, छगू चुकय् प्रधानत । जिमिगु छेँ न्ह्यःने फः दु, तजाः । तजाः फः धाइ । मरुसतः (काष्ठमण्डप) पुलांगु मर्मत याःगु जिं सिउ । न्हापा अन दुने चाकःछिं पसः दु । दुने चाकःछिं जक मखु, न्ह्यःने बँय् नं तरकारि पसः झ्वःझ्वः दु । मां तरकारि न्यायेत वनीबलय् नापं वने नं । अबलय् पाछै छम्हूया धिब्छगः धकाः लुमं ।
न्हापा न्हापा छेँय् छेँय् हिति मदु, त्वालय् दुगु देगः लिक्कसं छधाः वीरधारा दु । अन लः कायेत वनीपिं लाइन च्वनेमाः । उकिं त्वालय् च्वंपिं अप्वः धइथें मरुहितिइ वनाः लः काःवनी, म्वःल्हुतइ व वसः हिइत नं अन हे वनी । जिपिं मस्त नं म्वःल्हुत मरुहितिइ हे वनेगु । लः यच्चुसे च्वं, हिति नं तधाः ।
१९९६ सालपाखे जिमि बाःनं जिमि दाजुपिंत जेपि स्कुलय् भर्ना यानाबिल, जितः नं ६ क्लासय् भर्ना यानाबिल । क्लासय् पीम्ह ति विद्यार्थी दु, मिसापिं छम्ह नं मदु । फी नितका पुलेमाः । श्री २ जुद्ध शम्शेरया पालय् वि.सं. १९९४ सालय् छत्रपातिइ जेपि स्कुल चायेकूगु खः । जिमि थाना कापःया सुरुवाः न्ह्यायेगु । स्कुलय् व हे लं पुनाः, लाकां न्ह्यानाः वनेगु ।
ब्वकीपिं मास्तरत दक्व नेपालीत । अन झिगू क्लासतक ब्वना । जितः दकलय् यःगु विषय इंग्लिश, मयःगु विषय हिसाब खः । इंग्लिशय् जिं अक्सर ६०÷६५ अंक हयेगु, हिसाब विषय बल्ल बल्ल पास जुइगु । वि.सं. २००० सालय् जिं एसएलसी बियागु । जिमिगु स्कुलं अथे हे च्याम्ह, झिम्ह ति जक दु । मेमेगु स्कुलं वःपिं यानाः व सालय् अथे हे न्यय्म्हति जक दुला धइथें च्वं, एसएलसी बिउपिं ।
अबलय् न्हूसतकय् जनसेवा हल नकतिनि दयेके सिधःगु । अन फिल्म क्यनेगु ज्या शुरु मयाःनि । जिमिसं एसएलसी जाँच बियाबलय् जनसेवा हलय् सेन्टर । व हल दुने मेच व टेबुलया व्यवस्था यानाः जिमित जाँच बीकूगु । जिं थर्ड डिभिजनय् एसएलसी पास याना । जाँचया फी झिंन्यातका दां पुलागु लुमं ।
एसएलसी पास यानाः त्रि–चन्द्र कलेजय् आइ.एस्सी ब्वं वना । अन अथे हे स्वीम्ह ति विद्यार्थी दु, ब्वंकीपिं दक्वं नेपालीत व भारतं वःपिं नं दु । घन्टाघर दुथाय् नापं च्वंगु दरवार थें च्वंगु छेँ हे जिमिगु त्रि–चन्द्र कलेज । अनं पश्चिमपाखे रानीपुखू छर्लंग खनेदु । रानीपुखू चाकःछिं बार आःथें मदु । चिजाःगु पःखालं जक घेरे यानातःगु सिउ । घन्टाघर नं पुलांगु, अन दुगु घडी मर्मत यायेत भारतं कालीगढत वइगु सिउ ।
जिपिं एसएलसी पास जुइधुंकाः छन्हु स्कुल स्कुलया हेडमास्तरतय्सं थःथःपिनि विद्यार्थी पुचः ब्वनाः सिंहदरवारय् ब्वना यंकल । ध्वाखां दुहां वनाः जिपिं सकलें विद्यार्थीत झ्वःलिक्क लँय्सं दना । जिपिं श्री ३ जुद्ध शम्शेर किसि गयाः जिपिंपाखे वल । हेडमास्तरं धाःथें छतका वंगु डबल छगः बँय् तयाः ‘सरकार’ धकाः नमस्ते याना । जुद्ध शम्शेरं जिमित छकः सर्रर स्वल, जिमिगु न्ह्यःनें वंम्ह जुद्ध शम्शेर किसि दिकाः किसिम्हं कुहां वइला धकाः च्वनागु, कुहां मवः । सर्रर हे वनाछ्वत । व वनेधुंकाः बँय् तयागु छतका वंगु डबल छगः हाकनं थःपिंसं हे लाना कया । मेपिं विद्यार्थीतय्सं नं लानाकाल ।
जिपिं कलेज ब्वना च्वनाबलय् ‘नेपाल छात्र संघ’ धइगु संस्था चायेकागु, जि प्रचार विभागया प्रमुख जुयाः ज्या याना च्वनाबलय् देशय् राजनीतिक आन्दोलन जुल । जिपिं आन्दोलनय् ब्वति काइपिं विद्यार्थीत । ज्वना यंकी धकाः जिपिं सुलाः सुलाः जुइगु । वि.सं. २००७ साल फागुनं देशय् राजनीतिक हिउपाः वल, प्रजातन्त्र वल । राणा सरकार मंत । प्रजातन्त्र हःम्ह जुजु त्रिभुवनं जिमित छन्हु नारायणहिति दरवारय् सःताः दर्शन बिल ।
व इलय् जीवनलाल सत्याल धइम्ह पासा छम्हेसिनं जुजु त्रिभुवनया तारिफ यानाः कविता छपु नं न्यंकल । व कविता न्यनाः त्रिभुवन लय् ताल, जिमित ‘तपाइँहरू’ धकाः संबोधन यानाः जिमिगु योगदानया निंतिं सुभाय् बिल, न्हय्द्वः तका दां नं बियाहल ।
वयां लिपा जिमिगु छात्र संघं लैनचौरया तःधंगु ख्यलय् छगू तःधंगु सभा याना । अन त्रिभुवन नं सवारी जुल । गृहमन्त्री वीपी कोइरालां भाषण नं बिल ।
वि.सं. २००८ सालय् गोविन्दलक्ष्मी राजभण्डारीनाप जिगु ब्याहा जुल । जिं एमए पास यानाः जागिर नया । अबलय् तक मोटर धइगु मदुनि, साइकल धाःसा दयेधुंकल । न्ह्याथाय् वंसां न्यासि वनेगु कि साइकल गयाः वनेगु ।
LEAVE YOUR COMMENTS