नेवाः सभ्यता व शाक्य सभ्यता स्वाइगु साइकल यात्रा

नेपाः भ्रमण दँ २०२० सुरु जुइधुंकूगु दु । नेपाः भ्रमण दँय् नीगू लाख पर्यटकत नेपाः दुत हयेगु सरकारी लक्ष्य पूवंकेगु निंतिं पर्यटन व्यवसायीतय्पाखें नं थीथी ज्याझ्वः न्ह्याका हयाच्वंगु खः । थ्वहे झ्वलय् स्वयम्भूया हारती अजिमायाथाय् निसें लुम्बिनी तक छगू साइकल यात्रा जुइत्यंगु दु । नेपाः भ्रमण दँ लाकाः स्वक्वःखुसी थ्व यात्रा जुइत्यंगु खः । नेवाः सभ्यता व शाक्य सभ्यतायात स्वायेगु ल्याखं न्हापांखुसि सन् २०१३ य् थ्व साइकल यात्रा न्ह्याःगु खः । अले थ्व साइकल यात्रा न्ह्याकूगु खः पर्यटन व्यवसायी विक्रम पाण्डें ।

सन् २०१७ य् नं थ्व अभियान तःजिक न्ह्यात । कासाय् नं पर्यटन ल्वाक्वाछ्याये जिउ धयागु धारणा ज्वनाः भाजु पाण्डें थज्याःगु राष्ट्रिय व अन्तर्राष्ट्रिय स्तरया अभियान न्ह्याका वयाच्वनादीगु दु । थ्व झ्वलय् माओवादी जनयुद्धया कारणं थ्यंमथ्यं सुख्खा हे जुइधुंकूगु नेपाःया पर्यटन क्षेत्रयात पुनःर्जिवित यायेगु ताःतयाः न्हापांखुसि झिंन्हय्दँ न्ह्यः वि.सं. २०५९ सालय् वय्कलं विश्वया सर्वोच्च शिखर सगरमाथाय् म्याराथनया ग्वसाः ग्वयादीगु खः । उकी फ्रान्स, बेलायत, अमेरिका, चीन, भारत व नेपाः लगायत विश्वया थीथी देय्या पर्यटकतय्सं ब्वति काःगु खः । थौंकन्हय् नेपाल पर्यटन वोर्डया ग्वाहालिं दँय्दसं थ्व ज्याझ्वः याना वयाच्वनादीगु दु । थुकिया लिसें वय्कलं थीथी इलय् शान्ति पदयात्रा, शान्ति म्याराथन, अन्तर्राष्ट्रिय म्याराथन नं ग्वसाः ग्वयेगु यानाच्वनादीगु दु ।

भाजु पाण्डे खस् ब्रम्हु कूलय् जन्म जूम्ह खःसां येँया थबही (ठमले) थेंज्याःगु नेवाः कला, संस्कृति व सभ्यतानाप तसकं स्वापू दुगु थासय् जन्म जूम्ह जूगु ल्याखं नेपालमण्डलया सभ्यतालिसे तसकं हे भ्यलेपुंम्ह खः । हाल लुम्बिनी विकास कोषया सद्भावना राजदूत कथं थीथी मिसन चले यानाच्वनादीम्ह वय्कः स्कूल ब्वंसांनिसें हे नेपाल संस्कृति व नेवाः सभ्यता नाप उलि हे सतिक च्वनादीम्ह खः ।

छम्ह व्यवसायी जुयाः नं बुद्ध धर्मया महान लँपु मध्यमार्गी जुयाः थीथी कथंया अभियान न्ह्याका वयाच्वनादीम्ह वय्कलं सुरु यानादीगु ‘एभरेष्ट अभियान’ अर्थात् एभरेष्ट म्याराथुन थौंकन्हय् विश्वन्यंकं प्रसिद्ध जुयाच्वंगु दु । स्वयम्भू–लुम्बिनी साइकल यात्रा, एभरेष्ट अभियान थेंज्याःगु ज्यां वय्कः बुद्ध धर्म संस्कृतिया लागाय् छम्ह सद्भावना राजदूत कथं म्हसिका बियाच्वंगु दु ।

सुरुइ छुं मनूतय् सहभागीताय् हारती अजिमायाथासं बुद्ध जन्मभूमि लुम्बिनी थ्यंकाः क्वचायेकूगु शान्ति साइकल यात्रा निक्वःखुसि थ्वयां अप्वः सहभागीता खनेदुगु खः । थुगुसी म्होतिं नं निसःत्यानिसें स्वसःम्ह साइकल यात्री सहभागी याकाः थ्व यात्रा न्ह्याकेगु ज्याय् वय्कः लगे जुयाच्वनादीगु दु । वय्कःया लक्ष्य आकिवं न्यासः व वयां लिपा द्वःछिम्ह, निद्वःम्ह यायां अप्वयेका वनेगु । थ्व यात्रा येँनं होली पुन्हि प्यन्हु न्ह्यः सुरु यानाः पुन्हिकुन्हु लुम्बिनीइ थ्यंकाः क्वचायेकी ।

सिद्धार्थ गौतमं बुद्धत्व प्राप्त याये धुंकाः लुम्बिनी बिज्याःबलय् फागु महिनाय् वसपोलयात गेरु वसतय् न्हापांखुसी दरवारय् दुकाःगु खः । उगु हे लुमन्तिइ दँय्दसं फागु महिना हे लाकाः साइकल ¥याली याये याना वयाच्वंगु खः । नेवाः सभ्यतायात लुम्बिनीया शाक्य सभ्यतालिसे स्वाइगु थ्व महाअभियानयात विश्वब्यापी प्रचार यायेगु झ्वलय् थुगुसी नं आपालं चाइनिज मूलया साइकल यात्रीत सहभागी जुइत्यंगु खँ वय्कलं कनादीगु दु । साइकल यात्राया झ्वलय् लुम्बिनी तक ३०० किलोमिटर दुरी पार यायेगु जक मखु, अन थ्यंकाः हाकनं ७७.७७ किलोमिटर दूरीया माउण्टेन बाइक रेस ज्याझ्वः नं क्वछिनातःगु दु । भगवान बुद्धया जीवनय् ७ ल्याः तसकं हे संयोगं जायाच्वंगु दु । जन्म जुइवं न्हय्पलाः छिउगु, सिद्धार्थ गौतम बुयाः न्हय्न्हु दुकुन्ह मायादेवीया देहावसान जूगु, दरवार त्याग यानाः दँय्दँसं लिपा ज्ञान प्राप्त यानाः दरवार प्रवेश जूगु, निर्वाण प्राप्त याये धुंकाः न्हय्न्हु तक सिम्ह अथें तयालिं थीथी देय्या जुजु महाराजपिं ब्वनालिं जक दाहसंस्कार याये यंकूगु थेंज्याःगु ७ ल्याःयात ध्यानय् तयाः ७७.७७ किलोमिटर रेस व ७ या ल्याः वइकथं सिरपाःया व्यवस्था यानातःगु दु ।

बिस्काः जात्रा, कुमारी याः (इन्द्र जात्रा) थें हे आः लिपा लिपा देसय् पर्यटक दुकायेगु व आन्तरिक पर्यटनया लागिं नं पहल यायेगु कथं थुगु साइकल ¥याली, शान्ति दौडं नं ग्वाहालि याइगु ज्याझ्वःया अभियन्ता पाण्डेया धारणा दु । नेवाः सभ्यतायात विश्वय् न्यंकेगु थ्व छगू महात्वपूर्ण अवसर जूगुलिं थुकि नेवाः समुदाय नापं थीथी समुदायं नं फयां फति सहभागी जुइगु अपेक्षा वय्कःया दु । थ्व अभियानया निंतिं नेवाः अभियन्ता मनोज नेवाः खड्गीं नं माक्वः ग्वाहािल याना वयाच्वनादीगु दु ।

न्ह्यब्वःम्ह ः कृष्ण प्रजापति