नातिदाइ लुमंसे वल

शान्तराज शाक्य

न्हाय्कं स्वस्वं ख्वःचां न्यताः पिचुकाच्वना । गनं गनं नातिदाइ लुमंसे वल । नातिदाइ वीर अस्पतालय् तयातःबलय् नापलायेत वनागु व थाय् लुइके मफयाः लिहां वयागु लुमंसे वल । उबलय् किरण शाक्य छगू अप्रेसन क्वथा पिने च्वनाच्वंगु नापलाःगु नं लुमनावल ।

वयां छन्हुनिन्हु लिपा हे जुइ, बहनी फेसबुकय् नातिदाइ मंत धकाः च्वयातःगु स्टाटस खन । च्वयातःगु छक्वलं पत्याः याये मछालाः राजादाइनं सीफु धकाः फोन याना, मदुगु मसिउनिगु जुयाच्वन । न्हाच बसन्तं अन च्वनाच्वंगु खँ फेसबुकय् च्वयातःगु खनागु । उकिं बसन्तयात फोन यानाः न्यना । बसन्तं जि न्हाचः हे लिहां वये धुन, उबलय् तक अथे तच्वःगु मसिउ, जिं नःलियाके फोनं न्यने धाल ।

पलख जायेकाः वसन्तयात हानं फोन यानाः न्यना । नातिदाइ मदुगु सिल । गुलिख्यय् उसाँय् मदुपिं नापलाःवने धाधां मदयेधुंकीगु । नातिदाइ नं ल्वय् क्वलानाः छेँय् हइगु जुल धयागु न्यनागु खः । तर जुइबलय् गथेगथे जुइ यः खनिं ।
नातिदाइया सपूmधुकूनाप जि यक्व स्वापू दु । छझाः ला जागिर थें न्हिंन्हिं नातिदाइया पसलय् थ्यं । सन्चरवाः पसः मचाःसां अन वनेगु बानीं यानाः येँय् मवंसें मछू । येँय् उखेंथुखें साहित्यिक ज्याझ्वलय् वनेगु । यलय् च्वंपिं पासापिंसं तकं जितः नापलायेमाःसा नातिदाइया पसलय् नापलाःवइ । उबलय् अन दइम्ह मेम्ह छम्ह ख्वपं निसें वइम्ह मदन जूजं नं खः । मदन जूजं ख्वपं निसें वइम्ह, जि यलं वनीम्ह । मदन जूजं ला नातिदाइया बहनी पसः दुकायेत ग्वाहालि नं यानाच्वनी । जि धाःसा उलि लिबाक मच्वना ।

नातिदाइ धयाम्ह मनू नये, त्वने, पुनेया रहर स्वयाः नं नेपालभाषाया सेवा याये दःसा लुदंम्ह भाषागुलु खः । थःगु भाषाया लागि थःम्हं पूmचाःगु न्ह्यागुं यायेत लिचिलीम्ह मखु । नेपालभाषाया ततःधंपिं मनूत म्हमसिउपिंसं नं नातिवज्र धाल कि दगुबहालय् लँब्वय् नेवाः भाय्या सपूm मियाच्वनीम्ह धकाः अप्वःसिनं सिउ ।
नातिदाइनं व हे पसलय् च्वनाः वय्कलं मेपिंत मकंगु खँ जितः कं । न्हापा नातिदाइया भुतू च्याकेगु ज्याय् समस्या दु । गुबलें गुबलें जा थुइत जाकि मदयाः सुथय् इलय् जा नयेखनी मखु । वय्कःया अबु दानदाइ छेँया छुं वास्ता मदुम्ह, बखुं ब्वयेके दतकि गाःम्ह । नातिदाइया मां दिमागया बिरामी जुयाः न्हापा हे मंत । छेँय् दक्व नातिदाइनं स्वयेमाः ।
छन्हु सपूm पसः ब्वये लिबात खनिं । चित्तधर हृदय झाःबलय् पसः मचाःगुलिं लिहां झाल । हानं झाःबलय् पसः चायेकातल । चित्तधर हृदयं थौं छाय् पसः चायेके लिबाःगु धकाः न्यन । नातिदाइया प्वाः मजाःनिगुलिं सुकुसुकुचिंगु म्हुतुसि खनाः चित्तधर हृदयं थौं जा मनःनि जुइ धयागु सीकाः अनं फनक्क फहिलाः पिहां झाल । पलख जायेकाः छुं छप्वः ज्वनाः झाल । ज्वनावःगु प्वः नातिदाइया ल्हातय् तयाबिल । ल्हातय् तयाबिउगु लुमुसे च्वं । चित्तधर हृदयं आम न धयाः अनं वनं । लुमुसे च्वंगु भ्वं प्वलाः स्वःबलय् क्वाःक्वाःगु जेरी, स्वाःरी जुयाच्वन ।

थथे हे छन्हु नातिदाइया भुतू मच्याःगु खँ न्यनाः चित्तधर हृदयं नातिवज्रयाथाय् छम्ह मनू छ्वयाहयाः छेँय् छधू वा धकाः सःतके हल । नातिदाइ वय्कःया छेँय् वंबलय् जा थुयाः नयेत जाकि छप्वः बियाहल । अझ नातिदाइया ब्याहा यायेत चित्तधर हृदयं भमचा जुइम्हेसित धकाः नाडीघडी छगः, लुँया अंगू छप्वाः, तप छज्वः (?¬) बिउगु कंगु लुमंनि ।
थ्व खँ नातिदाइनं मेपिंत कं ला मकं ला मसिउ । जितः नं न्हापा गबलें मकं । छन्हु चित्तधर हृदयया बारे च्वसु च्वयेत नातिदाइनं थ्व खँ कंगु खः ।

लिपा जूलिसे नातिदाइया तुति स्यानावल । चिकुलां गा छपुं तुतिइ भुनाः पसलय् च्वनेगु जुल । पसलय् वयेफतले पसलय् च्वनेगु यात । लिपा स्वाहानें कुहां वये थाकुबलय् दकसिबय् च्वय कःसि लिक्क च्वंगु क्वथाय् च्वनेगु यात ।
न्हिं छकः तुतां चुयाः कःसिइ चाःहिलेगु अभ्यास जुल । तुतां चुयाः कःसिइ चाःहिले फयावःगुलिं नातिदाइ लय्ताइ । कुने नं वने फइ धयागु वय्कःया आस दुगु खनेदु । नातिदाइनं ल्वय्या बारे थीथी खँ ल्हाये धुंकाः जिके न्यन–“जि गथे खने दु ?”
नातिदाइया नुगःखँ थुल । वय्कःया थःगु आयुया बारे शंका जूगु जिं चाल । जिं धया–“नातिदाइया ख्वाः, म्ह, खँ दक्व स्वयेबलय् छुं जूगु खनेमदु । मुख्य तुति छता बमलाःगु ला खःनि । तुति छता बमलाःसां छु हे जुइ, जुइ छता फइ मखु ।”
नातिदाइनं एलोप्याथिक निसें कविराज, होमियोप्याथिक वासः जक मखु, छम्ह सँय् भन्तेपाखें नं वासः कया च्वनादिल । थ्वहे सम्बन्धय् नातिदाइनं कन–“वासः याःवइम्ह सँय् भन्ते हे तिल्वय् वयेयःम्ह जुयाः छन्हु अथे हे तिल्वय् वल ।”
नातिदाइया ल्वय्या खँ ल्हायेबलय् प्रमिला पीत, नःलि, लूजः व लूजःया जहान नापं पवनपिनि ग्वाहालि महान खः । वय्कःपिनिपाखें उलि स्यहारसुसार, वासःतासः आदि मजूगु जूसा नातिदाइनं तसकं स्याः नयाः दुःखपूर्वक न्हि छ्याये मालीगु जुइ । तर थज्याःगु पीडापाखें नातिदाइ तापाःगु दयेमाः धयागु जिगु अनुमान खः । थ्व बारे जिमि तिरिनापं बरोबर खँ ल्हायेगु, नातिदाइयात छेँजःपिंसं भचा हे कम मजुइक माःगु तक व्यवस्था जूगुलिं नातिदाइ नं स्याः नयेम्वाः ।

जि बरोबर सपूmधुकुतिइ वने । अन नातिदाइया भिन्चा पवन च्वनाच्वनी । नातिदाइया हालखबर न्यने, पवनं अथे हे खः धाइ, गबलें उकुन्हु स्वयाः भचा बांलाः धाइ । तलय् वनाः खँ ल्हाः हुँ धाइ पवनं । जि धाःसा न्यातं च्वय् थहां वनाच्वने हे थाकु चाइगु । गबलें गबलें वना । खँ ल्हायेफुम्ह जुयाः पासापिं सुं मवयाः म्हाइपु ताः नातिदाइया । उकुन्हु फलनाम्ह वल धकाः कनी । न्हिं छम्ह वयाः गफ याःवःसा यः नातिदाइया । छेँय् च्वने माल कि न्ह्याम्हेसित नं अथे जू जुइमाः मफइबलय् ।

अप्वः यानाः पसलय् वइपिंसं पसलय् हे नातिदाइया हालखबर न्यनावनी । तलय् वनाः खँ ल्हायेत नातिदाइनं न्हाय्पनं मताःगुलिं नं मेगु समस्या । थःपिंसं धयागु नातिदाइनं पांमथू । अथे धकाः थःपिं म्हाइपुक च्वनाच्वने माः धयागु मदु । नातिदाइनं मदिक्क खँ ल्हानाच्वनी । न्यनीम्हं न्यने जक माः ।

चैत, बैशाखया इलय् नं नातिदाइ कःसिलिक्क च्वंगु क्वथाय् हे च्वनी । अन टिभी नापं पंखा छप्वाः नं दु । छन्हु नातिदाइयात थन तलय् थ्यंक वये माःगुलिं पासापिं वये उसिधाः, कुने मातं क्वथाय् हे च्वनेगु याःसा तां नं न्वइ मखु, नापलाः वइपिंत नं अःपुइ धया । लिपा कुने मातं क्वथाय् हे च्वनेगु यात । न्हापा स्वयाः पासापिं वः दत ।
नातिदाइ नं सपूmधुकू चायेकूगु २५ दँ क्यंगु लसताय् दगुबहालय् हे नेपालभाषाया सपूm ब्वज्या नं जुल । सपूmधुकू तःगु ५० दँ क्यंगु लसताय् हानं छकः सपूm ब्वज्या यायेगु बिचाः दुगु खः । नापलाइबलय् ब्वज्या यायेगु बारे बिचा तइ, ग्वाहालि यायेत इनाप नं यानादी । तर थुगुसी धाःसा नातिदाइया म्हगस पूमवन । म्हगस घानाः वय्कलं दगुबहाः त्वःता वन ।

नातिदाइ झीपिंथें साधारण भाय्ह्यमि जक मखु, वय्कःयाके थेंज्याःगु भाषाया लागि यायेमाःगु कर्तव्य झीके भ्याः जक दु । सुं मदयाः उगु क्षेत्रयात हन्ताः जुल धायेगु चलन दु, तर नातिदाइ मदया नेवाःतय्गु लागि जूगु हन्ताः औपचारिक जक मजुसे धाथें हे हन्ताः खः धयागु वय्कःया योगदानया मूल्यांकन यायेबलय् जक सी दइ ।

सम्बन्धित बुखँ

LEAVE YOUR COMMENTS