अमेरिकी प्रतिबन्धं टर्किया अर्थव्यवस्था डाँवाडोल

टर्किं निदँ न्ह्यः अमेरिकी पादरी एन्ड्रयु ब्रन्सनयात ज्वंबलय् शायद हे जक बिचाः याःगु खइकि थुकिया लिच्वः निदँ लिपा देय्या अर्थ व्यवस्थाय् हे लाःवनी धकाः । एन्ड्रयुयात मत्वःतल धाःसा अमेरिकां आर्थिक प्रतिबन्ध तयेगु ख्याच्वः बिउगु खः । आः अमेरिकां धाथें अथे हे यानाः क्यनाबिउगु दु ।

अमेरिकी राष्ट्रपति ट्रम्पं टर्किं आयत जुइगु इस्पात व एल्मोनियमय् आयात शुल्क निदुगं यानाबिउगु दु ।थुकिं यानाः टर्किया अर्थव्यवस्था निरन्तर कुहां वनाच्वंगु दु । थनया मुद्रा लीरा थ्व दँय् डलरया तुलनाय् ४० प्रतिशत कुहां वनेधुंकूगु दु । डलरया अनुपातय् लीरा वंगु वालय् जक १६ प्रतिशतं कुहां वन । थुकथं लीरा गुलि तक कुहां वनी धयागु धायेफइगु स्थितिइ मदयाच्वंगु दु ।

आखिर टर्कि विरुद्ध अमेरिकां छाय् थज्याःगु निर्णय यात । थुकिया कारण बिस्कं बिस्कं पिहां वयाच्वंगु दु । तर थुकिया छगू महत्वपूर्ण कारण धाःसा अमेरिकी पादरी हे खः ।राजनीतिक पुचःतय् लिसे कथित सम्बन्धया कारणं टर्किं एन्ड्रयु ब्रन्सनयात सन् २०१६ य् गिरफ्तार याःगु खः । अमेरिकां ब्रन्सनयात रिहा यायेत माग याःगु खः, तर टर्किं वयात त्वःतेगु खँ अस्वीकार्य धकाः धाल ।

ह्वाइट हाउसया प्रेस सचिव सारा सन्डर्सं उबले धाःगु खः, ‘वयात ज्वंगु तसकं अनुचित व अन्यायपूर्ण खः ।’आर्थिक प्रतिबन्ध तयेवं बुधवाः जक टर्किया विदेश मन्त्रालयं छगू वक्तव्य जारी यानाः अमेरिकी प्रशासनयात गलत फैसला लित कायेत आह्वान याःगु खः । अमेरिकां तःगु थ्व प्रतिबन्ध खनाः विज्ञत नं अजू चायाच्वंगु दु ।

अमेरिकां छुं नेटा सहयोगी देय्यात थुकथं प्रतिबन्ध तःगु अजूचायापुगु खँ धाःगु दु । थ्व प्रतिबन्ध लिपा निगुलिं देय् स्वापू तसकं क्वय्या स्तरय् थ्यंवंगु दु ।टुर्किया राष्ट्रपति रेचेप तैय्यप अर्दोआन पश्चिमी नेतातपाखे झुकाव दुम्ह नेता खः । अर्दोआनया आलोचकतय्सं तःधंगु ल्याखय् जूगु गिरफ्तारी, मानवाधिकार उल्लंघन व रुसं मिसाइल रक्षा प्रणाली न्याःगुलिं न्हापा हे थुकथं प्रतिबन्ध तयेमाःगु खँ धयाच्वंगु दु ।

निदँ न्ह्यः तैय्यपं थःत कु यायेत्यंगु धासें तःधंगु ल्याखय् गिरफ्तारी यासें सेना व सरकारी कर्मचारीतय्त बर्खास्त यानाबिउगु खः ।
राष्ट्रपति तैय्यपं पादरी ब्रन्सनया स्वापू गैरकानुनी कुर्दिस्तान वर्कर्स पार्टी व गुलेन आन्दोलनलिसे दु धकाः धया वयाच्वंगु दु । गुलेन आन्दोलनं हे सन् २०१६ य् सत्ता कू यायेगु असफल कुतः याःगु खः ।

 

सम्बन्धित बुखँ

LEAVE YOUR COMMENTS