पेले अस्पतालं डिस्चार्ज

एजेन्सी- ब्राजिलया लेजेण्ड कासामि पेलं अस्पतालं डिस्चार्ज जूगु दु । कोलोन ट्युमर व युरिनरी ट्रयाक्ट इन्फेक्सनया वासः याकेत वंगु फ्रेबुअरी १३ तारिखय् अस्पताल भर्ना जूम्ह पेले सोमवा साओ पाउलोय् च्वंगु अल्बर्ट आइन्टाइन अस्पतालं डिस्चार्ज जूगु खः । ८१ दँ दुम्ह पेलेया छुं ई न्ह्यवनिसें स्वास्थ्य समस्या वयाच्वंगु खः ।

सन् २०१५य् पेलेया प्रोस्टेटया अपरेशन जूगु खःसा सन् २०१९ य् पिसाबया समस्याया कारणं अस्पताल भर्ना जूगु खः । अबलेनिसें पेले फलोअपया निंतिं अस्पताल वनाच्वंगु खः । पेलेया स्वास्थ्य सुधार जूगु चिकित्सकतय्सं धाःगु दु ।

पेले ब्राजिल पाखें स्वकः विश्वकपया त्याकूम्ह कासामि खः । पेलें सन् १९५८, १९६२ व १९७०इ विश्वकप त्याकूगु खः । पेलें ब्राजिलया निंतिं ९१ गू कासा म्हिताः ७७ गू अन्तर्राष्ट्रिय गोल याःगु दु । पेले प्यंगू विश्वकप म्हिताः गोल याःम्ह कासामि नं खः ।