डा. केसीया आन्दोलनं लाकूगु लिच्वः

स्वास्थ्य ख्यःयात भिंकेगु नितिं धकाः बरिष्ठ चिकित्सक गोविन्द केसी आमरण अनसन च्वनादीगुलिं छगू कथं देय्या राष्ट्रिय राजनीतिइ हे भुखाय् ब्वयाच्वंगु दु । वय्कः थ्व स्वयां न्ह्यः न्हापा न्हापा नं तःक्वः हे आमरण अनसन च्वनादीगु जूसां थुलिमछि राजनीति तरंगित धाःसा मजूगु खःसा थुगुसी तसकं तरंगित जूगु दु ।

उकिया मूल कारण धइगु डा. केसीया आन्दोलनया झ्वलय् अस्पताल दुने हे प्रहरी हस्तक्षेप जूगु, डा. केसीया समर्थनय् द्वलंद्वः मनूत सतकय् कुहां वःगु, डा. केसीलिसे तःन्हु तक नं वार्ता मजूगु अले सरकार लगायत डा. केसी नं थःथःगु हे अडानय् कायम जुयाच्वंगुलिं खः ।

न्हापा झिंप्यक्वः तक आमरण अनसन च्वंगु अवस्थाय् फुक्क सरकारं वय्कःलिसे सहमति याःगु खनेदुसा सहमति कथं हे लिपांगु इलय् माथेमा आयोग दयेकाः उकिं बिउगु प्रतिवेदनया आधारय् न्हापा अध्यादेश मार्फत ऐन हःगु खःसा आः वहे माथेमा प्रतिवेदनया अःखः नापं अध्यादेश मार्फत हःगु ऐनया अःखः दुई तिहाइ बहुमत दुगु ओली सरकारं मेगु विधयेक हःगुलिं हे थौं डा. केसीया मागयात कयाः आः छु जुइगु खः धकाः धाये फयाच्वंगु मदु ।

प्राध्यापक डा. गोविन्द केसी केदारभक्त माथेमा नेतृत्वया कार्यदलया प्रतिवेदन कार्यान्वयनया माग यानाः जुम्लाय् अनसन च्वनादीगु नीस्वन्हु फुइधुंकूगु दु । सामान्यतया मनूत छुं हे मनसे लः हे मत्वँसे नीस्वन्हु नीप्यन्हु तक च्वनेफइ धइगु मान्यता दु । थौं डा. केसीया अनसनं उकथंया दिन नं पुला वनेधुंकूगु अवस्था दु ।

डा. गोविन्द केसी जुम्लाय् अनसन च्वनादीगु नीस्वन्हु फुइधुंकूगु दु । सामान्यतया मनूत छुं हे मनसे लः हे मत्वँसे नीस्वन्हु नीप्यन्हु तक च्वनेफइ धइगु मान्यता दु । थौं डा. केसीया अनसनं उकथंया दिन नं पुला वनेधुंकूगु अवस्था दु ।

केसीया माग सम्बोधनया नितिं तत्कालिन सरकारं माथेमाया नेतृत्वय् २०७२ सालय् छगू समिति दयेकूगु खःसा वहे समितिं तयार याःगु प्रतिवेदन कार्यान्वयन यायेमाःगु माग डा. केसीं याना वयाच्वंगु खः । ११० पेज ताःहाकःगु उगु प्रतिवेदन कार्यान्वयनया बारे थौंकन्हय् चर्चा जुयाच्वंगु दुसा प्रतिवेदनय् छु खँ उल्लेख जुयाच्वंगु दु धइगु बारे नं सकसिगुं चिउताः जुयाच्वंगु दु ।

उगु प्रतिवेदनया ३९ नम्बर पेजय् च्वयातःगु दु, ‘निजी क्षेत्रया शिक्षण संस्थात सुविधा सम्पन्न शहरी क्षेत्र व अझ विशेष यानाः स्वनिगलय् केन्द्रित जुयाच्वंगु खनेदु । थथे जूगुलिं विद्यार्थीत आकर्षित यायेत अःपुइगु, दक्ष व अनुभवी शिक्षकत नं अपेक्षाकृत कथं अप्वः सहज कथं उपलब्ध जुइ फइगु नापं माःगु भौतिक व शैक्षिक पूर्वाधारत निर्माण व व्यवस्थापनया ज्या अःपुइगुलिं हे भूमिका जुयाच्वनी ।

तर थज्वःगु प्रबृत्तिपाखें गुणस्तरीय स्वास्थ्य सेवाय् सहज पहुँचया दृष्टिकोणपाखें देय्न्यंकं क्षेत्रीय असमानता ब्वलंकेगु जक मखु विकासया दृष्टिकोणपाखें नं भौगोलिक असन्तुलनयात अझ अप्वयेकी । स्वनिगः केन्द्रित जुयाः न्हून्हूगु मेडिकल, नर्सिङ व स्वास्थ्य प्राविधिक कलेजत चायेकूगुलिं ग्रामिण व दुर्गम लागाय् ज्या यायेत वनीपिं चिकित्सक व स्वास्थ्यकर्मीत तकं माले थाकुयावःगु अवस्था दु ।’

थुगु प्रतिवेदन स्पष्ट रुपं हे आःया अवस्थाय् मेडिकल कलेजत स्वनिगः केन्द्रित याये मजिउ धइगु खँ खः अले उगु हे प्रतिवेदनयात कार्यान्वयन यायेमाः धकाः डा. केसीं माग याना वयाच्वंगु खः । थुगु खँय् सरकारय् हे दुथ्यानाच्वंगु संघीय समाजवादी फोरम नेपालं नं समर्थन यानाच्वंगु दु ।

उकिया अर्थ डा. केसीया मागप्रति फोरम सकारात्मक दु । तर नेपाल कम्युनिष्ट पार्टी (नेकपा) धाःसा केसीया मागयात सम्बोधन यायेगु सवालय् खास हे सकारात्मक खने दयाच्वंगु मदु । लिपांगु इलय् वयाः ला डा. केसीयात जुम्लां छगू कथं अपहरण यानाः येँय् हःगुलिं थःत उपचार तकं याके बी मखु धकाः अडान कयाच्वंगु अवस्था दु ।

धात्थें डा. केसीया स्वीकृति मकासे अपहरण शैलीं हे येँय् हःगु खःसा थ्व झन गम्भीर प्रकृतिया ज्या जूवंगु दु । आः वयाः ला सरकारं वार्ता सुलिसे यायेगु धकाः थःपिं स्पष्ट मदु तकं धायेगु यानाहःगु दु । थुकिया अर्थ आः सरकार वार्ताया सवालय् अलमल जुयाच्वंगु दु । ताः ई तक नं वार्ता मयात धाःसा उकिं गम्भीर लिच्वः लायेफु धकाः थुइकेमाः ।

डा. गोविन्द केसी छम्ह ब्यक्ति खःसां आः वयाः वय्कःयात नेपाःया हे स्वास्थ्य ख्यःया छम्ह न्ह्यलुवा कथं आम नागरिकतय्सं कायेधुंकूगु दु । अले केपी ओलीया सरकारयात जनतां दुई तिहाइ बहुमत बिउगु खःसां लिपांगु इलय् वयाः ओली सरकारयात आलोचना याइपिं झन झन अप्वया वःगु दु ।

देसय् पानीजहाज सञ्चालन यायेगु, चीन व भारतं रेल हयेगु थेंजाःगु ततःधंगु म्हगस ज्वना च्वनादीम्ह अले आःया अवस्थाय् विकास व समृद्धियात हे मूल नारा बियाच्वंगु अवस्थाय् ओली सरकार नापं नेकपाया नेतृत्व गम्भीर जुया वनेमाः । चिचीधंगु खँय् अलमल मजुसे ततःधंगु योजना सम्पन्न यायेत अले जनतायात दुई तिहाइ बहुमतया सरकार वःगु महसुस जुइगु, देसय् हिउपाः वःगु व थःपिनिगु नितिं छुं जूगु महसुस याकेगु ई खः ।

उकिं ओली सरकारं थुगु खँय् गम्भीर जुया वनेमाःगु अवस्था दु । डा. केसीया आन्दोलनया लिच्वलं देशय् ततःधंगु ज्या याये मखन धकाः धाये मखनीगु अवस्था ब्वलंकेमाः ।

 

सम्बन्धित बुखँ

LEAVE YOUR COMMENTS