देय् रक्षाया नामय् अन्धराष्ट्रवाद

चाहे विकसित देय् जुइमा वा अविकसित देय्, यदि सत्ताय् च्वनीपिं नेतात भिंपिं जुल धाःसा व नेतातय्सं देशया उन्नति व प्रगति नापनापं जनतायात सुख शान्ति बीगु स्वयाच्वनी । यदि नेतात मभिंपिं जुल धाःसा गरिब देशया जनतायात जक मखु धनी देशया जनतातय्त नं मभिंपिं नेतातय्सं टेन्सनया जीवन बिते यायेत बाध्य याइ ।

दसुया निंतिं धनी देश अमेरिकाय् छुं प्रतिशत अति धनी जुया वनाच्वंगु कारणं यानाः अमेरिकाया सामाजिक व आर्थिक असमानता झन झन अप्वया वनाच्वंगु दु । सामाजिक व आर्थिक असमानता अप्वया वनाच्वंगु कारणं यानाः मध्यम व निम्न मध्यम वर्गया जनता पीडित जुइ मालाच्वन ।

यदि आर्थिक असमानता अप्वः जुजुं चरम अवस्थाय् थ्यन धाःसा जनतां बाध्य जुयाः सरकारया विरोधय् कुहां वयाः राजनीतिक उठलपुठल हये मालेफु । अर्थात पुँजीवादी व्यवस्थाया विरोधय् तकं जनता कुहां वयेफु । यदि बहुसंख्यक जनतां चर्को आन्दोलन यात धाःसा अमेरिकाया सेना व पुलिसं तक नं दबे याये फइमखु ।

थ्व हे कारणं अमेरिकी प्रशासनं जनताया ध्यान मेगु थासय् मोडय् यायेगु लागि न्हून्हूगु राजनीतिक नौटंकीया खेल म्हितेगु सुरु यानाच्वंगु दु । थौंया विश्वय् राजनीतिक विवेकी अथवा राष्ट््िय वा अन्तर्राष्ट्रिय स्तरया खुुबी दुपिं नेतात अति कम जक खनेदु । यक्व देशय् राष्ट्«िय स्तरया खुबी दुपिं नेतात कम जुया वनाच्वंगु कारणं यानाः नेतागिरि याइपिं नेतात जक न्ह्यःने वयाच्वंगु दु ।

नेतागिरी यानाः सत्ताय् च्वनीपिं नक्कली नेतातय्गु उद्देश्य थःगु स्वार्थया लागि न्ह्यागु नं कुकर्म यायेगु जुइ । थ्व हे कारणं यानाः नेतागिरिया मुख्य ज्या थःपिंसं नं देशया सम्पत्ति लुटे यानाः मगानाः विदेशी शक्तियात नं देशया सम्पत्तियात लुटे याकाः कमिशन ज्या जुयाच्वनी । नेतागिरीतय्सं न्ह्याबलें जनतायात झंग लायेगु लागि अनेक आकर्षक नारा बीगु यानाच्वनी ।

मोदीया ज्या नं बहुसंख्यक जनताया हितय् वनेगु त्वःताः पुँजीपति व साहु महाजनया पक्षय् वनाः जनतायात निराश यायेगु खः । झीगु देशया प्रधानमन्त्री ओली नं जाती व धर्मया नामं राज्य संचालन यानाच्वंगुलिं देश बर्बाद जुयाच्वंगु खः ।

नेतागिरीया सत्ता सुरक्षित याना तयेगु लागि अदृश्य शक्ति नाप अप्राकृतिक सम्बन्ध अप्वयेकाच्वनी । अदृश्य शक्तिया अर्थ खः धार्मिक पाखण्ड, आपराधिक समूह, माफिया व पुँजीपतित खः । नेतागिरितय्सं थःगु स्वार्थया लागि अप्राकृतिक सम्बन्ध बढे यानाच्वंगु कारणं यानाः राज्यं सक्षम, विवेकी, देशभक्ततय्त माइनस यायेगु ज्या यानाच्वंगु दइ ।

जब सक्षम, विवेकी, देशभक्ततय्गु कदर याइमखु, व राज्य अस्तव्यस्त जुइगु स्वाभाविक खः । जब राज्य व्यवस्था अस्तव्यस्त जुयाच्वनी व राज्यया कार्यपालिका न्यायपालिका व व्यवस्थापिकाय् थ्यनाच्वंपिं व्यक्तित माकः स्वभाव दुपिं जक जुयाच्वनी । व माकःतय्गु ज्या देश कंगाल यायेगु जक जुइ ।

गरिब राज्यया नेतात अप्वः हे विदेशी शक्तिया प्रभावय् लानाच्वंगुलिं यानाः उमिसं प्रजातन्त्रया नामं देश व जनतायात बर्बाद यानाच्वनी । धनी देशय् धाःसा भचा फरक जुयाच्वनी । अथे धयागु धनी देशया प्रजातान्त्रिक व्यवस्थां खाली धनी वर्ग (पुँजीपति)तय्त जक झन झन धनी यानाः गरिब जनतायात वास्ता याइमखु ।

झन राज्यं मध्यम व निम्न मध्यम वर्गयाके कर अप्वः कायेगु यानाच्वनी । थुकिया अर्थ छु धाःसा न्ह्याक्व हे परिश्रम याःसां नं गरिबया हालत सुधार जुइमखु । राज्यं बहुसंख्यक जनतायात पक्षपात यानाच्वंगुलिं यानाः राज्यप्रति जनतां अविश्वास यायेगु नापनापं विद्रोहया भावना अप्वया वनाच्वंगु दु । दसुया लागि दक्षिण अफ्रिकाया खर्बपति जोहन रुपजं चान्हय् न्ह्यः वयेके मफु ।

कारण दक्षिण अफ्रिकाया बहुसंख्यक जनतां राज्यप्रति तिव्र रुपं असन्तोष अप्वंका हःगु दु । अमेरिकाय् नं गरिब जनता झन झन गरिब जुजुं वनाच्वंगुलिं यानाः राज्य व्यवस्था खनाः जनतां असन्तुष्टि अप्वयेका वनाच्वंगु दु । कारण अमेरिकाय् राज्यं हे धनीवर्गतय्त अति सुविधा बियाः झन धनी यायेगु ज्या यानाच्वंगुलिं खः ।

अमेरिकाया धनी वर्गतय्सं खाली एकप्रतिशत जक राज्ययात कर पुलाः राज्यपाखें यक्व सुविधा कयाच्वंगु दु । अथे धयागु धनी वर्गयात करय् यक्व छुटया नापनापं नियम कानुनं नं धनी वर्गयात यक्व सुविधा बियातःगु दु । अमेरिकाया राज्यं धनीवर्गतय्त सुविधा बिया च्वनसा गरिब जनतायात धाःसा अनेक कानुनी झमेला बियाः दिक्क यानाच्वंगु दु ।

थ्व हे कारणं यानाः अमेरिकाया बहुसंख्यक जनता छुं नं इलय् राज्यया पक्षपाती ज्याया विरोधय् सतकय् कुहां वयेफु धकाः अनुमान यानातःगु दु । राजनीतिक विश्लेषकतय्सं थथे नं धयाच्वंगु दु कि अप्वः नेतातय्गु ज्या देश प्रगति यायेगु स्वयां नं यइपुसे च्वंगु नारा बियाः जनतायात झंगः लायेगु जुइ ।

अझ ला प्रजातन्त्र अथवा लोकतन्त्रया भजन यायां बहुसंख्यक जनतायात चरम रुपं शोषण याना च्वनी । जब जनता अन्याय, उत्पीडनया मारय् लाइ, अवश्य नं जनसागर सतकय् कुहां वयाः सरकारया विरोधय् बाध्य जुयाः वयेफु । हानं वहे पुँजीपति वर्गया पक्षपाती नेतातय्सं हे देश रक्षाया नामय् अन्ध राष्ट्रवादया नारा ज्वनाः चुनावय् कुहां वयेगु यानाच्वनी ।

अझ ला अन्ध राष्ट्रवादया नापनापं जाती व धर्मया नामं स्वेच्छाचारी शासकयात जन्म यानाः जनसागरयात मत्थर यायेगु रणनीति अदृश्य शक्तिं म्हिता च्वनी । अमेरिकाया राष्ट्रपति डोनाल्ड ट्रम्प नं जाती व धर्मया नारा ज्वनाः राष्ट्रपति जुइत सफल जूम्ह खः । अमेरिकाया चुनावय् जाती व धर्मया नामं चुनाव त्याकेत सफल जूगु कारणं यानाः पोल्यान्ड, हंगेरी व टर्कींया राष्ट्रपतित नं अमेरिकाया नक्कल यानाः चुनाव त्याकेत सफल जूपिं रखः ।

६०–७०या दशकय् इन्डोनेसियाय् सुहार्तो, फिलिपिन्सय् मार्कोसं नं अन्ध राष्ट्रवादया नारा ज्वनाः राष्ट्रपति जुइत सफल जुल । जब पदय् थ्यन, उमिसं नं देशया पुँजीपति व विदेशी शक्ति अमेरिकाया पक्षय् वनाः बहुसंख्यक जनतायात दबे यायेगु ज्या जक यात । भारतया नरेन्द्र मोदी नं व हे लँपुइ वनेगु लागिं अन्धराष्ट्रवाद, जातीवाद व धर्मया नामं चुनावय् कुहां वःम्ह नेता खः ।

मोदीया ज्या नं बहुसंख्यक जनताया हितय् वनेगु त्वःताः पुँजीपति व साहु महाजनया पक्षय् वनाः जनतायात निराश यायेगु खः । झीगु देशया प्रधानमन्त्री ओली नं जाती व धर्मया नामं राज्य संचालन यानाच्वंगुलिं देश बर्बाद जुयाच्वंगु खः ।

सम्बन्धित बुखँ

LEAVE YOUR COMMENTS