पाकिस्तान पार्टनर, भारत जःलाखःला, नेपाः सु?

वंगु बुधवाः चीनया राजधानी बेइजिङ्गय् पाकिस्तानी प्रधानमन्त्री इमरान खानं अनया राष्ट्रपति सी जिनपिङ्ग नाप लाये धुंकाः जारी याःगु संयुक्त वक्तव्यय् थथे धयातःगु दु– “पाकिस्तानी पक्षं चिनिया पक्षयात जम्मु व काश्मिरया मामलाय् थःपिनि सरोकार, स्थिति व अन जरुरी जुयाच्वंगु सवाललिसेंया विषयस अनया मामलाय् जानकारी बीगु ज्या यात । थुकिया लिसलय् चिनिया पक्षं जम्मु व काश्मिरया मामलाय् थःपिसं क्वथीक ध्यान बियाः स्वयाच्वनागु धासें काश्मिरया विवाद इतिहासं त्वःताथकूगु विवाद खः धासें संयुक्त राष्ट्रसंघया बडापत्र, राष्ट्रसंघया सुरक्षा परिषद्या निर्णय व द्विपक्षीय सम्झौताया लिधंसाय् शान्तिपूर्ण रूपं थुकियात ज्यंकेमाः धइगु खँ लिसा कयाः धाल ।स्थितियात जटिल दयेकीगु एकपक्षीय ज्याखँयात चीनं विरोध याइ । निगुलिं पक्षं शान्तिपूर्ण, स्थायी, सहयोगात्मक व समृद्ध दक्षिण एसिया हे थनया सकल पक्षया हितलिसे स्वानाच्वंगु खः धइगु खँय् बः बिल । अथे जूगुलिं थुपिं पक्षतसें थुगु क्षेत्रया विवाद व मामलात समानता व पारस्पारिक सम्मानया लिधंसाय् जुइगु वार्ताया माध्यमं ज्यंकेमाः ।”

थुगु वक्तव्य पिदनेवं भारतया राजधानी न्हू दिल्लीइ तच्वःगु प्रतिक्रिया जुल । भारतया नेतातसें काश्मिरया मामलायात भारतया आन्तरिक मामला धयावयाच्वंगु दु । थ्व हे ल्याखं पाकिस्तान व चीनं थुगु मामलाय् खँ ल्हाये दइमखु धकाः धाल । थुलि जक मखु, चीन पाकिस्तान आर्थिक करिडोर परियोजनाया नं भारतं विरोध यानाच्वंगु दु ।

थथे विरोध यानाच्वंगु हुुनि धइगु थुगु परियोजनाया लँपु पाकिस्तानं कब्जा यानातःगु काश्मिरया लँपु जुयाः वनीगु जूगुलिं खः । आजाद काश्मिर धकाः पाकिस्तानं थुकियात धयाच्वंगु दु । काश्मिरया विषयस चीनं प्वंका वयाच्वंगु सरोकारया हुनि धइगु खँ अक्सय चीनया क्षेत्र खः, गुगु भारत व चीनया दथुइ सीमा विवादया विषय जुयाच्वंगु दु ।

थ्वयां कंस कुन्हु हे चीनया राष्ट्रपति सि जिनपिङ्ग भारतय् थ्यन । तर राजधानी न्हू दिल्लीइ मखु । भारतीय प्रधानमन्त्री नरेन्द्र मोदी खूब विचाः यानाः तामिलनाडुया राजधानी चेन्नइनं ५५ किलोमिटर तापाक्क च्वंगु महाबलीपुर धइगु थासय् मोदी व जिनपिङ्ग नाप लात । निम्ह नेतातय् दथुइ पुचलय् नं खँल्हाबल्हा जुल धाःसा थ्वसिकं नं आपाः म्हतिं म्हतिं ताःहाकयेक हे वार्ता जुल ।

चीनया राष्ट्रपति सि जिनपिङ्ग भारतय् थ्यन । तर राजधानी न्हू दिल्लीइ मखु । भारतीय प्रधानमन्त्री नरेन्द्र मोदी खूब विचाः यानाः तामिलनाडुया राजधानी चेन्नइनं ५५ किलोमिटर तापाक्क च्वंगु महाबलीपुर धइगु थासय् मोदी व जिनपिङ्ग नाप लात ।

म्हतिं म्हतिं जूगु वार्ता तय ई सिकं नं तसकं ताःहायेक जूगुलिं निम्ह नेतातय् दथुइ सीमा विवाद, व्यापार, आतंकवाद जक मखु काश्मिरया मामलाय् नं खँल्हाबल्हा जुल जुइमाः धकाः पत्रकारतसें अनुमान यात । निथीसिनं हे थःथःगु सरोकारया खँयात ल्ह्वन धकाः नं प्रचारप्रसार जुल । औपचारिक रूपं जक थुकिया बारे छुं मधाःगु धाल ।

तर लिपा वयाः काश्मिरया गुगुं खँ हे मजूगु धइगु खँ धाल । काश्मिरया मामलाय् न्ह्यथनेगु तक ज्या मजूगु हे भारतया कूटनीतिक विजय खः धकाः भारतीय सञ्चारमाध्यमतसें प्रचारप्रसार यात । मुख्य सवाल थ्व हे खः कि पाकिस्तान धइगु देय् चीनया रणनीतिक साझेदार देय् खः, भारत मखु ।

भारतं ला चीन व पाकिस्तान जानाः थःगु देय्यात मछिंकेगु ज्या मयायेमाः धकाः कुतः याइगु खः । मेगु खँ धइगु पाकिस्तान धइगु आतंकवादयात बढावा बीगु देय् खः धइगु धारणाया प्रचार यासें पाकिस्तानयात सुनां नं ग्वाहालि यायेमजिउ धकाः धयाजुइगु खः । उकिं भारतं थ्व इलय् आतंकवादया सवालयात हे बल्लाक्क ल्ह्वंगु दु ।

सीमा विवाद व व्यापार घाटाया सवाल मेगु सवाल खः । चीन व भारतया उच्च नेतातय् दथुइ चीनया वुहानय् गुगु अनौपचारिक वार्ता सुरु जुल, थुकिया परम्परा कायम यासें अनौपचारिक खँल्हाबल्हा न्ह्याकेगु हे भारतया ताः खनेदु ।

विशेषतः चीनं पाकिस्तानया भूमिया सार्वभौमसत्ता, स्वतन्त्रता व सुरक्षायात समर्थन यायेगु व पाकिस्तानं नं एक चीनया नीतिया समर्थन यायेगु, हंगकंगया आन्दोलनयात चीनया आन्तरिक मामला धायेगु धइगु खँ वंगु बुधवाः चीन व पाकिस्तानं पिथंगु संयुक्त वक्तव्यय् धयातःगु दु । मेखे भारत व चीनया दथुइ व्यापारया सम्बन्धय् छगू संयन्त्र दयेकेगु धकाः जूगु खँ हे तःधंगु उपलब्धि खः धकाः धाःगु दु ।

नापं चीन व भारतया दथुइ जनस्तरय् सम्बन्ध बल्लाका यंकेगु खँ नं थ्वय्कःपिनि दथुइ जूगु मुख्य खँ धकाः प्रचारय् हःगु दु । छगू न्ह्यसःया लिसलय् भारतीय विदेश सचिव विजय गोखलें चीनया राष्ट्रपति जिनपिङ्गं चीनय् पाकिस्तानया प्रधानमन्त्री इमरान खानया भ्रमणया वारे खँ कंगु व भारतीय प्रधानमन्त्री नरेन्द्र मोदीं न्यनेगु ज्या याःगु खँ धयादिल ।

विदेश सचिव गोखलें चीन पाकिस्तान आर्थिक कोरिडोरया सवालय् चीनं भारतया संवेदनशीलतायात विचाः याये धकाः धाःगु दु धासें थ्व मामला आः दयेकीगु व्यापारिक संयन्त्र थःगु अधिकार क्षेत्रय् कायेगु नितिं भारतं पहल यायेफुगु संकेत नं बियादिल । थुकथं चीनया नितिं पाकिस्तान छगू पार्टनर देय् खः धाःसा भारत धइगु जःलाःखःला जक खः धइगु खँ यच्चुक सीदत।

मेखे चीन व पाकिस्तानया दथुइ गुगु व्यापार करिडोरया परियोजनाया खँ जूगु दु, थ्व बेल्ट एण्ड रोड इनिसिइटिभ वा बिआरआईया हे छगू ब्व खः । पाकिस्तानं थ्व परियोजना कार्यान्वयन यायेत ज्याखँ न्ह्याकेधुंकूगु दु । मेता खँ, अनौपारिक खँल्हाबल्हाय् काश्मिरया खँ मजू धकाः धायेवं चीनं थ्व मामलाय् खँ ल्ह्वनी हे मखु धइगु जुइमखु ।

सवाल ला थ्व दु कि काश्मिरया मामलाय् भारत व पाकिस्तानया दथुइ लडाइँ जुल धाःसा चीनं पाकिस्तानयात ग्वाहालि याइगु सम्भावना तकं चीन पाकिस्तानया वक्तव्यय् खनेदुगु दु । थुकियात स्वयाः हे भारतं आतंकवाद व कट्टरपन्थीकरणया सवालयात ल्ह्वंगु खः । आतंकवाद व कट्टरपन्थीकरणया सवाल धइगु हे भारतं कूटनीतिक रूपं पाकिस्तानयात हे क्यंगु खः ।

थुकथं चीनया नितिं भारत जःलाःखःला देय् जक खः धइगु खँ सीदत । थुकिं हे सम्भावित असमझदारी मजुइमा धकाः हे भारतया प्रधानमन्त्री मोदीं थुगु अनौपचारिक वार्तालापय् चीनया राष्ट्रपतियात सःतूगु खः । अले चीन व भारतया दथुइ जनस्तरय् सम्बन्ध व सम्पर्क म्हो जूगु तायेकाः हे थुकी बः बिउगु खः ।

थन थाय् तक वयेधुंकाः चीनया नितिं नेपाः छु ले? थ्व न्ह्यसः दनीगु स्वाभाविक खः । चिनिया विदेश मन्त्री वःबलय् चीनपाखें ५००० पाल, चिनिया भाय् स्यनीपिं भोलन्टियर ग्वाहालि बीगु धाःबलय् झीपिं ला धात्थें हे फ्वगिंत लानाच्वन धइथे झीत ताःगु खः, आः चाहिँ छु खः धइगु खँ सीदइगु हे जुइ ।

सम्बन्धित बुखँ

LEAVE YOUR COMMENTS